مه‌سرور بارزانی ئیدارا سه‌ربخوه یا زاخۆ رادگه‌هینیت
ئه‌ڤرۆ:
سه‌رۆكێ حوكمه‌تا هه‌رێما كوردستانێ، مه‌سرور بارزانی، د چارچۆڤێ پشكداریێ د راگه‌هاندنا ئیدارا سه‌ربخوه یا زاخۆ دوهی دوشه‌مبی 20/9/2021، گۆتاره‌ك پێشكێش كر و راگه‌هاند” ڤێجارێ یێ هاتیمه ڤێری تاكو دلێ سه‌رۆك بارزانی خوه‌ش بكه‌ین، پێشتر سه‌رۆك بارزانی سۆزا وێ چه‌ندێ دابوو ئیدارا سه‌ربخوه یا زاخۆ بهێته راگه‌هاندن، ئه‌ڤرۆ ئه‌م بۆ وێ ئێكێ ل ڤێرێ نه سۆزا سه‌رۆكی بجهبینین و ئیدارا سه‌ربخوه یا زاخۆ رابگه‌هینین و سه‌رپه‌رشتێ ئیدارا زاخۆ ده‌ستنیشان بكه‌ین”.
گۆت ژی” ئیدارا سه‌ربخوه یا زاخۆ ل هه‌وه هه‌موویان پیرۆز بیت، هیڤیدارم ئیداره‌كا خزمه‌تگوزار بۆ مالباتێن شه‌هیدان و پێشمه‌رگه‌ی و هه‌موو خه‌لكێ ده‌ڤه‌رێ بیت، بۆ وێ ئێكێ بشێین خزمه‌تا هه‌وه‌یێن خوه‌شتڤی بكه‌ین”.
هه‌روه‌سا گۆت” شه‌هیدێن زاخۆ ل هه‌موو ئاخا كوردستانێ خوینا خوه یا رشتی، بۆ ئازادكرنا كوردستانێ و پاراستنا ئه‌زموونا وێ، له‌وما ئه‌م هه‌موو قه‌ردارێن خه‌لكێ زاخۆینه، ئه‌و ئیدارا سه‌ربخوه یا زاخۆ ژی وه‌كو وه‌فایه‌ك بۆ زه‌حمه‌تا هه‌موویان و خوینا شه‌هیدانه”.
ئاماژه‌كر” زاخۆ ده‌ڤه‌ره‌كا مه‌زنه، دبیت هنده‌ك زه‌حمه‌تێ تێدا هه‌بوو بزڤرن بۆ دهۆكێ بۆ ب رێڤه‌برنا كارێن ئیداری، شۆركرنا ده‌ستهه‌لاتێ یان راگه‌هاندنا ئیدارا سه‌ربخوه یا زاخۆ بۆ وێ چه‌ندێ یه ئاسانكاریێن زێده‌تر بۆ خه‌لكێ ده‌ڤه‌را زاخۆ بهێنه كرن، خه‌لكه‌كێ خه‌باتكه‌ر یێ لێ هه‌ی، د هه‌مان ده‌م دا ئێكه ژ ده‌روازێن سه‌ره‌كی یێن هه‌رێما كوردستانێ”.
خویاكر” ده‌مێ ل سالا بۆری هاتیمه ڤێرێ، هه‌وه داخوازا چه‌ند پرۆژان كربوو، چونكه دیاربوو گه‌له‌ك كێماسی د گه‌هاندنا خزمه‌تگوزاریان دا هه‌بوون، مه رازیبوون ل سه‌ر وان هه‌موو پرۆژێن داخوازكری دابوو، گه‌له‌ك ژ وان پرۆژان یێن هاتینه بجهئینان و یێن دی ژی دێ هێنه بجهئینان”.
زێده‌تر گۆت” پێدڤیه مافێ خه‌لكێ زاخۆ بۆ خه‌لكێ زاخۆ ڤه‌گه‌ریت، داهاتێ هه‌رێما كوردستانێ ب شێوه‌كێ یه‌كسان ب سه‌ر هه‌موو وه‌لاتیێن هه‌رێما كوردستانێ بهێته به‌لاڤكرن، وه‌كو دیار مافێ خه‌لكێ زاخۆ وه‌كو خوه نه‌هاتیه دان، ژبه‌ر وێ چه‌ندێ یا ئه‌م بشێین بكه‌ین ئه‌وه مافێ ڤی خه‌لكی ڤه‌گه‌رینین و خزمه‌تگوزاریێن پێدڤی بجهبینین، داخوازێ ژ ئیدارا نوو یا زاخۆ دكه‌م ب هه‌موو جۆره‌كێ خزمه‌تا خه‌لكێ خوه بكه‌ت، ئه‌و كه‌سێ وه‌كو سه‌رپه‌رشتیار و به‌رپرس هاتیه دیاركرن، بۆ وێ ئێكێ نینه ئیمتیازاتان وه‌ربگریت، به‌لكو دا خزمه‌تا زێده‌تر یا خه‌لكی بكه‌ت”.
