مه‌سرور بارزانی: ل هه‌موو قۆناغان مه بزاڤ كریه وان سۆزا بده‌ین خه‌لكی كو بشێین بجهبینین
ئه‌ڤرۆ:
هیڤیدارم د هه‌وا هه‌لبژارتنان دا ل شوینا هه‌ڤدوو شكاندنێ، بزاڤ بهێته كرن هه‌ر ئێك به‌رنامێ خوه پێشكێشی خه‌لكێ كوردستانێ بكه‌ت، كا چاوان دێ شێت باشتر خزمه‌تێ كه‌ت
سه‌رۆكێ حوكمه‌تا هه‌رێما كوردستانێ، مه‌سرور بارزانی، دوهی سێشه‌مبی 14/9/2021 ل رێوره‌سمێن راگه‌هاندنا ئیدارا سه‌ربخوه ل سۆران راگه‌هاند، ل ده‌ڤه‌را سۆران قۆناغه‌كا نوو دێ ده‌ستپێكه‌ت و پاشه‌رۆژه‌كا گه‌شتر چاڤه‌رێی خه‌لكێ ده‌ڤه‌رێ دكه‌ت.
ده‌قێ گۆتارا مه‌سرور بارزانی..
خوه‌شحالم ل ڤێرێ ل گه‌ل هه‌وه یێ به‌رهه‌ڤم، بۆ راگه‌هاندنا ئیدارا سه‌ربخوه ل سۆران، كو ژ هه‌ر چار قه‌زایێن سۆران، رواندز، چۆمان و مێرگه‌سۆر پێك دهێت، خه‌لكێ ده‌ڤه‌رێن سۆران و باله‌كایه‌تی و برادۆست و بارزان، كو ئاكنجیێن ڤێ ده‌ڤه‌را خه‌باتكه‌رن، سه‌ره‌رای وان هه‌موو قوربانی و زه‌حمه‌ت و ئازارێن دیتین، ئه‌ڤرۆ دبینن كو مه وه‌كو وه‌فاداریه‌ك بۆ خه‌بات و تێكوشانا وان یێن هاتینه خزمه‌تا وان بۆ راگه‌هاندنا ئیدارا سه‌ربخوه ل ڤێ ده‌ڤه‌رێ.
ئه‌ڤرۆ، رۆژه‌كا دیرۆكی یه ، رۆژا بجهئینانا سۆزا سه‌رۆك بارزانی یه بۆ ڤێ ده‌ڤه‌رێ، رۆژا وه‌فاداریێ یه به‌رامبه‌ر خوینا شه‌هیدێن مه و قوربانیێن پێشمه‌رگێن مه یێن قه‌هره‌مان، رۆژا نیشادانا سۆز و وه‌فا و پێزانین و رێزلێنانێ یه ل خه‌بات و تێكوشانا خه‌لكێ ڤێ ده‌ڤه‌رێ، جاره‌كادی پیرۆزباهیێ ل هه‌وه دكه‌م و ل هه‌وه پیرۆز بیت.
ل جهێ خوه‌یه سه‌رێ رێز و نه‌وازشێ بۆ مالباتێن سه‌ربلندێن شه‌هیدان نوو بكه‌ین پێزانێنا خوه بۆ پێشمه‌رگێن قه‌هره‌مان پێشكێش بكه‌ین.
ئه‌ڤرۆ ب راگه‌هاندنا ئیدارا سه‌ربخوه یا سۆران و ده‌ستبكاربوونا سه‌رپه‌رشتیارێ ڤێ ده‌ڤه‌رێ قۆناغه‌كا نوو ده‌ستپێدكه‌ت، ئه‌ڤ ده‌ڤره هه‌ر ژ ده‌ستپێكا بزاڤا رزگاریخوازا گه‌لێ مه و هه‌تا نوكه، بنكه و پشته‌ڤانا هه‌موو شۆره‌شێن ئێك ل دووڤ ئێكێن نیشتمان و گه‌لێ مه بوو، قۆناغه‌كا نوو ده‌ستپێدكه‌ت و پاشه‌رۆژه‌كا گه‌شتر چاڤه‌رێی هه‌وه دكه‌ت. ئه‌ڤ ده‌ڤه‌ره یا زه‌نگینه ب سروشته‌كێ دلگیر و سه‌رنجراكێش، ب خه‌لكه‌كێ قه‌هره‌مان و خه‌باتكه‌ر، ب خه‌باته‌كا دوور و درێژ ودیرۆكی.
