رۆسیا و سووریێ ب فرۆكێن شه‌ری ئێرشی عه‌فرینێ و ئدلبێ دكه‌ن
ب، سه‌رجان مه‌حمود:
رۆسیا و رژێما سووریێ رژدن كو عه‌فرینێ، ئدلبێ و بابێ ژ ده‌ستێ كۆمێن تیرۆرست یێن سه‌ر ب توركیا ده‌رخینن و بۆ ڤێ چه‌ندێ وه‌ك قۆناغا ده‌ستپێكێ فرۆكێن شه‌ری یێن رۆسیا و تۆپخانێن سووریێ باژێرێن عه‌فرین، ئدلب و باب بۆمبه‌باران كرن و د ئه‌نجامدا نێزیكی 25 چه‌كدار هاتنه كوشتن و چار سه‌ربازێن تورك ژی بریندار بوون و رۆژ ب رۆژێ ئێرشێن رۆسیا و سووریێ ل سه‌ر عه‌فرینێ، ئدلبێ و بابێ دژوارتر دبن و توركیا ژی هژماره‌ك زێده سه‌رباز و چه‌كێن گران بۆ عه‌فرین و ئدلبێ شاندیه و دهێته چاڤه‌رێ كرن د كۆمبوونا د ناڤبه‌را ڤیلاده‌میر پوتین سه‌رۆكێ رۆسیا و ره‌جه‌ب ته‌یب ئه‌ردۆغان دا ل باژێرێ سۆچی یێ رۆسیا ره‌وشا ئدلب و عه‌فرینێ بهێته گه‌نگه‌شه كرن.
په‌یڤدارێ حوكمه‌تا سووریێ د ڤێ مژارێ دا راگه‌هاند كو ئه‌و رژدن د ئازادكرنا هه‌موو ئاخا سووریێ دا و گۆت: (ل ئدلبێ، عه‌فرینێ و بابێ ب هزاران چه‌كدارێن تیرۆرست ب پشته‌ڤانیا ده‌وله‌تا توركیا بجه بووینه و پرانیا وان ژی نه ژ سووریێ نه و ژ ده‌رڤه هاتینه و رۆژانه كریارێن تیرۆرستی ئه‌نجام دده‌ن و وان دڤێت ئالۆزیان ل هه‌موو وه‌لاتێ مه دروست بكه‌ن و بۆ ڤێ چه‌ندێ ب پشته‌ڤانیا رۆسیا ئه‌م دێ ب هه‌موو هێزا خوه ڤه ئۆپه‌راسیۆنێن ئازادكرنێ برێڤه به‌ین و ناهێلین كۆمێن تیرۆرست وه‌لاتێ مه بكه‌نه مه‌یدانا كریارێن تیرۆرستی و مه به‌ری نها ژی گۆتیه دڤێت هه‌موو هێزێن بیانی ژ ئاخا سووریێ ده‌ركه‌ڤن).
هه‌ر د ڤێ مژارێ دا سیرگێی لاڤرۆڤ وه‌زیرێ ده‌رڤه یێ رۆسیا ژی راگه‌هاند كو توركیا سۆزا خوه یا بۆ ده‌رخستنا تیرۆرستان ژ ئدلبێ بجه نه‌ئینایه و ل عه‌فرینێ و ئدلبێ چه‌كدارێن تیرۆرست بجه بووینه و گۆت: (دڤێت هه‌موو ئالی بزانن كو دێ هه‌موو هێزێن بیانی ژ ئاخا سووریێ ده‌ركه‌ڤن و د هه‌ڤدیتنا سه‌رۆك پوتین و سه‌رۆك كۆمارێ توركیا دا ئه‌ڤ بابه‌ته دێ هێته ئاخڤتن و دێ داخواز ژ توركیا كه‌ین كو هه‌موو هێزێن خوه ژ ئاخا سووریێ ڤه‌كێشیت).
ژ ئالیێ خوه ڤه وه‌زیرێ به‌رگیریێ یێ توركیا ژی راگه‌هاند كو ئه‌و ژ ئێرشێن رۆسیا ل گونده‌وارێن عه‌فرینێ دلگرانن و داخواز ژ رۆسیا كر كو ئێرشێن ئه‌سمانی یێن ل سه‌ر عه‌فرینێ و بابێ بده‌ته راگرتن و دیار كر وان دڤێت ئالۆزیێن ل هه‌رێمێ كێمتر بكه‌ن.
