د.عدنان ئه‌نوه‌ر:نوكه ئامیرێن پێشكه‌فتی یێن هه‌ین و ئه‌م دشێین دده‌مه‌كێ كورت دا بزانین ئه‌وێن هه‌ڤژینیێ پێك دئینن هه‌لگرێن نه‌ساخیا تالاسمیایێ نه یان نه
ئه‌ڤرۆ، به‌رپه‌رێ ساخله‌میێ:
د.عه‌دنان ئه‌نوه‌ر، تایبه‌تمندێ تاقیگه‌هێ و نه‌خۆشیێن خوینێ ل تاقیگه‌ها وان گلۆبال دیاركر كو پشكنینێن به‌ری ماره‌برینێ ئه‌و جوره پشكنینن یێن دهێنه‌كرن بو وان كور و كچان یێن نیازا هه‌ڤژینیێ هه‌بیت و گۆت: دو جورێن پشكنینێن به‌ری ماره‌برینیێ یێن هه‌ین، جوره‌كی دبێژنێ یێن ڤایرۆسان، ئه‌ون ده‌مێ كور یان كچ یێ نه‌خۆش بیت ب ڤی ڤایرۆسی، ره‌نگه بهێته ڤه‌گوهاستن ب رێیا هه‌ڤژینیێ ژ ئێكی بۆ یێ دیتر، مه سێ جورێن ڤایرۆساتان هه‌نه ئه‌م ئه‌نجام دده‌ین به‌ری ماره‌برینێ ئه‌وژی هه‌ودانا جگه‌رێ جورێن بی و سی و ڤایرۆسێ HIV كو یێ به‌رنیاسه ب نه‌خۆشیا ئایدزێ و هه‌كه ئێك یێ نه‌خۆش بیت ب ئێك ژ ڤان ڤایرۆسان پێدڤییه یێ دیتر بهێته چاره‌سه‌ركرن، داكو بو یێ دی نه‌هێته ڤه‌گوهاستن.
د.عه‌دنان ئه‌نوه‌ر دیاركر ژی پشكنینێن دوێ یێن به‌ری ماره‌برینێ پشكنینێن نه‌خۆشیێن خوینێ نه كو دبێژنێ تالاسیمیا و كێمخوینیا شالوكی، چونكو ئه‌ڤ نه‌خۆشیه ل جیهانێ و ده‌ڤه‌را مه‌ژی د به‌ربه‌لاڤن و ره‌نگه دایباب هه‌لگرێن وان نه‌خۆشییان بن و ل ده‌ف وان چو دیارنابیت و هه‌ستپێ ناكه‌ن، به‌لێ ره‌نگه بهێته ڤه‌گوهاستن بو زارۆیێن وان، ئه‌وژی د هنده‌ك حاله‌تان دا، وه‌كو هه‌كه هه‌ردو هه‌لگرێن نه‌خۆشیێ بن، 25% زارۆكێن وان ل پاشه‌رۆژێ دێ نه‌خۆش بن ب ته‌لاسیمیا، یان كێمبوونا خوینا شالۆی، به‌لێ هه‌كه ئێك ژوان هه‌لگربوو، چو ئاریشه بۆ زارۆیێن وان دروست نابن، به‌لێ هه‌كه هه‌ردو هه‌لگر نه‌بن هێشتا باشتره.
هه‌روه‌سا دیاركر، نوكه ئامیرێن پێشكه‌فتی یێن هه‌ین و دشێین دده‌مه‌كێ كورت دا ب رێیا پشكنینێن خوینێ بزانین كا كور و كچ هه‌لگرن یان نه‌ساخیا تالاسمیایێ نه یان نه و گۆت: نوكه ل گه‌له‌ك وه‌لاتێن پێشكه‌فتی ده‌مێ كچ و كور دگه‌هنه كولیژێ پشكنینێن به‌ری ماره‌برینێ بۆ دهێنه‌كرن و هه‌كه زانین تووشبووی نه دا زوو بڕیارا خوه بده‌ن.