مه‌سرور بارزانی گۆت ژی” ده‌ڤه‌را زاخۆ ژ روویێ گه‌شتوگوزاری ڤه ده‌ڤه‌ره‌كا جوان و خوه‌شه، به‌لێ مخابن ژبه‌ر هه‌بوونا pkk خه‌لكێ گوندان نه‌شێن بزڤرنه گوندێن خوه، داخوازا مه ژ هه‌موویان ئه‌وه سه‌روه‌ریا ئاخا مه بپارێزن، ئه‌ڤ ئاخه ب خوینێ هاتیه ئازادكرن، نابیت ئه‌ڤرۆ هیچ كه‌سه‌ك مافی بده‌ته خوه ده‌ستدرێژیێ بكه‌ته سه‌ر ڤێ ئاخێ، هیڤیدارم ئه‌و ده‌ڤه‌ره ره‌وشه‌كا ئارام بخوه‌ڤه ببینن، ئه‌وا دشیانێن مه دابیت ژی خه‌مساریێ ناكه‌ین و وه‌كو حوكمه‌ت ئه‌وا ژده‌ستێ مه دهێت دێ ئه‌نجام ده‌ین بۆ وێ چه‌ندێ ئه‌و خه‌لكه د ئارامیێ دا بژیت و بزڤریت سه‌ر مال و حالێن خوه”.
د لایه‌كێ دی یێ گوتارا خوه دا گۆت” هه‌لبژارتنێن په‌رله‌مانێ ئیراقێ د چاره‌نڤیسسازن، چونكه بریار ژ په‌رله‌مانی دهێنه دان و كاریگه‌ری و گرنگی ل سه‌ر ره‌وشا هه‌رێمێ ژی یا هه‌ی، ئه‌و نوونه‌رێن دێ هێنه هه‌لبژارتن بۆ په‌رله‌مانێ ئیراقێ كو نوونه‌راتیا هه‌رێمێ دكه‌ن، پێدڤیه به‌رگریێ ژ مافێ دستووریێ خه‌لكێ كوردستانێ بكه‌ن، له‌وما داخوازێ ژ هه‌موو خوه‌شك و برا دكه‌م بچن ده‌نگێ خوه بده‌ن و هه‌كه هوون پشكداریێ نه‌كه‌ن، دێ خه‌لكه‌كێ دی ل شوینا هه‌وه ده‌نگی ده‌ت و دبیت كه‌سه‌كی هه‌لبژێریت ب هیچ شێوه‌كی د خزمه‌تا هه‌وه دا نه‌بیت، هیڤیدارم پشكداریێ د هه‌لبژارتنان دا بكه‌ن و ده‌نگی بده‌نه وی كه‌سێ دشێت به‌رگریێ ژ هه‌وه بكه‌ت”.
گۆت ژی” گه‌له‌ك كه‌س یێن هه‌ین وه‌كو خه‌مخورێن خه‌لكێ كوردستانێ خوه نیشان دده‌ن، به‌لێ ده‌مێ لێقه‌ومینێ مه ئه‌و نه‌دیتن، ده‌مێ پێدڤی دكر بچنه سه‌نگه‌رێ به‌رگریێ و خوه بكه‌نه قوربانی بۆ پاراستنا ئه‌زموونا ملله‌تێ مه، مه ئه‌و نه‌دیتن، ل كیرێ بوون؟ ده‌مێ هوون ده‌نگی دده‌ن هزر د وێ چه‌ندێ دا بكه‌ن هه‌كه سوباهی كوردستان كه‌فته ژێر گه‌ف و ئاسته‌نگان، كی دێ هه‌وه پارێزیت، كی یێ به‌رهه‌ڤه خوه بكه‌ته قوربانی، باوه‌ریێ بده‌نه وی یێ قوربانی داین و بۆ هه‌وه سه‌لماندی ل ده‌مێ لێقه‌ومینێ ل هێلا به‌راهیێ بوو بۆ پاراستنا سه‌روه‌ریا ڤێ ئاخێ و ملله‌تی، ژبه‌ر وێ چه‌ندێ داخواز دكه‌م وان نوونه‌ران هه‌لبژێرن یێن هه‌وه باوه‌ری پێ هه‌ی كو دێ شێن به‌رگریێ ژ مافێن هه‌وه یێن دستووری كه‌ن و خوه بكه‌ن قوربانی بۆ به‌رژه‌وه‌ندیا ملله‌ت و ئاخا خوه، نه‌كو بچن ل وێرێ بۆ ئیمتیازات و ده‌ستكه‌فتێن كه‌سایه‌تی و حزبی و هه‌موو كوردستانێ بكه‌نه قوربانی خوه، هزر دوێ ئێكێ دا بكه‌ن كو ب ئاخڤتنێن چه‌ند كه‌سان د سه‌ردا نه‌چن، به‌لكو بزانن كێ هێز و شیان هه‌نه بشێت به‌رگریێ ژ هه‌وه بكه‌ت و پێدڤیه ل به‌رچاڤێن هه‌وه بیت و بزانن كا كی یێ وه‌فاداره به‌رامبه‌ر خوینا شه‌هیدێن خوه و ڤێ ئه‌زموونێ و به‌رامبه‌ر مافێ نیشتمانی و نه‌ته‌وی كو هێشتا گه‌له‌ك یا مای بهێنه بده‌ستڤه‌ئینان”.
