وه‌ختێ به‌رپرسیاره‌تی ژ پشت مێزێ ده‌رباز نه‌بت!
شڤان سالم گولى
دبیت گه‌له‌ك ژ مه جاران هویرك هزرا خوه د ڤی بابه‌تی دا كربیت و هه‌ر ژ مه د كوژی نیگایه‌كێ ڤه سه‌رنج و بۆچوون لسه‌ر هه‌بن، و دگه‌ل خوه ده‌هان جارن موخه‌ل و بێژینگا كه‌سێن هه‌ست ب به‌رپرسیاره‌تیێ كربیت یان نه، كربیت
لێ دبێت یا جهێ دلگرانیێ ئه‌وه كو پتریا مه د ڤی واری دا دبیت بێ ده‌ستهه‌لات خوه دیتبیت و هه‌ست ب لاوازی د گوهۆڕین وئاراسته‌كرنێ دا كربیت، له‌و نه‌چار جاران بێده‌را خوه ل دویڤ بایی هه‌لاڤێتیه، بو هندێ كو تووشی كێشه وگرفتان نه‌بت یان ژی د ناڤ خه‌لكه‌كێ دا ب جوامێر و نزانم بێ به‌لا و هێرڤه ووێڤه بهێت ناسین، هه‌لبه‌ت ئه‌ڤه هه‌موو لسه‌ر حسابا خوه دویرخستن ژ هه‌ستكرنێ ب به‌پرسیاره‌تیێ، بگره ئه‌ڤه بۆچۆنه ئێدی دبیت رۆژانه مه ل زۆر كۆچك ودیوانان بهیستبیت، ده‌ما ره‌خنێ ل كریاره‌كێ دگری یان دبێژی فلان شۆل نه قانوونی یه، یان نه‌ریت نینه دێ بینه چار جوامێرا گوت برا (پا چاوا دهێت وه‌سا ب هه‌لاڤێ)، دبیت زۆر ژ كه‌سان زوی زوی هه‌ست ب هندێ نه‌كربیت، گه‌لۆ ئه‌نجامێن باجاوان دهێت وه‌سا بده بایی دێ چ بت؟
گه‌لۆ ب راستی دان دێ ژ كایێ هێت ڤاڤارتن یان ژی دان دێ د ناڤ لێهمشتا كایێ دا به‌رزه بت و چو تشت ل جهێ خوه نامینت؟
كا دا پچه‌كێ هزرێن خوه د وێ به‌رپرسیاره‌تیێ بكین یان ب تنێ ل پشت مێزێ و ژ مێزێ وێڤه های ل بایێ فه‌له‌كێ نه‌هه‌یی ئه‌م ژ كیڤه به‌ر ب كیڤه برینه؟
دا ژ مالێ ده‌ست پێ بكه‌ین… جاران هه‌ر مالباته‌كێ روی سپیه‌ك هه‌بوو وه‌ج قه‌تین و خودان بوو ل قه‌نج و خرابێن خوه و سنۆر بۆ هه‌ر ئالیه‌كێ دویر ژ به‌رژوه‌ندیان دا، له‌و مالبات خوه گر و ئێك گوتن بین،
نوكه هه‌ر مالباته‌ك ب سه‌د سه‌ركێشانه وكه‌س خوه ب كه‌سێ ناده‌ت كا دا بپرسین چه‌ند ژ مه دو هه‌یڤان ژی جاره‌كێ سلاڤ مامێ خوه یان پسمامێ خوه، هتد دكت ئه‌وا هه‌ی ژی پشكه‌ك ژێ رویمه‌تیا دنیایێ یه نه زێده‌تر.
وه‌رن په‌روه‌ردێ، مامۆستا د پۆلێ ڤه ژ ته‌خته ره‌شی و ژمارا ئاماده‌بوویان وێڤه نه شۆلا منه پۆل هه‌تا حه‌فكێ د گلێشی دا نه شولا منه!
