100 كارمه‌ندێن ساخله‌میێ دێ هێنه دامه‌زراندن
زاخۆ، عه‌لی حاجی:
ژ ئه‌گه‌رێ نووژه‌نكرن و به‌رفره‌هكرنا پشكا ته‌نگاڤیان ل ئیداره‌یا سه‌ربخوه یا زاخۆ، پشكا ناڤهاتی بۆ ده‌مه‌كی بۆ نه‌خوشخانا زاخۆ یا گشتی هاته ڤه‌گوهاستن و رێڤه‌به‌رێ ساخله‌میا زاخۆ ژی د كۆنگره‌یه‌كێ رۆژنامه‌ڤانی دا دیار كر، بۆ ده‌ما دو هه‌تا سێ هه‌یڤان دێ پشكا ته‌نگاڤیان ل نه‌خۆشخانا زاخۆ یا گشتی بیت و دێ كه‌رتێ ساخله‌میێ ڤه‌ژه‌نه‌كا باشتر ب خوه ڤه بینیت.
دكتۆر شاكر عه‌بدولره‌حمان، رێڤه‌به‌رێ ساخله‌میا زاخۆ گۆت: “ل دووڤ وێ پلانا ژلایێ حكومه‌تا هه‌رێما كوردستانێ ڤه هاتیه دارێشتن، پشكا ته‌نگاڤیان ل زاخۆ بۆ نه‌خوشخانا زاخۆ یا گشتی دێ هێته ڤه‌گوهاستن و ئه‌ڤ چه‌نده ژی ل رۆژا چارشه‌مبی 30/3/2022 دێ كه‌ڤیته د بیاڤێ بجهئینانێ دا، لێ پشكێن راوێژكاری، بنگه‌هێ ساخله‌میێ، بانكا خوینێ و سه‌نته‌رێ كۆرۆنایێ دێ ل جهێ خوه یێ كه‌ڤن مینن، دگه‌ل نووژه‌نكرنا پشكا ته‌نگاڤیان باشتر خزمه‌تا وه‌لاتیان دێ هێته كرن، ژ به‌ركو د هه‌مان ده‌م دا ئاڤاهیێ پشكا ته‌نگاڤیان دێ هێته به‌رفره‌هـكرن، كو جهێ نه‌خوه‌شان و پشكا دل و هناڤان و جهێ ڤه‌حه‌واندنێ و گه‌له‌ك جهێن دیتر ژی د گه‌ل دا دێ هێنه نووژه‌نكرن، هه‌روه‌سا پشكێن ناڤهاتی پێكڤه دێ هێنه گرێدان و ئه‌و گازندێن پێشتر هه‌ین نامینن، بۆ ئه‌نجامدانا ڤی كاری ژی پێشتر چه‌ندین كۆمبوون هاتنه ئه‌نجامدان و ئه‌ڤ چه‌نده ژی دێ د به‌رژه‌وه‌ندیا وه‌لاتیان دا بیت”.
ناڤهاتی گۆتژی: “پاره‌یێ پێدڤی بۆ نووژه‌كرنا سێ نه‌خوشخانه و نه‌ه بنگه‌هێن ساخله‌میێ و دابینكرنا 16 ترۆمبێلێن هه‌وارهاتنێ و هنده‌ك پێدڤیێن دیتر گه‌هشتینه سه‌ر حسابا بانقێ و مه چو كێشه د وێ چه‌ندێ دا نینه”.
رێڤه‌به‌رێ ساخله‌میا زاخۆ د دووماهیا كۆنگرێ خوه یێ رۆژنامه‌ڤانی دا گۆت: “گازنده‌یێن خه‌لكی ل سه‌ر هنده‌ك تایبه‌تمه‌ندیێن هوور هه‌نه، ب تایبه‌تی ژی د ئامیره‌یێن هه‌ناسه‌دانێ دا، دیسا كار نه‌كرنا پشكێن دل و هناڤان و پشكا سۆتنێ، هنده‌ك پشكێن دیتر ژی ژ ئه‌گه‌رێ كێمیا نۆشدارێن تایبه‌تمه‌ند هه‌تا نوكه مه نه‌داینه كاری و ئه‌ڤ چه‌نده ژی پشتی رێڤه‌به‌ریا ساخله‌میا زاخۆ دبیته رێڤه‌به‌ریا گشتی د وی ده‌می دا دێ ئه‌ڤ بابه‌ته هێته چاره‌سه‌ركرن، حكومه‌تا هه‌رێما كوردستانێ رازیبوون ل سه‌ر دامه‌زراندنا 100 كارمه‌ندێن ساخله‌میێ د بیاڤێن جوداجودا دا كری یه و ناڤ ژی بۆ جهێن بلند هاتینه هنارتن و د ده‌مه‌كێ نێزیك دا ناڤ دێ هێنه راگه‌هاندن”.