مه دیت كو ب سه‌دان و هزاران شه‌هید ل ڤێ ده‌ڤه‌رێ بۆ ئازادیا كوردستانێ و پاراستنا ئه‌زموونا كوردستانێ خوه كر قوربانی، هه‌ر چ یا بهێته كرن بۆ ڤێ ده‌ڤه‌رێ یا كێمه، ئه‌وا د شیانێن مه دا بیت ل حوكمه‌تێ دێ به‌رده‌وام بین د پشته‌ڤانیكرنا وێ ئیدارا سه‌ربخوه كو بشێت خزمه‌ته‌كا زێده‌تر پێشكێشی وه‌لاتیان بكه‌ت، روتینێ كێم بكه‌ت، هاتنوچوونێ د ناڤبه‌را ده‌ڤه‌ران دا كێم بكه‌ت و پتریا كاران هه‌ر ل ڤێ ده‌ڤه‌رێ بهێنه ب رێڤه‌برن، فشاره‌كا زۆر ژی ل سه‌ر هه‌ولێرێ كێم بكه‌ت، پێكڤه دشێین وه‌لاته‌كێ ئاڤه‌دانتر و سه‌قامگیرتر ئاڤا بكه‌ین.
ئه‌م دزانین كو گه‌له‌ك ژ وان ده‌ڤه‌رێن كو د دلگیر و سه‌رنجراكێشن، ب تایبه‌تی ژی ل ده‌ڤه‌رێن سنووری، هێشتا دبن كارتێكرنا بابه‌تێن ئه‌منی و سه‌قامگیریێ دانه، به‌لێ ل حوكمه‌تێ دێ هه‌موو بزاڤان كه‌ین بۆ وێ چه‌ندێ جاره‌كادی ئارامی و سه‌قامگیری بۆ ڤه‌گه‌ریت و بێخینه د خزمه‌تا خه‌لكێ ڤێ ده‌ڤه‌رێ و هه‌موو كوردستانێ دا، چونكه یێ پشت راستم ئه‌ڤ ده‌ڤه‌ره د بێ وێنه‌نه و ژ روویێ گه‌شتیاری دشێن هاریكارێن ئێكجار زۆر یێ خه‌لكێ ڤێ ده‌ڤه‌رێ و هه‌موو كوردستانێ بن، ئه‌م ده‌ڤه‌ره یا زه‌نگینه ب كانزایێن سروشتی، ئه‌م دشێین هاریكار و پشته‌ڤان بین ژ بۆ پێشخستنا كه‌رتێ پیشه‌سازی و كه‌رتێ چاندنێ و كه‌رتێ گه‌شتوگوزارێ ل ڤێ ده‌ڤه‌رێ.
ئه‌ڤرۆ كو ئه‌م د هه‌یڤا ئیلۆنێ داینه، ئه‌و هه‌یڤه‌یه كو مه‌زنترین شۆره‌شا ئازادیخوازا گه‌لێ مه تێدا ده‌ستبكاربووی، ئه‌ڤرۆ دێ رۆژه‌كا دیرۆكی بیت و ده‌ستپێكه‌كا دیرۆكی بیت، بۆ وێ چه‌ندێ ژ روویێ ئیداری ژی ڤه ئه‌ڤ ده‌ڤه‌ره پێشكه‌فتنا به‌رچاڤ ب خوه‌ڤه بگریت، هیڤیدارم ل پاشه‌رۆژێ دا رێڤه‌به‌رێن ڤێ ده‌ڤه‌رێ ل هه‌ر چار قه‌زایان، بشێن خزمه‌ته‌كا زێده‌تر یا وه‌لاتیان بكه‌ن، قانوونێ بجهبینن، پرۆسا چاكسازیێ وه‌كو د كابینا حوكمه‌تێ دا هاتی وه‌كو خوه بجهبینن، روو ب روویێ هه‌موو وان سه‌رپێچیان ببن كو ل ڤێ ده‌ڤه‌رێ ژی دبیت وه‌كو هه‌موو ده‌ڤه‌رێن دی هاتبنه ئه‌نجامدان، د پشت راست بن ئه‌م ل كابینا حوكمه‌تێ ب هه‌موو شێوه‌كی دێ پشته‌ڤانێن هه‌وه بین بۆ بجهئینانا قانوونا چاكسازیێ، بۆ ده‌سته‌به‌ركرنا پاشه‌رۆژه‌كا گه‌شتر بۆ هه‌وه و بۆ نه‌ڤیێن داهاتی.
