هه‌لبژارتن و ده‌نگدان!
به‌درخان زاویته‌یى
هه‌لبژارتن شه‌نگستێ دیمۆكراسیێ یه و بنیاتێ هه‌ر پرۆسه‌كا سیاسى ل هه‌ر وه‌لاته‌كى هه‌لبژارتنن و بنیاتێ هه‌لبژارتنا ده‌نگدانه، ئانكو ده‌نگده‌ر بنیاتێ پرۆسا سیاسى یه و شه‌نگستێ دیمۆكراسیێ یه، له‌ورا ل جارنامه‌یا مافێن مرۆڤى یاسالا 1948 و لدویڤ به‌ندێن (2 و 21 و 25) گرانیه‌كا مه‌زن دایه هه‌لبژارتنا و مافێ ده‌نگدانێ و ده‌نگدان وه‌ك مافه‌ك ب قانوون هاتیه پاراستن، داكو ده‌نگده‌ر وى مافى بكاربینیت و پرۆسا سیاسى بگوهۆرینێ، خوه‌ڤه ب شێوه‌كێ دروست برێڤه بچیت و وه‌لاتى پشكدارى پرۆسا سیاسى ببن ب رێیا هه‌لبژارتنان و ده‌نگدانێ.
ئیراقا پشتى سالا 2003 لسه‌ر بنیاته‌كێ دیمۆكراسى و فیدرالى هاتیه دروستكرن و لدویڤ مادێ 20 ژ ده‌ستوورێ هه‌رده‌مێ ئیراقێ و لدویڤ قانوونا هه‌لبژارتنا ژماره 9 یا سالا 2020 ده‌نگدان و خوه به‌ربژێركرن و پشكداریكرن د پرۆسا سیاسى و مافێن قانوونێ ب قانوون هاتینه پاراستن، چونكى ژ ئه‌نجامێ پرۆسا هه‌لبژارتنا په‌رله‌مانه‌كێ نوى و حوكمه‌ته‌كا نوى و پلان و به‌رنامێن نوى دروست دبن و خه‌لك چاڤه‌رێى به‌رهه‌مێ ده‌نگدانا خوه‌یه كو پرۆسه‌كا سیاسى یا ساخله‌م و كابینه‌كا نوى یا حوكمه‌تێ دروست بكه‌ڤنه د خزمه‌تا وه‌لاتیدا.
به‌رى هه‌ر هه‌لبژارتنه‌كێ خه‌لك ڤێ پسیارێ ژ خوه دكه‌ت ئه‌رێ پشكدارى هه‌لبژارتنان ببم یان نه و ده‌نگى بده‌م یان نه و ده‌نگى بده‌مه كێ؟ به‌لێ ده‌مێ پسیار ژ دئێته‌كرن ته په‌رله‌مانه‌كێ چاوا دڤێت، ئێكسه‌ر دبێژیت په‌رله‌مانه‌كێ بهێز من دڤێت كو ب دروستى ب رۆلێ خوه یێ ته‌شریعى و قانووندانان و چاڤه‌ریكرنێ را ببیت و هه‌ر پشكداریكرن د هه‌لبژارتنان دا و ده‌نگدانه په‌رله‌مانه‌كێ ب ڤى ره‌نگى دروست دكه‌ت، به‌لێ یا گرنكتر ئه‌وه ده‌مێ پشكدارى هه‌لبژارتنان دبن بزانن ده‌نگى بده‌نه كێ و چاره‌نڤیسێ پرۆسا سیاسى بكه‌نه ده‌ست كیش لایه‌نێ سیاسی دا!.
هه‌رێما كوردستانێ ل چه‌ند سالێن ده‌ربازبووى گه‌له‌ك سه‌رنشیڤى و سه‌رئه‌ڤرازى دیتن و تووشى چه‌ندین كێشه و شه‌ڕ و قه‌یرانان بوو و بۆ خه‌لكى هه‌مى تشت رۆن و ئاشكرابوون و سه‌نگ و هه‌لویستێن هه‌مى لایه‌نان بۆ دیاربوون، له‌وا ترسا ڤان لایه‌نان ژ سزادانا خه‌لكى وه‌كریه كو هه‌مى پیلان و پرۆژه و بانگه‌شه‌یا وان یا هه‌لبژارتنان دژى پارتى بن و هه‌ولده‌ن ئه‌و راستى و باوه‌ریا د ناڤبه‌را خه‌لكى و پارتیدا هه‌یى تیكبده‌ن و به‌رده‌وام ناڤزراندنا پارتى دكه‌ن و دره‌و و ئاخفتنن بێ بنه‌ما به‌لاڤ دكه‌ن و ب هه‌مى ره‌نگان ئستیفزازا خه‌لكى دكه‌ن، داكو دلێ وان ساركه‌ن ژ هه‌لبژارتنان. به‌لێ پارتى بێى گوهدان ب تێكدان و شه‌ر فرۆشتن و ئستیفزازا ڤان لایه‌نان بانگه‌شێ بۆ پرۆژه و پلانێن خوه دكه‌ت.
ئه‌م ل مێژوویێ نازڤرین و بۆ خه‌لكى به‌حس ناكه‌ین كا كوردستانێ چاوا ئه‌و هه‌مى قۆناغ ده‌ربازكرینه و چه‌ند قوربانێن مه‌زن داینه هه‌تا گه‌هشتیه ئه‌ڤرۆ كو جوداهیه‌كا ئێكجار مه‌زن دروست بوویه د ناڤبه‌را هه‌رێمێ و ناڤچه‌یێن دى یێن ئیراقێ ژ هه‌مى رویه‌كی ڤه، به‌لكو پشتراستیێن خه‌لكێ كوردستانێ و ناڤچه‌یێن كوردستانێ یێن ده‌رڤه‌یى ئیدارا هه‌رێمێ باش دزانن كا چ روودایه و كیش لایه‌نه دێ وان پارێزیت و كار بۆ خزمه‌تكرنا وان كه‌ت، كو ئه‌وژى بتنێ پارتیه كار بۆ مافێن نه‌ته‌وه‌یى و ده‌ستوورى یێن خه‌لكێ كوردستانێ دكه‌ت و باش دزانن پرۆژه و پلان و به‌رنامان هێز دڤێت بۆ جێبه‌جێكرنێ و بتنێ پارتى خودانا وێ هێزێ یه ل به‌غدا دژى پیلانان راوه‌ستیت و شه‌ڕى بۆ مافێن وه‌لاتیێن هه‌رێمێ دكه‌ت و كار بو جێبه‌جێكرنا وان پلان و پرۆژان دكه‌ت یێن كو بانگه‌شێ بۆ دكه‌ت و به‌لین دایه خه‌لكى جێبه‌جێ بكه‌ت.
و/ئه‌ڤرۆ
