ل كیڤە دژی؟
خەلات محەمەد
ل بەر پەنچەرەیێ دنێرم تەنابینم
جهێ تو لێ دژی كیڤەیە؟
گەڕیام و وەستانێ بێزار كرم
تو ل كیڤەی؟
ما ئێك ب ئێكە؟!
ژمێژەیە تو وندا
وەرە دگەل ئەلندا
و رحا من ژ تارستانا تنێبوونێ قورتال بكە.
ژمێژە یە تە بەژنا خوە هنداڤی من نەكریە ئەور
وتێهنا هاڤیبوونا من ب دلنازیا خوە ئاڤ بدی
ما تە بریار دایە دەرگەهێن بەری بگری؟!
یان گونەهەك ل سەر پەروازێ دلێ من بوویە حەز
و تە هەست پێكریە؟!
تو ل زڤستانا من شەڤبێریا مێویژ و گیزی
تو ل بوهارا عەشقا من ئاگرێ ئازادیێ و ئاشتییێ
تو ل هاڤینا من سیبەرا دار سپیندار و چنارێی
تنێ ل پایزا تە، ئەز تەمەنێ خوە د دانم ل بەر بەژناتە
تو دزانی؟
ل هەر چار پەروازێن دلێ من تو پەرینازی
ل ئێك پارچەیا من تو خوین و لاشی
ل دوماهیا قەدەرا ڤەدقەتن رزق و قەدر
ل داویا شەڤان رۆندك و خەیال شەڤێن قەدرێ نە
تو ل كیڤەی؟
تو دزانی؟
ئەز ئەوم یێ ب هەمی هەست و حەز
گۆتیە تە تو سەروەر و وەلات و ئاخا منی
دێ خوە ل رحا من دیاربكە
هندی خەریبم هەر وەكو دینەكی
ل دلۆڤانیێ دگەرم
وەك خازۆكەكی دگەرم ب تنێ بۆ دیتنا تە.
