ئه‌ڤرۆ به‌هرا وه‌رگرتنا گه‌نمێ جۆتیارێن هه‌رێمێ دێ هێته دیاركرن
بارزان مزووری:
كه‌ریم سلێمان، بریكارێ وه‌زاره‌تا چاندن و ژێده‌رێن ئاڤێ ل حوكمه‌تا هه‌رێما كوردستانێ بۆ رۆژناما ئه‌ڤرۆ دیار كر، ده‌ڤه‌را شێخان یا جودایه دگه‌ل ده‌ڤه‌رێن دی یێن هه‌رێما كوردستانێ، ژ به‌ركو پشكه‌ك ژ به‌رهه‌مێ چاندنا شێخان سه‌ر ب نه‌ینه‌وا ڤه‌یه پشكه‌ك ژی سه‌ر ب دهۆكێ ڤه‌یه، ئه‌وا ب سه‌ر هه‌رێما كوردستانێ ڤه سالانه كۆمبوونه‌ك ل وه‌زاره‌تا چاندنێ یا حكومه‌تا عیراقێ دهێته ئه‌نجامدان و نوونه‌رێن وه‌زاره‌تا چاندنا هه‌رێما كوردستانێ ژی تێدا پشكدار دبن و پشكا هه‌رێما كوردستانێ یا وه‌رگرتنا به‌رهه‌مێ گه‌نمێ یێن جوتیارێن كوردستانێ دهێته دیاركرن و گۆت: “ئه‌ڤ ساله هه‌تا نوكه ئه‌و كۆمبوون نه‌هاتیه ئه‌نجامدان و پشكا هه‌رێما كوردستانێ نه‌هاتیه دیاركرن كا چه‌نده”.
گۆتژی: “دوهی 29/5/2021 وه‌زیرێ چاندنێ یێ حكومه‌تا عیراقێ هاته هه‌رێما كوردستانێ و بڕیاره ئه‌ڤرۆ 30/5/2021 وه‌زاره‌تا چاندنێ یا حكومه‌تا هه‌رێما كوردستانێ دگه‌ل وه‌زیرێ چاندنا عیراقێ كۆمبیت و ئێك ژ خالێن كۆمبوونێ دیاركرنا رێژا وه‌رگرتنا به‌رهه‌مێ گه‌نمێ جۆتیارێن هه‌رێما كوردستانێ یه”.
ناڤهاتی زێده‌تر گۆت: “وه‌رگرتنا به‌رهه‌مێ گه‌نمێ جۆتیارێن ده‌ڤه‌رێن مادێ 140 یێ جودایه، ئه‌و ده‌ڤه‌ر دێ ب شێوه‌كێ راسته‌وخۆ گه‌نمی راده‌ستی سایلۆیێن سه‌ر ب عیراقێ ڤه كه‌ن، به‌لێ مه دڤێت چاوا ره‌فتار دگه‌ل جۆتیارێن وان دهێته كرن، وه‌سا دگه‌ل جۆتیارێن مه ژی بهێته كرن”.