ئارمانجا مه گه‌له‌ك ژ وێ چه‌ندێ زێده‌تره تنێ بشێین ئیدارا خوه بكه‌ین، ئه‌و ده‌ڤه‌را دلگیر و خوه‌ش یا هوون دبینن، دشیان دایه ببیته ده‌ڤه‌ره‌كا گه‌شتیاری نه تنێ بۆ هه‌رێما كوردستانێ و ئیراقێ، به‌لكو بۆ هه‌موو ده‌ڤه‌رێ و ژ جیهانێ ژی خه‌لك بشێن سه‌ره‌دانا ڤێرێ بكه‌ن، ئه‌م دخوازین ژ هه‌موو روویه‌كی ڤه خوه پێبگه‌هینین، ژ روویێ په‌روه‌رده‌یی ڤه كاره‌كێ وه‌سا بكه‌ین كو نه‌ڤیێ داهاتی یێ مه خوه زه‌نگین بكه‌ت ب زانستی، ب په‌روه‌رده‌كا باش، بۆ وێ چه‌ندێ بشێین پاشه‌رۆژه‌كا گه‌شتر و ئاڤه‌دانیه‌كا زێده‌تر پێشكێشی وه‌لاتیان بكه‌ین، قۆناغا سوباهی ژ ئه‌ڤرۆ ده‌ستپێدكه‌ت، پێدڤیه ئه‌م هه‌موو بزاڤه‌كێ بكه‌ین ده‌ستێ خوه بكه‌ینه دناڤ ده‌ستدا بۆ وێ چه‌ندێ خزمه‌تا خه‌لك و وه‌لاتێ خوه بكه‌ین.
مه سۆزا وێ چه‌ندێ دایه كو ده‌ستهه‌لاتێ شۆر بكه‌ین بۆ ئیدارێن سه‌ربخوه و پارێزگه‌هان، ژ ئه‌ڤرۆ ژی كو دبینین مه ئه‌و گاڤه یێن ده‌ستپێكرین و یێن كه‌فتینه كار، هیڤیدارین كو به‌رپرسێن به‌رێز ژی ل وی ئاستی بشێن زێده‌تر خزمه‌تا وه‌لاتیان بكه‌ن و ئه‌وا هه‌ژی وه‌لاتیانه بجهبینن.
به‌رێزان.. هه‌روه‌كو هوون دزانن ئه‌م نوكه یێن د هه‌وا هه‌لبژارتنان دا، كو هه‌لبژارتنێن جڤاتا نوونه‌رێن ئیراقێ یه، ئه‌ڤ هه‌وه پێدڤیه بۆ وێ ئێكێ بیت بشێین باشترین نوونه‌ر كو داكۆكیێ ژ مافێن خه‌لكێ كوردستانێ بكه‌ت ره‌وانه‌ی به‌غدا بكه‌ین، بۆ وێ چه‌ندێ ل وێرێ پشته‌ڤان بیت بۆ ده‌سته‌به‌ركرنا هه‌موو مافێن خه‌لكێ مه، ئه‌و نوونه‌رێن كو دهێنه ده‌ستنیشانكرن، پێدڤیه بێ جوداهی نوونه‌رایه‌تیا هه‌موو خه‌لكێ كوردستانێ بكه‌ن، هیڤیدارم د هه‌وا هه‌لبژارتنان دا ل شوینا په‌لاماردانا هه‌ڤدوو، ل شوینا هه‌ڤدوو شكاندنێ، بزاڤ بهێته كرن هه‌ر ئێك به‌رنامێ خوه پێشكێشی خه‌لكێ كوردستانێ بكه‌ت، كا چاوان دێ شێت باشتر خزمه‌تا خه‌لكێ كوردستانێ كه‌ت، ئه‌وێ هیچ پێ چێنه‌بیت پێشكێش بكه‌ت، ب په‌لاماردانا لایه‌نێن دی نه‌شێت خزمه‌تێ بكه‌ت، شیانێن بجهئینانا وان سۆزا ژی نابیت كو ئه‌و ب خوه به‌رنامێ چاكسازیێ و پێشخستنێ و خزمه‌تكرنا وه‌لاتیان پێشكێش نه‌كه‌ت.
ل هه‌موو قۆناغان مه بزاڤ كریه وان سۆزا ب خه‌لكی بده‌ین كو بشێین بجهبینین، داخوازێ ژ هه‌موو لایه‌نێن سیاسی و به‌ربژاران دكه‌م بزاڤێ بكه‌ن هه‌ڤركیێ ل سه‌ر چاوانیا خزمه‌تكرنا وه‌لاتی و خه‌لكێ وی بكه‌ن.
