كار ل سه‌ر ده‌ركرنا لێبۆرینا گشتی ل هه‌رێمێ دهێته كرن
هه‌ولێر، سولین سلێمان:
وه‌زیرا كار و كاروبارێن جڤاكی راگه‌هاند، لژنه‌ك ژ جڤاتا وه‌زیران و سه‌رۆكاتیا هه‌رێما كوردستانێ و جڤاتا دادوه‌ری و وه‌زاره‌تا وان هاتیه پێكئینان، كو ل سالا بهێت لێنورینا گشتی ل هه‌رێما كوردستانێ بهێته ده‌رئێخستن.
كوێستان محه‌مه‌د، وه‌زیرا كار و كاروبارێن جڤاكی بۆ رۆژناما ئه‌ڤرۆ دیار كر، د نوكه دا لژنه‌كا تایبه‌ت كار ل سه‌ر پڕۆژه‌یاسایا گشتیا لێبورینێ دكه‌ت و گۆت: “بڕیاره ل سالا بهێت بكه‌ڤیته د بیاڤێ بجهئینانێ دا”.
خویا ژی كر، ئه‌و راهێنانێن وه‌زاره‌تا كاروبارێن جڤاكی ئه‌نجام داین بووینه ئه‌گه‌را هندێ، كو 35% یا وان كه‌سێن به‌ندكری ببنه خودان كارێ خوه و گۆت: “هندی ژ مه هاتی، مه بزاڤا كری ده‌رفه‌تێن كاری ژ بۆ وه‌لاتیان په‌یدا بكه‌ین، دیسا د ده‌مێن بۆری ژی دا مه هاریكاریا نزیكی پێنج هزار كه‌سان كریه، كو ببنه خودان كارێن خوه یێن تایبه‌ت”.
گۆتژی: “مه كار ل سه‌ر په‌سه‌ندكرنا پڕۆژه‌یاسایا كاری ژی كریه، هه‌ر ده‌مێ ئه‌ڤ پڕۆژه‌یاسایه بهێته په‌سه‌ندكرن پرۆسه‌یا كاری ل هه‌رێما كوردستانێ دێ گه‌له‌ك پێشڤه چیت”.
