ئالایێ كوردستانێ بۆ جارا ئێكێ ل سه‌ر باوه‌رنامه‌كا نێڤده‌وله‌تی هاته دانان
دهۆك، شاكر ئه‌تروشی:
سه‌رۆكێ كومه‌لا پێشه‌نگێن باشنڤیسێن كوردستانێ، د دیداره‌كێ دا بۆ رۆژناما ئه‌ڤرۆ دیاركر، پشتی ماندیبوونه‌كا زۆر ئه‌و شیان وێنێ ئالایێ كوردستانێ دانه سه‌ر باوه‌رنامه‌كا نێڤده‌وله‌تی كو ئه‌و ژی بۆ وان ئه‌ندامان دهێته دان ئه‌وێن ب كه‌ڤالێن خوه یێن باشنڤیسێ پشكداریێ د پێشانگه‌هێن جیهانی دا دكه‌ن.
به‌رزان حه‌جی ئیبراهیم جاف، سه‌رۆكێ كومه‌لا (رواد حگاگی كوردستان) هێشتا گۆت: دانانا وێنێ ئالایێ كوردستانێ ل سه‌ر باوه‌رنامه‌كا نێڤده‌وله‌تی بۆ كوردان هه‌موویان ب تایبه‌ت ژی هونه‌رمه‌ندان جهێ شانازیێ نه چنكو كێم كه‌س دشێن وێ باوه‌رنامێ وه‌ربگرن و ئه‌ڤ باوه‌رنامه بتنێ ب وان هونه‌رمه‌ند و باشنڤیسان دهێته دان ئه‌وێن بژاره دكارێ خوه دا ل سه‌ر ئاستێ هه‌موو جیهانێ.
ل دووماهیێ گۆت: ئه‌ز وه‌ك سه‌رۆكێ كومه‌لێ و جێگرێ من محسن ئیسماعیل و عومه‌ر سه‌لیم بڕیارده‌رێ كومه‌لێ بۆ به‌ریكانه‌كا نێڤده‌وله‌تی یا باشنڤیسێ ب نوونه‌راتیا هه‌رێما كوردیتانێ هاتیه داخوازكرن، ئه‌و پێشانگه‌ه دێ ل رۆژا بیستی هه‌یڤا گولانا بهێت بیت ل وه‌لاتێ مصرێ، لێ هه‌تا نوكه چو لایه‌نان وه‌ك سپۆنسه‌ر به‌رهه‌ڤیا خوه نه‌كرینه كو مه‌زاختیێن هاتن و چوونێ بۆ مه ب مه‌زێخن و هه‌كه كه‌سێ خوه دبه‌ڕا نه‌بر ب زه‌حمه‌ته ئه‌م بشیێن ژ كیستێ خوه بچین، چنكو به‌ری نوكه جاره‌كێ بۆ وه‌لاتێ ئۆردن و جاره‌كێ ژی بۆ وه‌لاتێ جه‌زائیر ئه‌م هاتبووینه داخوازكرن لێ ژبه‌ر نه‌بوونا پاره‌ی ئه‌م نه‌چووین.
