یا ژ پارتی دئێته خواستن پشتی هه‌لبژارتنێن 10 ئوكتوبه‌رێ
د. ڤه‌هێل گه‌لناسكی
پارتا دیمۆكراتا كوردستانا ئیراقێ د چارچۆڤێ بزاڤا نه‌ته‌وا كوردی دا، وه‌ك ئێك ژ ستوونێن بنیاتی یێن ئاڤاهی یێ پرۆژێ كوردایه‌تیێ ل باشۆرێ كوردستانێ، كو هه‌تا نها پارچه‌یه‌كه ژ ئیراقێ، ب دیتنا من، پشتی هه‌لبژارتنێن 10 ئوكتۆبه‌رێ و زێده‌كرنا كورسیێن خوه ل په‌رله‌مانێ به‌غدا، دێ شێت ل سه‌ر ڤان سێ ئاستێن خوارێ، ئاستێ حزبی، ئاستێ ناڤخوه‌یی و ئاستێ هه‌رێمایه‌تی و ناڤده‌وله‌تی، ڤان پێنگاڤێن لخوارێ په‌یره‌و بكه‌ت، پێخه‌مه‌ت موكمكرنا پێگه‌هێ خوه وه‌ك ستوونا سه‌ره‌كی یا پرۆژێ كوردایه‌تی یێ ل باشۆرێ كوردستانێ و، هه‌ر وه‌سا ناڤده‌وله‌تكرنا ڤی پرۆژه‌ی ل ناڤه‌ندێن ناڤده‌وله‌تی وه‌ك رێكخراوا نه‌ته‌وێن ئێكگرتی و رێكخراوێن دی یێن هه‌رێمایه‌تی و ناڤده‌وله‌تی، ئه‌و ژی ب رێیا ده‌زگه‌هكرنا په‌یوه‌ندی یێن نوكه یێن سه‌ركردایه‌تیا پارتی هه‌ین دگه‌ل سه‌ركردایه‌تی یێن ده‌وله‌تێن زلهێزێن جیهانێ و ده‌وله‌تێن هه‌رێمی، هه‌لبه‌ت د چارچوڤێ دستورێ ئیراقا فێدرالدا.
لسه‌ر ئاستێ حزبی؛ د بانگه‌شه‌یێن هه‌لبژارتنێن ١٠ ئوكتوبه‌رێدا، پرانیا كاندید و كادرێن پارتی ل سه‌ر هه‌رسێ ئاستان (بلند، ناڤین و نزم) و، وه‌ك ژبۆ خه‌لكی ب گشتی و كه‌سانێن بسپۆر ب تایبه‌تی هاتیه دیاربوون، كو ئاستێ ره‌وشه‌نبیریا حزبی یێ ڤێ پرانیا كاندید و كادرێن پارتی، هه‌تا نها ژ زمانێ سلۆگانێن حزبایه‌تی و قه‌بخوازیا دویر ژ راستیان، تێنه‌په‌ری یه.
و ب ڤی ئاوایی، نه هاتنه دیتن، بابه‌تێن كو دئێنه هژمار وه‌ك كارێن بنگه‌هی یێ په‌رله‌مانتاریێ، وه‌ك هزركرن ل پێكۆلێن لهه‌ڤكرنا بیرورایێن حزبی (پارتی) دگه‌ل هه‌ڤئالی یێن دی یێن كوردستانێ و، هه‌روه‌سا لده‌ما په‌یدابوونا ڤێ لهه‌ڤكرنا ئالیێن كوردستانێ، د دویڤدا هزركرن ل پێكۆلێن هه‌ڤده‌نگكرنا ڤێ لهه‌ڤكرنا ئالی یێن كوردستانێ وه‌ك هه‌ڤپه‌یمانیه‌كا ئێكگرتی ل گه‌ل پرۆگرامێن ئالی یێن ئیراقی (شیعی و سوننی) یێن كو هه‌ڤرا، ئانژی هزركرن ل میكانیزمێن هه‌ڤراكرنا (دیتنا زمانه‌كێ هه‌ڤپشك دگه‌ل) ڤان ئالی یێن ئیراقی دگه‌ل پرۆگرامێ ڤێ هه‌ڤپه‌یمانیا كوردستانى.
لێ، وه‌ك هاتیه دیتن، پرانیا گه‌نگه‌شه یێن بانگه‌شه‌یا ڤان كاندید و كادرێن پارتی، هه‌ر نێزیكی ڤان بابه‌تێن ئایدیولۆجی ژی نه‌بوون.
