تایبه‌تمه‌نده‌كێ دل و هناڤا: نابیت ب چو ره‌نگه‌كی پشتی نانخۆارنێ مرۆڤ بنڤیت یان خوه درێژ بكه‌ت
ئه‌ڤرۆ، به‌رپه‌رێ ساخله‌میێ:
تایبه‌تمه‌نده‌كێ نه‌خۆشیێن دل و هناڤا ل دهۆكێ دیاركر كو ڤه‌گه‌ریانا خۆارنێ بۆ سه‌ر مه‌عیده‌ی، ئیكه ژ نه‌خۆشیێن به‌ربه‌لاڤ دناڤ خه‌لكی دا و هه‌تا هنده‌ك كه‌س هه‌نه هه‌ر چ خۆارنێ بخۆت پێ دئێشیت ژبه‌ر ڤه‌گه‌ریانا خۆارنێ.
د. سه‌ربه‌ست عبدولعه‌زیز سه‌رحان، تایبه‌تمه‌ندێ نه‌خۆشیێن دل و هناڤا ل دهۆكێ دیاركركو گه‌له‌ك جاران نه‌خۆش دهێن و دبێژن نیڤه‌كا سینگێ من دئیشیت یان مه‌عیدێ من دئێشیت یان ده‌مێ سپێدێ ژ خه‌و رادبم ده‌ڤێ من یێ ترشه یان سینگێ من یێ گرانه و ئه‌ز نه‌یێ مرتاحم و چ خوارنێ دخووم ئه‌ز پێ نه‌یێ مورتاحم ب تایبه‌تی ژی شه‌ڤێ ده‌مێ خوه درێژدكه‌ت ئه‌و ئێشانا سینگی دا دژوارتردبیت وده‌مێ پیچه‌كێ هاتن وچوونێ دكه‌ت ئه‌و ئێشان كێم دبیت و نه‌خۆش ئارام دبیت و گۆت: ئه‌گه‌رێن ڤێ چه‌ندێ گه‌له‌كن یا ژ هه‌موویێ گرنگتر ئه‌وه ئاڤا مه‌عیده‌ی سه‌ردكه‌ڤیت بۆ بۆریا خۆارنێ دهێت له‌ورا ئێشان بۆ مرۆڤێ دروست دبیت.
ناڤهاتی ئه‌وژی ئاشكرا كركو ئه‌و كه‌سێن خۆارنێ دخۆن و ئێكسه‌ر دچن دنڤن یان خوه درێژ دكه‌ن ئه‌ڤه تشته‌كێ زۆر خه‌له‌ته كو وه‌لاتی دكه‌ن و نابیت ب هیچ ره‌نگه‌كی پشتی نانخۆارنێ مرۆڤ بنڤیت یان خوه درێژ بكه‌ت، چونكو ڤه‌گه‌ریانا خۆارنێ دروست دبیت و د ئه‌نجامدا ژی ئاریشێن ساخله‌میێ بۆ مرۆڤێ دروست بن، وه‌كو مه ئاماژه پێ كری گه‌له‌ك كه‌س هه‌نه دبێژن ده‌مێ ئه‌م خۆارنێ دخۆین ئه‌م د ئارام نینین یانژی ئه‌م دئێشین و گۆتژی: ئه‌ڤ كه‌سێن وه‌سا پێدڤیه ب كێماسی بۆ ده‌مێ چار ده‌مژمێران پشتی نانخۆارنێ مرۆڤ لسه‌ر پێن خوه بمینیت و هاتن وچوونێ بكه‌ت و نابیت ئێكسه‌ر بنڤیت .
د. سه‌ربه‌ست عه‌بدولعه‌زیز ئه‌وژی دیاركر كو گه‌له‌ك جاران قه‌له‌وی و سه‌نگێ زێده یێ مرۆڤی ژی وه‌سا دكه‌ت، چونكو خۆارن ب سه‌ر مه‌عیده‌ی دكه‌ڤیت و هنده‌ك جۆرێن شریناهیا ژی هه‌نه بۆریا خۆارنێ فره‌ه دكه‌ن ئه‌ڤه دبنه ئه‌گه‌ر ئاڤا مه‌عیده‌ی سه‌ربكه‌ڤیت ئه‌ڤه‌ژی چو جوداهیێ دناڤبه‌را كه‌سێن گه‌نج و دانعه‌مر دا نینه، به‌لێ شێوه‌یه‌كێ گشتی هه‌ر ده‌ه كه‌سان، سێ كه‌س تووشی ڤان ئاریشێن ساخله‌میێ دبن، به‌لێ مه ل دهۆكێ هه‌موو پشكنین و چاره‌سه‌ری هه‌نه و بۆریا زادی دهێته قیاس كرن و ئه‌م هه‌ول دده‌ین بزڤینن بۆ بۆریا سرۆشتی ئه‌وژی بۆریا زادی نابیت چارێ زێده‌تر بیت هه‌كه پتر ژ چارێ فره‌ه بیت ئه‌م چاره‌سه‌ری دكه‌ین.
ئاشكه‌را كركو هه‌كه هه‌ودانا بۆ سوریلانچكێ( مرئی) چێببیت ب تایبه‌تی ژی هه‌كه بۆ ده‌مه‌كێ درێژ بیت ئه‌و هه‌ودان دبیته ئه‌گه‌رێ ئێشێن گران و ئه‌ڤ ئیشا گران بۆ (مرئی) چێدبیت، له‌ورا ژی باشتره ده‌مێ كه‌سه‌ك هه‌ست ب ئێشانی بكه‌ت پشتی نانخوارنێ قه‌ستا نۆشداری بكه‌ت، داكو بهێته چاره‌سه‌ركرن، چونكو چه‌ند زوو چاره‌سه‌ری وه‌ربگریت باشتره ژ گیرۆكرنێ.
ل دووماهیێ ژی د. سه‌ربه‌ست گۆت: پێدڤیه دناڤبه‌را نانخۆارنێ و نڤستنێ ب كێماسی چار ده‌مژمێر بن باشتره لڤینێ بكه‌ت و هه‌كه ژی كه‌سه‌كێ قه‌له‌و بیت ئه‌م هه‌ول دده‌ین سه‌نگێ وی بهێته كێمكرن ب شه‌ڤێ ژی ده‌مێ نڤستنێ ئه‌م ئاموژگاریان ل وان كه‌سان دكه‌ین دو بالیفكا ل بن سه‌رێ خوه دانن داكو ڤه‌گه‌ریانا خۆارنێ دروست نه‌بیت ژ هه‌موو تتی ژی باشتر ئه‌وه مرۆڤ هاتن وچوونێ بكه‌ت.
