ئه‌ڤرۆ ئه‌زموونێن قووناغا 12 ئاماده‌یی دێ هێنه ئه‌نجامدان
ئه‌ڤرۆ، زنار تۆڤی:
ئه‌زموونێن گشتی یێن قووناغا 12 ئاماده‌یی ل سه‌رانسه‌ری هه‌رێما كوردستانێ ئه‌ڤرۆ 25/7/2021 دێ هێنه ئه‌نجامدان و ل سنوورێ پارێزگه‌ها دهۆكێ ژی 38 هزار و 123 قوتابی دێ پشكداریێ د وان ئه‌زموونان دا كه‌ن.
ئه‌حمه‌د عه‌بدوللا زۆبێر، په‌یڤدارێ رێڤه‌به‌ریا گشتی یا په‌روه‌ردێ ل پارێزگه‌ها دهۆكێ بۆ رۆژناما ئه‌ڤرۆ دیار كر، ئه‌ڤرۆ ل ده‌مژمێر 7:30 سپێدێ ئه‌زموونێن گشتی یێن قووناغا 12 ئاماده‌یی ب هه‌موو پشكێن خوه‌ڤه “زانستی، وێژه‌یی، پیشه‌یی و خواندنا ئیسلامی” دێ هێنه ئه‌نجامدان، ل سنوورێ پارێزگه‌ها دهۆكێ دێ 38 هزار و 123 قۆتابی پشكداریێ د ئه‌زموونێن قووناغا 12 ئاماده‌یی دا كه‌ن و ئه‌و قۆتابی ل سه‌ر 696 بنگه‌هێن ئه‌زموونان ل سه‌رانسه‌ری پارێزگه‌هێ هاتینه به‌لاڤكرن.
ناڤهاتی گۆت: “ژ به‌ر ره‌وشا ئێمناهیێ ل قه‌زا شنگالێ بڕیار هاتیه‌دان 657 قۆتابیێن قه‌زا شنگالێ ل دهۆكێ ئه‌زموونێن خوه ئه‌نجام بده‌ن، سه‌رۆكێ حكومه‌تا هه‌رێما كوردستانێ ژی 73 ملیۆن و 100 هزار دینار بۆ هاتنوچوونا وان قۆتابیان مه‌زاختینه، داكو بشێن ئه‌زموونێن خوه ب ره‌نگه‌كێ باش ئه‌نجام بده‌ن”.
ئه‌حمه‌دی ئه‌و ژی دیار كر، پێخه‌مه‌ت سه‌رخستنا ئه‌ڤان ئه‌زموونان، ئه‌ڤ ساله وه‌زاره‌تا په‌روه‌ردێ هه‌ماهه‌نگیه‌كا باش ل گه‌ل وه‌زاره‌تێن ناڤخوه و گه‌هاندن و ساخله‌می و كاره‌بێ كریه، دیسا ل ده‌مێ ئه‌نجامدانا ئه‌زموونان دێ هێلێن ئنترنێتێ هێنه بڕین و ئامیرێن هینكرنێ ژی ل هۆلێن ئه‌زموونان هاتینه دانان، هه‌روه‌سا كاره‌با گشتی ژی ل وی ده‌می دێ یا باش بیت و لژنا كاره‌با موه‌لیدێن ئه‌هلی ژی هێلێن كاره‌بێ بۆ هه‌موو هۆلێن ئه‌زموونان راكێشاینه.
په‌یڤدارێ رێڤه‌به‌ریا گشتی یا په‌روه‌ردێ ل پارێزگه‌ها دهۆكێ ئه‌و ژی گۆت: “ل هۆلێن ئه‌زموونان هه‌موو رێكارێن خوه‌پارێزیێ دێ هێنه بجهئینان، پێخه‌مه‌ت هه‌موو مامۆستا و قۆتابی ب سلامه‌تی ژ ئه‌ڤان ئه‌زموونان ده‌رباز ببن، هه‌روه‌سا دڤێت ئه‌م هه‌موو هاریكاریا قۆتابیان بكه‌ین و ده‌روونێ وان ئارام بكه‌ین، داكو بشێن ب ره‌نگه‌كێ سه‌ركه‌فتیانه ئه‌زموونان ئه‌نجام بده‌ن”.
