فـاکتەرێن ناڤخوە و دەرڤـە د بەرژەوەندیـا ئەردۆگـانی دا نینن
ئەڤرۆ
ڤەکۆلەرەکێ ناڤدار یێ تورکیا دیار دکەت، هەلبژارتنێن ڤێجارێ وەکو چو هەلبژارتنێن بۆری نابن، چونکی ڤێجارێ هەم ئۆپۆزسیۆنەکا بهێز ل دژی ئەردۆغانی هەیە و هەم فاکتەرێن ناڤخوە و دەرڤە د بەرژەوەندیا ئەردۆغانی دا نینن، ڤێجارێ شانسێ ئەردۆغانی گەلەک کێمە و زەحمەتە جارەکا دی ببیتە سەرۆک کۆمارێ تورکیا.
سایگی ئۆزتورک نڤیسەر و ڤەکۆلەرێ ناڤدار یێ تورکیا راگەهاند، فاکتەرێن ناڤخوە و دەرڤە ڤێجارێ د بەرژەوەندیا ئەردۆغانی دا نینن، هەکە ئەم بەحسێ فاکتەرێن دەرڤە بکەین، ئەمریکا و وەلاتێن ئێکەتیا ئۆرۆپا ڤێجارێ ناخوازن ئەردۆغان ببیتە سەرۆک کۆمارێ تورکیا، چونکی د چەند سالێن بۆری دا ئەردۆغانی گەلەک ئاریشە بۆ ئەمریکا و وەلاتێن ئێکەتیا ئۆرۆپا دروست کرینە، هەری دووماهیێ ژی ژ بەر شەرێ ل ئۆکرانیایێ ئەردۆغانی گەلەک خۆ نێزیکی رۆسیا کریە، ئەو یەک ژی بوویە ئەگەرێ هندێ وەلاتێن ئێکەتیا ئۆرۆپا و ئەمریکا ژ ئەردۆغانی و دەستهەلاتا وی توورە ببن.
ناڤهاتی ئەو یەک ژی دیار کر، نها پەیوەندیێن تورکیا ل گەل پڕانیا وەلاتێن عەرەبی د باش نینن، دەستێوەردانێن تورکیا ل سووریێ، لیبیا و هندەک وەلاتێن دی یێن عەرەبی وەسا کر هەر زوو بەرەیەک ل دژی تورکیا دروست ببیت، هەرچەندە دەمەکە تورکیا دڤێت خۆ نێزیکی سووریێ و هندەک وەلاتێن دی یێن عەرەبی بکەت، لێ هەتا نها ژی د بزاڤێن خۆ دا سەرکەفتی نەبوویە، نموونا هەری بەرچاڤ ژی هەتا نها بەشار ئەسەدێ سەرۆکێ سووریێ بەرهەڤ نینە بێی مەرج ل گەل تورکیا دەست ب قۆناغەکا نوو بکەت.
ڤەکۆلەرێ تورکیا سەبارەت ب فاکتەرێن ناڤخوەیی ژی دیار دکەت، رەوشا ئابووری یا تورکیا گەلەک خرابە، بەری نها کوردان پشتەڤانی ل ئەردۆغانی دکرن، لێ نها رەوش ب تەمامی هاتیە گوهۆڕین، چونکی ئەردۆغانی بەری نها گەلەک سۆز دانە کوردان، لێ سۆزێن خۆ بجه نەئینان و ژ بەر هندێ ژی ڤێجارێ کورد پشتەڤانیێ لێ ناکەن و ئەو یەک ژی فاکتەرەک گەلەک بهێزە، کو دێ وەسا کەت شانسێ ئەردۆغانی ڤێجارێ گەلەک کێم بیت، چونکی د پڕانیا هەلبژارتنێن بۆری دا ژ بەر دەنگێن کوردان ئەردۆغانی شیا ببیتە پارتیا ئێکێ ل سەر ئاستێ تورکیا، لێ ڤێجارێ رەوش ب تەمامی هاتیە گوهۆڕین.
ل گۆر باوەریا ڤەکۆلەرێ تورک، هەکە نها ل تورکیا هەلبژارتن بهێنە کرن هەڤپەیمانیا جمهور یا کو ئەردۆغان سەرۆکاتیا وی دکەت تنێ دێ شێت ٢٠٤ کورسیێن پەرلەمانی بدەستڤە بینیت، ل هەمبەر دا هەڤپەیمانیا مللەت یا ب سەرۆکاتیا کەمال کلچدار ئوغلۆ دێ شێت ٢٤٦ کورسیان بدەستڤە بینیت، هەروەسا ژ بۆ هەلبژارتنێن سەرۆک کۆماریێ ژی نها شانسێ کەمال کلچدار ئوغلۆی زێدەترە، ئانکۆ ب کورتی خەلکێ تورکیا داخوازا گوهۆڕینان دکەن و گوهۆڕینێن ڤێجارێ د بەرژەوەندیا ئەردۆغانی دا نینن، هەکە ئۆپۆزسیۆنا تورکیا یا ب سەرۆکاتیا کەمال کلچدار ئوغلۆ بەری هەلبژارتنان چو شاشیێن مەزن نەکەت، ڤێجارێ دێ ئاکپارتی و ئەردۆغانی ژ دەستهەلاتێ هێنە دوورخستن.