ده‌یان،نموونه د ده‌یان سێكته‌رێن دی یێن ژیانا جڤاكێ و ئیداری دا د ناڤ جڤاكێ مه دا هه‌نه بێ كو ئه‌م هه‌ست پێ بكین ئه‌م یێن وێرانكرین،
ئه‌رێ وه های ژ وێ هه‌یه كو هنده‌ك ژ باژێرین هه‌رێمێ ئێدی گه‌نجێن ب ژن جهێن تایبه‌ت یێن هه‌یین كو پرۆسا سێكسكرنێ لگه‌ل ژنێن هه‌ڤدو دكن!؟
باشه كێ ژ مه د مێشكێ خوه دا پرس كریه ئه‌ڤه بۆچى؟
ئه‌رێ مه هزر د هندێ دا كریه ئه‌ڤ ئه‌نجامێ وێ یه یا مه نفشه‌ك ئاڤا و په‌روه‌ردێ كری ژ به‌ر پین خوه وێڤه هه‌ست ب به‌رپرسیاره‌تیێ نه‌كت
ئه‌رێ مه هزر د وێ دا كریه قوتابیه‌كێ ده‌ما ئه‌م وه‌سا په‌روه‌رده بكین كو پاقژیا قوتابخانێ ئه‌ركێ وی نینه سوباهی ئه‌و پاراستنا خێزانا خوه ژی ب به‌رپرسیاره‌تیا خوه نزانت؟
ئه‌رێ مه هزر د هندێ دا كریه سه‌ركێشێ مالباتێ ده‌ما ب مه‌به‌ستا به‌رژوه‌ندیێن خوه ده‌ست ژ به‌رپرسیاره‌تیێ به‌ردا دێ سوباهی د بن په‌ردا كێ شول ب منه یان من شۆل ب كێ یه چ روی ده‌ت؟
ئاخر مه جاره‌كێ سه‌ره‌دانا دادگه‌ه و زیندانان كریه؟
دبیت هنده‌ك كه‌س هه‌بن بێژن ئه‌ڤه جڤاكه و سروشتینه ئه‌وێن ته گوتین، هه‌لبه‌ت ئه‌ڤه جڤاكه و بۆیه‌رێن جڤاكی دسروشتینه، لێ یا نه سروشتی ئه‌وه ده‌ما ئه‌م ب ناڤێ ئازادیێ یان بناڤێ مه گه‌له‌ك زۆرداری یا دیتی یان..هتد نفشه‌كێ وه‌سا رابكین به‌رپرسیاره‌تیا راكرنا كاغه‌زه‌كێ لسه‌ر جادێ نه‌كت.
قوتابیه‌ك هه‌موو كونجێن قوتابخانێ پڕ بكت ژ به‌رمایك و قوپكێن جگارێن خوه. تژی مالێن مه هه‌میان ئێدی مێهڤانێن ب وان یێن ب شۆرتا
وه سه‌رنج دایه جاده و كولان و مالێن مه چه‌ند پڕن ژ خودانێن شۆرتان؟
هوین دزانن ئێدی نفشه‌كێ رابوویی ب دویر ژ رویێ وه ب (نعالا و شۆرتا) سه‌ره‌دانا ئۆفیسێن حوكمه‌تێ ژی دكن؟
ئه‌ز نزانم ب راستی چ بێژم دبیت من هنده‌ك ئالۆز ژی بابه‌ت ئازراندبیت و نه‌شیابت ئه‌وا من دڤێ به‌گه‌هینم، لێ یا من دڤێت بێژم ئه‌ز ب ڤی ده‌ستوداری چاڤه‌ڕێ نفشه‌كێ مه هه‌ست ب به‌رپرسیاریێ ژ خوه بخوه ژی ناكن، ئه‌ڤه ئانكو چاڤه‌رێ پاشه‌رۆژا گه‌ش نه‌بن.
