ب بەزین؟
بلند محمد
دا ب بەزین
و تۆزا دەمی بكەینە گولاڤ
زەمینی ب پێچین و
بكەینە پێلاڤ،
دا ب بەزین
رۆگەها سۆلا مە با بیت
ل سەر چەنگێن بارۆڤێ بچین و
غاردانێ بكەینە شۆرەش
گاڤا مە ب تۆز و گەرما بیت
بەردەینە دەڤێ ڤێ قەهرێ
و ل عەردێ نفرەتێ گولەكێ بچینین
و سینگێ مە باخچەیێ چەما بیت.
های ژێ هەبە
گاڤێن مە سیبەرەك شۆپاند
سەرهلدانەك قولپاند
و نیگارەك ژ ئەڤینێ دالەقاند.
نەرم نەرم،
پرچا تە ب من ڤە ڤەدزەلی
وەكی تاڤیەكا هاڤینی گەرم
ل سەر هەستێن من دباری،
تو دبەزی و ل پەی تە ڤەدگەرم
ببۆرە، من درەوەكا سپی ل تە كر
نەشیام ببمە قارەمان و
ژ تە ببۆرم
ئەم یێن ل سەر درەوا ئاڤابووین
بووینە دار و د شەڤێن بێ ستێر دا
درەوین و
ب هلما خوە دسارین
ئاخ ژی مە راناگریت و دەم یێ خاپینۆكە.
تە گۆت
دا ببەزین
ب قاسی سنێلەییا خوە بكەنین
ئێڤەلی ببین
د كۆلانكێن تەنگ دا خوە بخشینین
و وەكو پێلەكێ ب خیچا داوییێ بكەڤین.
بەزینێ بكەینە سەما
بكەینە سەوكەكا سۆتی
بكەینە ستێر و پاڤێژین خەما
و د شەڤێن عاشق دا
دجڤینەكا ماچا وەركەین
و ژ نەهشییێ ئاڤا كەین دەما.
ل بایی سوار بە
نفرینا بێخە
ل بەر ڤا دیواركێن نەتەبتی
بێهنا خوە ڤەنادەین،
هێلا داویێ مە نیگار نەكرە
دا كو ل خالەكێ راوەستین.
ل هەوران سواربە
وەرە ببارینە سەر كاڤلێن كزگریۆك
و رێكێن بەرزە بكەینە لاڤژ
بكەینە مەلهەم و شۆپێن وەستیایی ئارام كەین،
و رادەین وێ چیڕۆكا
ل بەر لەعنەتان پش.
ل دەریایان سواربە
پارچەیێن دلی بكە كەشتی
بكە بێڕك و پێلان پالدە
چ دەما گەهشتی
سڤك ب سینگێ من ڤە كوت بە
ئای ژ تە یا دوور
ئای ژ تە یا بەهشتی.
تە بیرتێتن؟
ئەم بەزین و
بیردانكێ گول درشتن
جانەك ب مژێ وەردكر
و خەم دهشتن
هەموو زەمین دبوو ستران و
ب بەژنا تەڤە دهلاویست
ئاوازەك دڤەستری
دكرە مارش
دكرە سەردێر
و لەپێن من ژ یادگارێن تنێبوونێ مشتن.
خەونەكێ بهلچنە
رۆندكەك سار
د پاخلێن جاددەیەكا نەفام دا بكە چیڕۆك
بكە دۆز
بكە بیرۆك
ئەی نهێنییا پیرۆز
ئەزێ ل هیڤییا غاردانەكا سپی
تنگژینێن مە بكەتە دیرۆك.
بەرا من را بكە
تۆزا خوە پاڤێ سەر مژیلانكا
مۆرانا ڤێ چیڕۆكێ دێ كەینە ئەفسانە
دا هەردەم ل شۆپێن تە بگەڕهم و
چ جار نەبمە لێبۆك.
