د شەڤبێریەكا رەوشنبیری دا ل سێمێلێ دو سمینار و خەلاتەكێ رێزگرتنێ
ئەڤرۆ
خالد عەلی
سەرانسەری شەڤێن رەمەزانا پیرۆز یا ئەڤ سالە هەڤدەم دگەل بیرەوەریێن ئادارێ د سەقایێ ناڤنچی یێ بهارێ دا، رێڤەبەریا رەوشەنبیری و هونەری ل سێمێلی شەڤبێرێن ئەدەبی سازدكت، ل رۆژا 8/4/2023 ژی شەڤبێریەكا جیاواز هاتە ئەنجام دان ب پشكداریا دو نڤیسەرێن بەرنیاسێن دەڤەرا دهۆكێ، شەڤبێری ل سەر سێ پەنەلان هاتە دابەشكرن، د پەنەلێ ئێكێ دا نڤیسەر و زمانزانێ ژێهاتی (فازل عوەمەر) سمینارەك دەربارەیی ژێبوون- ژێهاتی( انتما‌و)ا نەتەوەیی وئاستەنگێن وێ پێشكێكر وتێدا چەند ئێستگەهێن دیرۆكی وباگراوەندێن رهوریشالی یێن ڤێ پەیڤێ د چارچۆڤەیێ وێ یێ جڤاكی، دیرۆكی و زمانزانی دا نیشا دا، زێدەباری ئەو بنەمایێن ئەڤ پەیڤە ل سەر ئاڤا بووی وەك پێدڤیبوونەكا مرۆڤا بۆ ژێبوونێ وجۆرێن وێ ژێبوونێ دا دیار كرن، هەر وەسا باس ل سێگۆشیا كارا یا ژێبوونێ كر و چەند تیرۆژك ل سەر كارتێكرنا ژێبوونا ئاینی- ساسیی- مرڤایەتی ل سەر تاكەكەسێ كورد دانان. ناڤهاتی دیاركر كو ژێبوون هەستكرنە، ل سەر بنەمالیەكێ ماددی ئاڤا دبیت. وچەندەكێ باسێ لاوازبوونا ژێبوونێ وپەیوەندیا وێ دگەل نەبوونا دەولەتەكا كوردی نەخاسمە ژێبوون وەك تێگەهێ سەرەكی ب ئەردی و پێدانا وێ ڤە گرێدای، و چاوا نەبوونا كیانەكی كوردی یێ سەربەخۆ كارتێكرن ل سەر لاوزابوونا ژێبوونا مرۆڤێ كورد كریە.هەر وەسا باسێ رۆلێ شۆرشا ئیلۆنێ د گەشكرنا ژێبوونا كەسێ كورد ل سەرانسەری هەر چار پارچەیێن كوردستانێ دا كر وچاوا ناكۆكیێن وپارچەبوونا سیاسی وپارتاتی جارەكا دی ئەو(انتما‌و) لاوازا كرڤە و ئەو رەوشە ل سەر كەتوارێ نوكە یێ كوردستانێ بەرجستە كر، كو ژێبوونا نەتەوەیی بەرەڤ ژێبوونا پارتاتی ڤە چوو. هەر وەسا ژ ئاستەنگێن دی یێن لاوزابوونا ژێبوونا نەتەوەیی، باس ل نەبوونا سیستەمێ پەروەردەیی یێ كەشكرنا ژێبوونا نەتەوەیی كر. زێدباری كاتێكرنا ئەنترنێت ژی ب شێویەیكی گشتی كا چاوا رەوشەك هاندەر پەیدا كر كو ژێبوونا نەتەوەی ل هەمی جیهانێ لاواز ببت.
دپەنەلێ دوێ دا، نڤیسەر وهەلبەستڤانێ بەرنیاسێ دەڤەرا دهۆكێ (عارف حیتۆ)، سیمنارەك پێشكێكر تێدا باسێ سەربۆرا خوە یا نڤیسینێ كر وەك دەستپیكا نڤیسنا خوە و پیڤاژۆیا كارێ خوە یێ نڤیسنا هەلبەستێ كر. ژ سەربۆرێن سەرەكی یێ باس لێ كری، نڤیسنا شیعرێ ژ ئالیێ دو شاعیران ڤە و چاوا وی و نڤیسەر (هەلبەستڤان)ی ئەڤ سەبۆرە ئەنجام دا، سەبۆرا دوێ باس ل پەرتووكا خوە یا هەڤپشك دگەل هەلبەستڤان شەمال ئاكرەیی كر، كا چاوا ئەو دیوانا هەڤپشك ل سەر ستایلێ چارینە وهاڤێتنا ل بەر ئێك نڤیسن و بەلاڤ بووی.، ل دوماهیكا سمینارێ خوە، ناڤهاتی چەند هەلبەست بۆ ئامادەبوویان خواند.
ل دوماهیكێ وەكو رێزگرتنا سالانە یا خەلاتكرنا كەسایەتیێن رەوشەنبیری و هونەری، رێڤەبەرێ رەوشەنبیربا سێمێلێ وچیرۆكنڤیسێ هێژا ئیسماعیل هاجانی، میدالیا زێری ب نڤیسەر و فلكلورناسێ دەڤەرا دهۆكێ بەرێز(حجی جەعفەر) بەخشی، ژبەر رۆلێ وی یێ مەزن و بزاڤ و چالاكیێن وی یێن بەرچاڤ.
