نڤیسه‌ره‌كێ ناڤدارێ توركیا:ئه‌ردۆگانی ژ بلی شه‌ری چو به‌رنامێن دی بۆ پاشه‌رۆژا توركیا نینن
نڤیسه‌ره‌كێ ناڤدارێ توركیا راگه‌هاند كو نها ئه‌ردۆگانی دڤێت هێزێن توركیا ل ئه‌فغانستانێ بمینن و وه‌سا دڤێت خوه نێزیكی ئه‌مریكا و وه‌لاتێن رۆژئاڤا بكه‌ت، ئه‌ردۆگانی ژ بلی شه‌ری چو به‌رنامێن دی بۆ پاشه‌رۆژا توركیا نینن و ئه‌و یه‌ك ژی مه‌ترسیه‌كا گه‌له‌ك مه‌زنه.
له‌ڤه‌نت گولته‌كین نڤیسه‌ر و رۆژنامه‌ڤانێ ناڤدار یێ توركیا راگه‌هاند كو ئه‌مریكا و وه‌لاتێن دی یێن ئه‌ندامێن ناتۆ پرانیا هێزێن خوه ژ ئه‌فغانستانێ ڤه‌كێشاینه، لێ ئه‌ردۆگان دبێژیت ئه‌و به‌رهه‌ڤن فرۆكه‌خانه و چه‌ندین جهێن دی یێن ستراتیژی ل ئه‌فغانستانێ ب پارێزن و به‌رهه‌ڤن هێزێن زێده‌تر ره‌وانه‌ی ئه‌فغانستانێ بكه‌ن، ئه‌رێ كه‌س نینه بێژیته ئه‌ردۆگانی كا چ كارێ توركیا ل ئه‌فغانستانێ هه‌یه؟ توركیا ب هزاران ئاریشێن خوه هه‌نه و چو به‌رنامێ ده‌ستهه‌لاتێ بۆ چاره‌سه‌ریێ نینن.
ناڤهاتی ئه‌و یه‌ك ژی دیار كر كو نها د رۆژه‌ڤا ئه‌ردۆگانی و حوكمه‌تا وی دا تنێ شه‌ر و كوشتن هه‌نه، رۆژه‌كێ ئه‌ردۆگان به‌حسێ هندێ ناكه‌ت كا دێ چاوا قه‌یرانا ئابووریێ هێته چاره‌سه‌ر كرن، به‌حسێ هندێ ناكه‌ت كا دێ چاوا پرسا كوردی و پرسێن دی یێن توركیا هێنه چاره‌سه‌ركرن، تنێ به‌حسێ كوشتن و ژناڤبرنێ دكه‌ت، ئه‌رێ كه‌س وه‌لاتان وه‌سا برێڤه دبه‌ت؟ بێگومان ئه‌ردۆگانی توركیا تووشی مه‌زنترین قه‌یران د دیرۆكێ دا كریه و رۆژ ب رۆژێ ره‌وشا ناڤخوه‌یی یا توركیا خرابتر لێ دهێت و گۆت: (هنده‌ك كه‌س دبێژن بۆچی ره‌وشه‌نبیر ده‌نگێ خوه ناكه‌ن؟ ئه‌رێ كا ره‌وشه‌نبیر ماینه؟ ده‌ستهه‌لاتێ هه‌موو ره‌وشه‌نبیر و نڤیسه‌ر كرنه زیندانان و رێ ناده‌ت كه‌س تشته‌كێ ل دژی ده‌ستهه‌لاتێ بنڤیسیت، هێزێن ئۆپۆزسیۆنێ ژی ل دووڤ هندێ كه‌فتنه كا دێ چاوا شێن د هه‌لبژارتنێن داهاتی دا كورسیێن خوه زێده بكه‌ن و ئاریشێن نها یێن خه‌لكی د خه‌ما وان دا نینن، ژ به‌ر هندێ ژی ئه‌ز دبێژم ره‌وشا نها یا توركیا گه‌له‌ك خرابه و مخابن سازیێن جڤاكێ سڤیل ژی وه‌كو به‌رێ نه‌شێن ده‌ست ب خوه‌نیشادانان ل دژی حوكمه‌تێ بكه‌ن چونكو ئه‌ردۆگانی ب رێیێن قانوونی ئاسته‌نگی بۆ وان دروست كرینه).
ناڤهاتی د به‌رده‌وامیا ئاخڤتنا خوه دا ئاماژه ب هندێ كر كو د ده‌ستێ ئه‌ردۆگانی دا چو تشته‌ك نه‌مایه، قه‌یرانا ئابووری گه‌له‌ك مه‌زنتر لێ هاتیه و نها تنێ له‌شكر ماینه، ڤێجا هێزێن توركیا چوونه لیبیا، سووریێ، عیراقێ و نها ژی دڤێت هێزێن توركیا بچنه ئه‌فغانستانێ، بلا ئه‌ردۆگان بۆ رایا گشتی یا توركیا ئاشكرا بكه‌ت كا هه‌تا نها چو ئه‌نجامه‌ك ژ شه‌رێ ل سووریێ و لیبیا بده‌ستڤه ئینایه؟ پارێن مه‌زن ل وان وه‌لاتان هاتنه مه‌زاختن و چو به‌رنامه بۆ چاره‌سه‌ریا ئاریشێن ناڤخوه‌یی ل توركیا ژی نینن، ژ به‌ر هندێ ژی ئه‌ز دبێژم هه‌كه ئه‌ردۆگان بۆ چه‌ند سالێن دی ژی ل سه‌ر ده‌ستهه‌لاتێ بیت دێ توركیا تووشی كاره‌ساتێن گه‌له‌ك مه‌زن هێت.
نڤیسه‌رێ ناڤدارێ توركیا د دووماهیا ئاخڤتنا خوه دا ئاماژه ب هندێ ژی كر كو د هه‌ڤدیتنا بایدن و ئه‌ردۆگانی دا سه‌رۆكێ ئه‌مریكا ب ره‌نگه‌كێ ئاشكرا هۆشداری دایه ئه‌ردۆگانی ئه‌و رێ ناده‌ت ئێدی توركیا هێرشی باكورێ سووریێ و كوردان بكه‌ت، ژ به‌ر هندێ ژی نها ئه‌ردۆگان به‌حسێ باكورێ سووریێ ناكه‌ت و ئۆپه‌راسیۆنێن توركیا ل هه‌رێما كوردستانێ به‌رده‌وامن و گۆت: (ئه‌ردۆگان و هه‌ڤالێن نێزیكی وی رێ بۆ گه‌نده‌لیێ خوه‌ش كرینه، كه‌سێن نێزیكی ئه‌ردۆگانی گه‌له‌ك پارێن توركیا برینه ده‌رڤه و ده‌ستێ وان د گه‌له‌ك كارێن ڤه‌شارتی و خراب دا هه‌نه، لێ مخابن دادگه‌ه ژی كه‌فتنه ژێر كۆنترۆلا ئه‌ردۆگانی و نه‌شێن راستیان بۆ رایا گشتی ئاشكرا بكه‌ن).
