هه‌ژماره‌كا كارگه‌هێن به‌رهه‌مئینانا ده‌رمانان دهێنه دامه‌زراندن
هه‌ولێر، قائید میرۆ:
به‌رپرسه‌كێ وه‌زاره‌تا ساخله‌میێ ئاشكرا كر، سێ كارگه‌هێن به‌رهه‌مئینانا ده‌رمانان ل هه‌رێما كوردستانێ هه‌نه و بڕیاره هه‌ژماره‌كا كارگه‌هێن دی ژی یێن به‌رهه‌مئینانا ده‌رمانان بهێنه ڤه‌كرن و سێ ژ وان كارگه‌هێن مه‌زنن.
دكتۆر شێروان سادق، رێڤه‌به‌رێ گشتیێ كۆنتڕۆلا ده‌رمانان بۆ رۆژناما ئه‌ڤرۆ دیار كر، د ده‌مێ نوكه دا سێ كارگه‌هێن به‌رهه‌مئینانا ده‌رمانان ل هه‌رێما كوردستانێ هه‌نه و رێژه‌یه‌كا ده‌رمانێن ناڤخوه ژلایێ كارگه‌هێن هه‌رێما كوردستانێ دهێنه به‌رهه‌مئینان و گۆت: “خواست ل سه‌ر وه‌رگرتنا مۆهله‌تا كارگه‌هێن به‌رهه‌مئینانا ده‌رمانان زێده بوویه و بڕیاره هه‌ژماره‌كا كارگه‌هێن دی یێن به‌رهه‌مئینانا ده‌رمانان بهێنه دامه‌زراندن و سێ ژوان كارگه‌هێن مه‌زن یێن ده‌رمانانه”.
دكتۆر شێروان سادق ئاماژه ب وێ چه‌ندێ ژی كر كو رێژه‌یه‌كا ده‌رمانێن سه‌خته ل بازاڕێن هه‌رێما كوردستانێ هه‌نه و گۆت: “به‌رده‌وام ژی ژلایێ لیژنه‌یێن چاڤدێریێ ڤه ده‌ست ب سه‌ر ده‌رمانێن سه‌خته دا دهێته گرتن، به‌لێ ژ به‌ركو سنووره‌كێ زۆر د ناڤبه‌را هه‌رێما كوردستانێ و ئیراقێ دا یێ هه‌ی، زۆربه‌یا ده‌رمانێن سه‌خته ب رێكێن قه‌چاخ دهێنه د ناڤا هه‌رێما كوردستانێ دا و ل بازاڕی دهێنه فرۆتن”.
