چار سه‌نته‌رێن جڤاكی و پیشه‌یی ل دهۆكێ هاتنه ڤه‌كرن
دهۆك، نه‌وزاد هلۆری:
ب پشته‌ڤانیا دارایی یا رێكخراوا پروگرامێ خوارنا جیهانی، رێڤه‌به‌ریا گشتی یا چاڤدێری و گه‌شه‌پێدانا جڤاكی ل پارێزگه‌ها دهۆكێ، چار سه‌نته‌رێن راهێنان و پیشه‌یی ل دهۆكێ هاتنه ڤه‌كرن.
د. شێرزاد حه‌مید، رێڤه‌به‌رێ گشتی یێ چاڤدێری و گه‌شه‌پێدانا جڤاكی بۆ رۆژناما ئه‌ڤرۆ گۆت: (ژ لایێ رێڤه‌به‌ریا گشتی یا چاڤدێری و گه‌شه‌پێدانا جڤاكی ڤه ل پارێزگه‌ها دهۆكێ و ب پشته‌ڤانیا دارایی یا رێكخراوا پروگرامێ خوارنا جیهانی WFP ل ئیراقێ و ل ژێر ناڤونیشانێن پڕۆژێ شیاندنا ئابووری ب رێیا گه‌شه‌پێدانا كاری و شیانان، چار سه‌نته‌رێن جڤاكی و راهێنانێن پیشه‌یی ل سنوورێ پارێزگه‌ها دهوكێ هاتنه ڤه‌كرن).
زێده‌تر گۆت: (مه‌ره‌م ژ ڤه‌كرنا ڤان سه‌نته‌ران ئه‌وه كو ب رێیا ڤه‌كرنا خولان خه‌لكی فێری هه‌موو جۆرێن پیشه‌یان بكه‌ن، داكو بشێن ل پاشه‌رۆژێ دا پشتبه‌ستنێ ل سه‌ر شیانێن خوه بكه‌ن و كار بكه‌ن).
ناڤبری دیار كر ژی كو د ئێكه‌م رۆژا ڤه‌كرنا وان سه‌نته‌ران دا 10 خول هاتنه ڤه‌كرن و گۆت: (وه‌كو قووناغا ئێكێ دو سه‌نته‌ر ل باژێرێ دهۆكێ و ئێك ژی ل سه‌نته‌رێ ده‌ڤه‌رداریا ئاكرێ و ئێك ژی ل ئامێدیێ هاتنه ڤه‌كرن، دیسا د پلان دایه زێده‌تر ئه‌ڤ جۆره سه‌نته‌ره بۆ خزمه‌تا جڤاكی بهێنه ڤه‌كرن).
