ل 10 سالێن بۆری دا ل هه‌رێما كوردستانێ پتر ژ 62 هزار كه‌سان تووشی په‌نجه‌شێرێ بووینه
دهۆك، له‌زگین جوقی
د 10 سالێن بۆرێدا ل هه‌رێما كوردستانێ 62 هزار و 17 كه‌س تووشی په‌نجه‌شێرێ بووینه ژوانا ل هه‌ولێر 29 هزار و 673 كه‌س تووشی په‌نجه‌شێرێ بووینه، ل سلێمانی ژی 23 هزار و 204 كه‌س تووشی په‌نجه‌شێری بووینه و ل پارێزگه‌ها دهۆكێ ژی 9 هزار و 140 كه‌س تووش بووینه”.
د. چه‌كدار ئه‌حمه‌د، جێگری به‌رپرسێ سه‌نته‌رێ ئازادی یێ چاره‌سه‌ركرنا په‌نجه‌شێرێ و نه‌خۆشیێن خوینێ ل دهۆكێ دیاركر:” ل پارێزگه‌ها دهۆكێ چه‌ندین جۆرێن خزمه‌تان بۆ نه‌خۆشێن په‌نجه‌شێرێ دهێنه پێشكیشكرن ژوانا ژی ئه‌نجامدانا نشته‌رگه‌ریان بۆ نه‌خۆشێن په‌نجه‌شێرێ هه‌روه‌سا ژی ئه‌نجامدانا پشكنینێن تایبه‌ت یێن گرێدای په‌نجه‌شێرێ زێده‌بارێ پشكنینێن تیشكێ بۆ نه‌خۆشان ودابینكرنا ده‌رمان و چاندنا مه‌ژیێ هه‌ستی ژ ده‌رڤه‌ی وه‌لاتی ب تایبه‌تی ژی ل وه‌لاتێن ئوردنێ و توركیا كو ئه‌م نه‌خۆشێ خوه ره‌وانه دكه‌ین و هاریكاریا نه‌خۆشی دهێته كرن و چه‌ندین پشكنینێن (جینا) دهێنه كرن بۆ نه‌خۆشێن په‌نجه‌شێرێ و چاره‌سه‌ریا نه‌خۆشی دناڤ سه‌نته‌رێ په‌نجه‌شێرێ دا ل دهۆكێ دهێته كرن ئه‌ڤ خزمه‌ت هه‌موو بێ به‌رامبه‌ر بۆ نه‌خۆشان دهێنه دابینكرن “.
ئاماژه دا وی چه‌ندێ ژی كو:” سالا 2013ێ ل پارێزگه‌ها دهۆكێ‌َ به‌رێ بنیاتێ بۆ ئاڤاكرنا نه‌خۆشخانا په‌نجه‌شێرێ هاتیه دانان ئه‌ڤ نه‌خۆشخانه پێكهاتیه ژ 100 ته‌ختان، به‌لێ ژبه‌ر ره‌وشا دارایی و برینا بۆدجه‌یا هه‌رێما كوردستانێ ژلایێ عێراقێ ڤه و سه‌پاندنا شه‌رێ تیرۆرستێن داعش ب سه‌ر هه‌رێما كوردستانێ دا ئه‌ڤ پرۆژه هاته راوه‌ستاندن، به‌لێ ل ده‌مه‌كێ نێزیك پارێزگه‌ها دهۆكێ دێ به‌رێ بنیاتی بۆ نه‌خۆشخانا تیشكێ ل پارێزگه‌ها دهۆكێ هێته دانان وئه‌رد و پاره ژی هاتیه ته‌رخانكرن ئه‌م چاڤه‌رێ ینه دده‌مه‌كێ نێزیكدا ده‌ست ب پرۆژه‌ی بهێته كرن، هه‌روه‌سا نوكه ل دهۆكێ نه‌خۆشخانا چاندنا مه‌ژی هه‌ستی یا دهێته ئاڤاكرن.
