عه‌لی حسێن:نابیت پارتی و ئێكه‌تی مه‌رجان بۆ هه‌ڤدو دانن
ئه‌ڤرۆ:
ئه‌ندامێ مه‌كته‌با سیاسی یا پارتی دیموكراتی كوردستان و به‌رپرسێ ڕێكخستنا سلێمانیێ- هه‌له‌بجه یا پارتی ڕاگه‌هاند، نابیت پارتی و ئێكه‌تی بۆ ئه‌نجامدانا كۆمبوونێ و چاره‌سه‌ركرنا كێشه‌یێن هه‌لاویستی مه‌رجان بۆ هه‌ڤدو دانن.
عه‌لی حسێن، ئه‌ندامێ مه‌كته‌با سیاسی یا پارتی دیموكراتی كوردستان و به‌رپرسێ ڕێكخستنا سلێمانیێ- هه‌له‌بجه یا پارتی گوت” نابیت پارتی و ئێكه‌تی بۆ ئه‌نجامدانا كۆمبوونێ و چاره‌سه‌ركرنا كێشه‌یێن هه‌لاویستی مه‌رجان بۆ هه‌ڤدو دانن، چونكه به‌رپرسیاره‌تیا هه‌ڤپشك و خالێن هه‌ڤپشك د ناڤبه‌را وان دا هه‌نه”.
ل دۆر ئه‌نجامدانا كۆمبوونێ ل گه‌ل ئێكه‌تی نیشتمانی كوردستان، عه‌لی حسێن دبێژیت” د ده‌مێ بۆری دا مه كۆمبوون ل گه‌ل ئێكه‌تیێ هه‌بوون، نوكه ژی یێن هه‌ین و ل پاشه‌ڕۆژێ دا ژی دێ هه‌بن، دێ هاریكارێن هه‌ڤدو بین و به‌رپرسیاره‌تی ژی یا ل سه‌ر ملێن مه و دێ دانوستاندنێ كێشه‌یان ل گه‌ل ئێكه‌تیێ چاره‌سه‌ركه‌ین”.
سه‌باره‌ت ناكۆكیێن د ناڤبه‌را پارتی و ئێكه‌تیێ دا ئاماژه‌كر ب وێ چه‌ندێ كر كو ئه‌زموون یا هه‌ی ناكۆكی زیانێ ب به‌رژه‌وه‌ندیێن هه‌رێما كوردستانێ و هه‌ردو ئالیان گه‌هاندیه، هه‌روه‌سا ب دانوستاندنێ و پێكڤه‌كاركرنێ خزمه‌تا ئه‌زموونا هه‌رێما كوردستانێ كریه”.
ڕۆهنكر ژی” سه‌ره‌رای ناكۆكیان، به‌لێ خالێن هه‌ڤپشك ژی د ناڤبه‌را پارتی و ئێكه‌تیێ دا یێن هه‌ین و بۆچوونا سه‌ركردایه‌تیا پارتی پێكڤه‌كاركرنه”.
پتر گوت” پشتی گرێدانا كۆنگره‌یێ 14 یێ پارتی، سه‌ركردایه‌تیا پارتی بڕیاردایه ل گه‌ل هه‌موو ئالیێن سیاسی ل هه‌رێما كوردستانێ و ب تایبه‌ت ل گه‌ل ئێكه‌تی نیشتمانی كوردستان كۆمببیت”.
