ئیران داخوازا دكه‌ت بله‌ز پارتێن رۆژهه‌لات ژ ئاخا هه‌رێما كوردستانێ بهێنه ده‌رخستن
ئه‌ڤرۆ:
سكرتێرێ جڤاتا ئاسایشا نشتیمانی یا ئیرانێ پشتی دیدارا ل گه‌ل مسته‌فا كازمی سه‌رۆك وه‌زیرێن ئیراقێ راگه‌هاند كو دڤێت بله‌ز پارتێن رۆژهه‌لات بهێنه بێ چه‌ك كرن و ژ ئاخا هه‌رێما كوردستانێ بهێنه ده‌رخستن.
عه‌لی شه‌مخانی سكرتێرێ جڤاتا ئاسایشا نشتیمانی یا ئیرانێ پشتی هه‌ڤدیتنا دگه‌ل مسته‌فا كازمی سه‌رۆك وه‌زیرێن ئیراقێ بۆ ده‌زگه‌هێن راگه‌هاندنێ دیار كر كو هنده‌ك گرۆپێن تیرۆرستی ئاخا هه‌رێما كوردستانێ ل دژی ئیرانێ بكار دئینن و بزاڤێن وان یێن ڤێ دووماهیێ ژی مه‌ترسیێ بۆ ئیرانێ دروست دكه‌ن، ژ به‌ر هندێ ژی دڤێت ئیراق ب ئه‌ركێ خوه رابیت و بله‌ز وان گرۆپان بێ چه‌ك بكه‌ت و هه‌روه‌سا دڤێت ئه‌و گرۆپێن تیرۆرستی ژ ئاخا هه‌رێما كوردستانێ بهێنه ده‌رخستن.
سكرتێرێ جڤاتا ئاسایشا نشتیمانی یا ئیرانێ هه‌روه‌سا دیار كر كو دڤێت ئیراق ب ئه‌ركێ خوه رابیت و سنۆرێ خوه ل هه‌مبه‌ر بزاڤێن گرۆپێن تێكده‌ر بپارێزیت، چونكو ل سه‌ر سنۆران ئاریشه بۆ ئیرانێ دروست دبن و ژ به‌ر هندێ ژی دڤێت ئیراق بله‌ز وان گرۆپان بێ چه‌ك بكه‌ت و ئاخا خوه ده‌رخینیت.
چاڤدێرێن سیاسی یێ رۆژهه‌لاتێ كوردستانێ ژی دیار دكه‌ن كو به‌ری نها ئیرانێ شیا ب رێیا گرۆپێن شیعه ل به‌غدا چه‌ندین جاران ئێرشی كه‌مپێن موجاهدینێ خه‌لق بكه‌ن كو د ئه‌نجام دا ئیراقێ ئه‌و هێزا چه‌كدار ژ ئاخا خوه ده‌رخست و نها ئیرانێ دڤێت هه‌مان سیناریۆیێ ل دژی پارتێن رۆژهه‌لاتێ كوردستانێ ژی دوباره بكه‌ت، ژ به‌ر هندێ ژی ئیرانێ د ماوه‌یێ چه‌ند رۆژێن بۆری دا ده‌ست ب ئێرشێن نوو كریه، ئیران چه‌ند رۆژن دڤه‌رێن سنۆری یێن هه‌رێما كوردستانێ تۆپباران دكه‌ت و هه‌روه‌سا ئێرشا ل سه‌ر فرۆكه‌خانا هه‌ولێرێ ژی هه‌ر بۆ هندێ یه دا هه‌رێما كوردستانێ پتر ته‌نگاڤ ببیت.
ل گۆر باوه‌ریا چاڤدێرێن سیاسی ئیرانێ دڤێت پشتی ده‌ركه‌فتنا هێزێن ئه‌مریكا ل هه‌موو ئیراقێ و هه‌رێما كوردستانێ پێگه‌هه‌كێ خوه یێ بهێز هه‌بیت و ژ به‌ر هندێ ژی نها فشارێن خوه ل سه‌ر ئیراقێ و هه‌رێما كوردستانێ زێده‌تر لێ كریه دا ئه‌و نه‌چار بن پارتێن رۆژهه‌لاتێ كوردستانێ ژ ئاخا هه‌رێما كوردستانێ ده‌ربخینن.
ئه‌و یه‌ك د ده‌مه‌كێ دایه كو حه‌فتیا بۆری ناڤه‌ندا هه‌ڤكاریا پارتێن رۆژهه‌لاتێ كوردستانێ ژی راگه‌هاند كو ئیران ل به‌هانێن نوو دگه‌ریت، چونكو پارتێن رۆژهه‌لاتێ كوردستانێ ب سالانه رێز ل سه‌روه‌ریا هه‌رێما كوردستانێ گرتینه و ئاریشه بۆ هه‌رێما كوردستانێ دروست نه‌كرینه، لێ نها ئیرانێ بابه‌تێ هه‌بوونا پارتێن رۆژهه‌لاتێ كوردستانێ كریه به‌هانه و دخوازیت هه‌رێمێ پتر ته‌نگاڤ بكه‌ت.
ناڤه‌ندا هه‌ڤكاریا پارتێن رۆژهه‌لاتێ كوردستانێ هه‌روه‌سا ئه‌و یه‌ك ژی دیار كر كو ب هزاران وه‌لاتیێن سڤیل یێن رۆژهه‌لاتێ كوردستانێ ل كه‌مپان بجه بووینه و ئه‌و ژی ژ به‌ر زۆرداریا ئیرانێ ره‌ڤینه و چو جاران ژی نه‌بووینه مه‌ترسی، لێ نها ئیرانێ دڤێت ب به‌هانه‌كا دی ئێرشی كه‌مپێن وان ل ئاخا هه‌رێما كوردستانێ بكه‌ت.
هه‌ژی ئاماژه‌پێدانێ یه كو چه‌ندین كه‌مپێن پارتێن رۆژهه‌لاتێ كوردستانێ ل هه‌رێما كوردستانێ هه‌نه و د ماوه‌یێ چه‌ند سالێن بۆری دا ئیرانێ چه‌ندین جاران ئێرشی وان كه‌مپان كریه كو د ئه‌نجام دا گه‌له‌ك ژ ئه‌ندامێن وان پارتێن رۆژهه‌لاتێ كوردستانێ شه‌هید بووینه و نها ژی ئیرانێ دڤێت چو هێزێن سیاسی یێن رۆژهه‌لاتێ كوردستانێ ل ئاخا هه‌رێما كوردستانێ نه‌مینن و ده‌مه‌كه ژی به‌رپرسێن سه‌ربازی یێن ئیرانێ گه‌فا هندێ دكه‌ن كو دێ ئێرشی پارتێن رۆژهه‌لاتێ كوردستانێ ل ئاخا هه‌رێما كوردستانێ كه‌ن.