ل دووڤ ئامارێن سندوقا په‌نجه‌شێرێ ل هه‌رێما كوردستانێ بۆ هه‌ر 150 نه‌خۆشێن په‌نجه‌شێری ئێك نۆشدار پێدڤیه دماوێ 10 سالێن بۆری دا هه‌تا دووماهیا سالا 2021ێ ل هه‌رێما كوردستانێ 62 هزار كه‌س تووشی نه‌خۆشیا په‌نجه‌شێرێ بووینه و حكومه‌تا هه‌رێما كوردستانێ هه‌موو پێدڤیێن چاره‌سه‌ریێ بۆ نه‌خۆشان دابین دكه‌ت و بێ به‌رامبه‌ر دگه‌هنه ده‌ستێ نه‌خۆشان ب تنێ سالا 2021ێ دا ب پشته‌ڤانی و هاریكاریا حكومه‌تا هه‌رێما كوردستانێ و ب رێیا سندوقا په‌نجه‌شێری كوژمێ 48 ملیار دینار هاتینه خه‌رجكرن، هه‌روه‌سا ژی حكومه‌تا هه‌رێما كوردستانێ سالانه ژی كوژمه‌كێ پاره‌ی ته‌رخان دكه‌ت بۆ ساخله‌میێن پارێزگه‌هیێن هه‌رێما كوردستانێ ب مه‌ره‌ما دابینكرنا ده‌رمان و پێدڤیێن چاره‌سه‌ریێ بۆ نه‌خۆشیێن په‌نجه‌شێری و سالا 2021ێ دا كوژمێ 700 ملیۆن دیناران بۆ هه‌ولێر و 600 ملیۆن دینار بۆ سلێمانیێ و 300 ملیۆن دینار بۆ دهۆكێ هاتینه مه‌زاختن”.
ل دووڤ ئامارێن سندوقا په‌نجه‌شێرێ ل هه‌رێما كوردستانێ پتریا وه‌لاتیان تووشی نه‌خۆشیا په‌نجه‌شێرا سینگی دبن ب تایبه‌تی ژی ئافره‌ت و ئه‌ڤه رێژا ئێكێ دهێت، ددووڤدا ژی نه‌خۆشیا هه‌ناسه‌دانێ و بۆریا هه‌وایی ل رێژا دوێ دهێت، هه‌روه‌سا ژی هه‌رسكرنێ رێژا سیێ دهێت و گولچیسك و میزه‌رو رێژا چارێ و ددووڤدا چه‌ندین نه‌خۆشێن دی هه‌نه وه‌كو په‌نجه‌شێرا پیستی و پروستاتان و مێشك و ده‌مارا.”.
د. جه‌كدار ئه‌حمه‌د داوود، تایبه‌تمه‌ندێ نه‌خۆشیا په‌نجه‌شێرێ و جێگری به‌رپرسێ سه‌نته‌رێ ئازادی یێ چاره‌سه‌ركرنا په‌نجه‌شێرێ ونه‌خۆشیێن خوینێ ل دهۆكێ راگه‌هاند كو:” چه‌ند ئه‌گه‌ر هه‌نه خه‌لك تووشی نه‌خۆشیا په‌نجه‌شێرێ دبن ژواناژی ئه‌گه‌رێن خێزانی ئه‌وژی هه‌كه دایك و باب هه‌لگرێن نه‌خۆشیا په‌نجه‌شێرێ بن دهێته ڤه‌گوهاستن بۆ زارۆكان، هه‌روه‌سا ژی په‌نجه‌شێرا پرۆستاتان دناڤ خه‌لكێ مه‌دا په‌یدابیت ئه‌وژی هه‌كه ژیێ مرۆڤی مه‌زن ببیت، هه‌روه‌سا پیسبوونا ژینگه‌هێ ژی ئه‌گه‌ره نه‌خۆشیا په‌نجه‌شێری په‌یدابیت، دگه‌ل خۆارنێن نه‌ساخله‌م و قه‌له‌ویێ وجگارا كێشان و مه‌ی ڤه‌خارن، هه‌روه‌سا ئه‌گه‌رێن هورموناتان ژی هه‌نه ل ده‌ڤ ئافره‌تان تووشی په‌نجه‌شێرێ دبن”.
