داكو ل ره‌مه‌زانێ تێهنی نه‌بی ڤان رێنمایان بجهبینه
ئه‌ڤرۆ، به‌رپه‌رێ ساخله‌میێ:
هه‌لبه‌ت ل هه‌یڤا ره‌مه‌زانێ خه‌لك گه‌له‌ك هه‌ست ب تێهنیبوونێ دكه‌ن، پرسیار ل ڤێرێ ئه‌ڤه‌یه، ئه‌م دێ چاوان هاریكاریا له‌شێن خوه كه‌ین كو ئاڤێ ب پارێزیت و مه پال نه‌ده‌ت كو ئاڤیێ ڤه‌خووین یان هه‌ست ب تێهنیبوونێ بكه‌ین.
هه‌ر كه‌سه‌ك ژ مه شیان هه‌نه هاریكاریا خوه بكه‌ین كو ئاڤێ د له‌شێ خوه دا ب پارێزین و هه‌ست ب تێهنیبوونێ نه‌كه‌ین، ئه‌وژی ب دووڤچوونا هنده‌ك رێیان داكو پتر هه‌ست ب تێهناتییێ نه‌كه‌ین.
- هه‌ڤالێن مه یێن دژی تێهنیبوونێ:
* ئاڤ: سه‌ركێشا هه‌موو شله‌مه‌نیانه و چ شله‌مه‌نیێن دیتر جهێێ ئاڤێ ناگرن، شاره‌زا شیره‌تان ل مه دكه‌ن كو رۆژانه دو لیترێن ئاڤێ ڤه‌خوین و ب تایبه‌ت هه‌كه گه‌له‌ك خوهدان ل له‌شێ مه‌دا په‌یداببیت، باشتره ل ده‌مێ سه‌ره‌ده‌رییێ دگه‌ل ئاڤێ دكه‌ین ب ڤی ره‌نگی بیت:
– نابیت ب چ ره‌نگه‌كی تو بوتلێ ئاڤێ ڤه‌كری بهێلی بۆ ده‌مه‌كێ درێژ، ژبه‌ركو ئه‌و به‌كتریایێن دناڤ ده‌ڤێ مه و ده‌وروبه‌رێن مه ره‌نگه دناڤدا چالاك ببن و ببنه ژێده‌رێ نه‌خۆشیان.
– هه‌كه ته‌ڤیا دوباره ئاڤێ بكه‌یه بوتلی، باشتره قه‌پاغێ وی و ده‌وروبه‌رێن قه‌باغی باش ب ئاڤا گه‌رم و سابوونێ بشووی.
– تو دشێی هنده‌ك تشتا ل سه‌ر هه‌ر كوپه‌كێ ئاڤا تو ڤه‌دخووی زێده‌بكه‌ی، وه‌كو نیموكا و نه‌عنایێ و زه‌نجه‌بیلێ.
– ژبۆ خوه قورتالكرنێ ژ تاما كلۆری، باشتره ئاڤێ بدانیه دناڤ ئامانه‌كێ به‌رفره‌ه دا بۆ ده‌مێ ده‌مژمێره‌كێ بهێله به‌ری ڤه‌خووی.
* شله‌مه‌نی ب هه‌موو ره‌نگێن خوه ڤه، ب تایبه‌ت ڤه‌خوارنێن وه‌كو خوشاڤا و شه‌ربه‌تا فێقیێ سروشتی كو خوێ دناڤدا هه‌یه دروسته تو ب كاربینی، شیره‌تان خۆ دوور بكه‌ن ژ شه‌ربه‌تێن ده‌ستكرد، ژبه‌ركو گه‌له‌ك شه‌كر دناڤدا هه‌یه و زیانێن مه‌زن دگه‌هینن ساخله‌میا مرۆڤی و هه‌ستداریێ په‌یدادكه‌ن.
* زه‌رزه‌وات و فێقیێ گه‌هشتی: دێ گه‌له‌ك باش بیت ب شه‌ڤێێ و ل ده‌مێ پاشیڤێ تو فێقی و زه‌رزه‌واتی بخووی، ژبه‌ركو گه‌له‌ك ئاڤ دناڤدا هه‌یه و بۆ ده‌مه‌كێ درێژ ئه‌و ئاڤ دناڤ رووڤیكان دا دمینیت و مرۆڤ هه‌ست ب برسیبوون و تێهناتییێ ناكه‌ت.
* گیروكرنا پاشیڤێ: باشتره پاشیڤ ل وه‌ختێ خوه بهێته خوارن كو ژ نیڤ شه‌ڤ پێدابیت، داكو رۆژیگر بشێت به‌رهنگاریا تێهنیبوونێ بكه‌ت و ب تایبه‌ت ل رۆژێن ئێكه‌م یێن رۆژیگرتنێ و هندی خوارنا پاشیڤێ سڤكتر بیت هه‌لبه‌ت باشتره.
