ئه‌م شه‌رمزارێن پڵنگی نه!!
شڤان سالم گولى
ئێك ژ بابه‌ت و مژارێن گه‌رمێن سۆشیال مێدیا و جڤین و راگه‌هاندنێ ل دهۆكێ پرسا پڵنگێ كو ب (پڵنگێ باتیفا) یان ژی ب (پڵنگێ گولیا) هاتیه ناڤزراندن بوویه د چه‌ند رۆژێن بۆری دا، هه‌رچه‌نده ئه‌ز ب خوه ل گه‌ل وێ ناڤزراندنا رادده‌به‌ده‌ر نینم، لێ جاران ژی شه‌پۆلا شه‌قامی ئاراسته‌یێ ژ له‌پێن مرۆڤی ده‌ردئێخیت و نه‌ویست مرۆڤ ژی دكه‌ڤت شوپا وێ ئاراستێ، چ باش چ خراب. كا دا بهێن سه‌ر پرسا پڵنگی و ژ پاش ناڤا ڤه‌بین، دیاره پڵنگ بۆ سروشتێ مه دبیت گیانه‌وه‌ره‌ك نامۆ بهێت ناسین وه‌ك چاوا ژی زۆره‌ك ژ كاله‌مێرێن ده‌ڤه‌رێ شه‌هده‌كیا وێ چه‌ندێ دده‌ن كو دیتنا پڵنگی ل ده‌ڤه‌رێ بۆ وان روودانه‌كا نوی بوویه، له‌وا ژی دیتنا پلنگی دبیت بو سروشتێ مه ژ بلی كو گیانه‌وه‌رك نامۆیه نیشانه‌یه‌ك ژی بت بۆ زه‌نگینا ژینگه و سروشتێ كوردستانێ ب گشتی و ده‌ڤه‌رێ ب تایبه‌تی كو ئه‌ڤه رێكخۆشكه‌ر و ده‌لیڤه‌یه‌كا زۆر گرنگه بۆ دانانا پاركێن مللی كو راسته‌وخوه ژی كاریگه‌ریا خوه سه‌ر ئاڤ و ده‌نگ و پێگه‌ها كوردستانێ ژی دا په‌یدا كت، ئه‌ڤه هه‌موو خالێن دلخۆشكه‌رن و ب هێڤیا وێ چه‌ندێ ئه‌ڤه داوی دیتنا مه بۆ گیانه‌وه‌رێن نامۆ نه‌بت و سروشت و ژینگه‌ها مه رۆژ بۆ رۆژێ زه‌نگینتر ببت. لێ گه‌لۆ كا دا پرسین چما ئه‌م شه‌رمزارێن پڵنگێ خوه بین؟
دیاره ل هه‌موو وه‌لاتێن جیهانێ ده‌زگه‌ه و رێكخراوێن تایبه‌ت ب گیانه‌وه‌ر پارێزی و ژینگه‌هێ هه‌نه و تایبه‌تمه‌ندن ب پاراستنا یێن من ئاماژه پێدایی و ل گۆر پێدڤی و راستپارده و پیڤه‌رێن سه‌رده‌م و زانستیانه سه‌ره‌ده‌ریێ دكن، دیاره ب سۆپاسی ڤه ئه‌م ژی ل كوردستانێ ب گشتی و دهۆكێ ژی ژ ڤان هێز و رێكخراوان بێبه‌هر نه‌بووینه، كو ئه‌ڤ ئه‌ركێ گرتنا پڵنگی وه‌ك میناك ب پلا ئێكێ ئه‌ركێ وان بوویه، لێ ب مخابنی ڤه دبێژم وان ژی دڤیا كل بده‌ن لێ چاڤ ژی په‌قاند،
زێده‌باری وێ كو نه‌شیان ب شێوه‌یه‌كێ راست و دروست سه‌ره‌ده‌ریێ ل گه‌ل پڵنگی بكن، ب مه‌به‌ستا ساخله‌م گرتنا وی پێ ژی لێ دانه بڕین، خه‌له‌ت نه‌بم ددانه‌ك ژی لێ هاتیه شكاندن، كو ب راستی ژی ئه‌ڤه شه‌رمزاریه بۆ ته‌ك ته‌كا مه. یا وێرانتر وه‌ره تو چه‌ند په‌نجادانی پڵنگی و پڵنگ په‌نج نه‌بت، گه‌لۆ ژ په‌نجێ یه یان پڵنگێ مه ژ خه‌لكی جودایه وه‌ك چاوا ئه‌م ژ خه‌لكی جودا!
ئه‌ڤه زێده‌باری وێ كو نه‌شیان وه‌ك پێدڤی خه‌لكی ژ ده‌ردۆرێن پڵنگی دووربێخن و كورێ كێچ گرتی ئه‌و حه‌شامه‌تا مرۆڤا شۆله ژێ و نه شۆله‌ژێ ل دۆرا كۆم ببین كو ب ڕاستی من بخوه حه‌یف پێ دهات.
ئه‌ڤه زێده‌باری وێ كو گرتنا وی ژی ئێدی گه‌هشت موزایه‌ده ب سه‌ر ئێككرنێ و ب راستی مرۆڤ ل خه‌لكێ ئاسایی ناگریت لێ نزانم ب مه‌به‌ست یان بێ مه‌به‌ست ئه‌ڤ موزایه‌ده پێكرنه ژ لایێ كه‌سێن به‌رپرسیار ڤه هاته كرن كو ب راستی ژی ب من ئه‌ڤ گۆتنا وی بخوه ب من عوزرا ژ قه‌بحه‌تێ مه‌زنتر بوویه، چونكی ئه‌گه‌ر گرتن وه‌سا بت خودانێ ته‌لهێ ژی دشیا وه‌سا بگرت،
یا ل داویێ من دڤێت بێژم زمانحالێ كه‌سێ نینم لێ ئه‌ز شه‌رمزراێ پڵنگی مه.