وه‌ك نیشان ب ڤێ راستیێ، به‌رێز جه‌عفه‌ر ئێمینكی، ئه‌ندامێ سه‌ركردایه‌تیا پارتی، پشتی دو رۆژان ژ هه‌لبژارتنان د كورته چاڤپێكه‌فتنه‌كا خوه‌دا دگه‌ل گاڤ نیۆز (جه‌عفه‌ر ئێمینكى به‌حسێ كێمبوونا ده‌نگێن پارتى ل پارێزگه‌ها دهۆكێ دكه‌ت)، ئه‌و راستیا مه به‌حس ژێ كری ب زه‌لالی ئینا زمان و، گۆت، ژبۆ ئاینده‌ی مه لبه‌ره حساباتێن خوه باشتر بكه‌ین. و ب هزرا من، تا حسابات باشتر بێنه‌كرن، ژ سه‌ركردایه‌تیا پارتی وه‌سا دئێته خواستن، كو كه‌سایه‌تی یێن ئێنتلێجنتسیا پارتی (ده‌سته‌بژار و نوخبا پارتی) ب نه‌خشه‌رێیه‌كا زه‌لال، جاره‌كا دی هێلێن وان په‌یوه‌ندیێن كو هاتینه برین، هێدی و هوشمه‌ندانه و دویر ژ سلۆگانێن حزبی یێن كو خه‌لك ژێ تێر بوی، ڤان هێلێن په‌یوه‌ندی یێن د ناڤبه‌را ڤێ ده‌سته‌بژارا پارتی و خه‌لكی دا بێنه نویژه‌نكرن، ل سه‌ر هنده‌ك بنه‌مایێن نوی، كو خه‌لك وه‌سا هزربكه‌ت ب باوه‌ری، پشته‌ڤانیا ل پارتی، پشته‌ڤانیه ل خوه‌شگوزاریا گشت تاكێ كوردستانی، هه‌لبه‌ت، چو هیڤی ژبۆ ڤه‌گه‌راندنا ڤان هێلێن په‌یوه‌ندیان نائێته دیتن، ئه‌گه‌ر به‌س هه‌ر گۆتن و گۆتار بن، مه‌به‌ستا من ژی ل ڤێرێ ئه‌وه، كو پارتی وه‌ك میراتگه‌را ڕێبازا جه‌نه‌رال بارزانی، وه‌سا ژێ دئێته خواستن كو ستوونێن ڤێ رێبازێ یا كو ژ چار ته‌وه‌ران پێكدئێت، ب كریار په‌یره‌و بكه‌ت.
ستوونێن رێبازا جه‌نه‌رال بارزانی، ئێك: دادوه‌ریا جڤاكی؛ دو: ئێكه‌تیا ناڤخوه‌یی؛ سێ: پێكڤه‌ژیانا ئاشتیانه؛ چار: باوه‌ری ب هه‌بوونا كوردستانه‌كا سه‌روه‌ر.
ژبۆ بجهكرنا ستوونێن ڤێ رێبازێ، ب هزرا من، وه‌سا ژ پارتی دئێته خواستن، كو د كۆنگرێ خوه یێ چاڤه‌رێدا (كۆنگرێ چاردێ)، ب میكانیزمه‌كا گونجای دگه‌ل ده‌رهاڤێژێن چه‌رخێ پشتی كورۆنایێ و، ب هه‌ڤده‌نگی دگه‌ل ئالی یێن دی یێن هه‌رێما كوردستانێ، ناسناما ناڤده‌وله‌تی یا ڤێ هه‌رێمێ بده‌ته دیاركرن، ئه‌و ژی ب رێیا دستووره‌كێ هه‌ڤچه‌رخ و هه‌ڤرا دگه‌ل ئالی و پێكهاته یێن هه‌رێما كوردستانا ئیراقێ.
ناساندنا هه‌رێمێ ب رێیا دستووره‌كێ هه‌ڤچه‌رخ، وه‌ك داخوازیه‌ك كو ژ پارتی دئێته‌كرن لسه‌ر ئاستێ ناڤخویی و، دیسا داخوازی یێن لسه‌ر ئاستێ هه‌رێمایه‌تی و ناڤده‌وله‌تی، دێ د گۆتارێن داهاتیدا به‌حس ژێ كه‌م.
*مامۆستایێ زانكۆیێ
