ئەنجامێ هەلبژارتنان دێ کاریگەریەکا مەزن ل پاشەرۆژا تورکیا و کوردان کەت
ئەڤرۆ
دوهی هەلبژارتنێن سەرۆک کۆماریێ و پەرلەمانی ل تورکیا و باکورێ کوردستانێ هاتنە کرن، ل گەلەک باژێرێن باکورێ کوردستانێ وەلاتی ب جلکێن کوردی چوونە سەر سندۆقێن دەنگدانێ و داخوازا گوهۆڕینا سیستەمێ سیاسی یێ تورکیا کرن، رەجەب تەیب ئەردۆغان و کەمال کلچدار ئۆغلۆ ژی پشتی دەنگدانێ د پەیامێن جودا دا داخواز کرن هەلبژارتن د بەرژەوەندیا هەموو گەلێ تورکیا دا بیت.
دوهی هەلبژارتنێن سەرۆک کۆماریێ و پەرلەمانی ل تورکیا هاتنە کرن، رەجەب تەیب ئەردۆغانی سەرۆک کۆمارێ تورکیا پشتی دەنگدانێ راگەهاند، هەتا نها پرۆسێسا دەنگدانێ ب رەنگەکێ باش برێڤە دچیت و داخوازا سەرکەفتنێ بۆ هەموو ئەندامێن کۆمسیۆنا هەلبژارتنان کر و راگەهاند، هێڤیدارین هەلبژارتن د بەرژەوەندیا هەموو گەلێ تورکیا دا بیت، مە دڤێت گەلێ تورکیا دیموکراسیا تورکیا نیشا هەموو جیهانێ بدەن و گۆت: (ل دەڤەرێن کو بەری نها بیڤەلەرزێ لێ دابوو ژی خەلک چووینە سەر سندوقێن دەنگدانێ و ئەو یەک ژی گەلەک گرنگە، هێڤیدارن پرۆسێسا دەنگدانێ دوور ژ ئالۆزیان برێڤە بچیت).
ل ئالیێ دی کەمال کلچدار ئۆغلۆ بەربژارێ ئۆپۆزسیۆنا تورکیا بۆ پۆستێ سەرۆک کۆماریا تورکیا ژی پشتی دەنگدانێ راگەهاند، ئێدی دەم یێ هاتی ل تورکیا گوهۆڕینێن مەزن روو بدەن، مە دڤێت بهار و دیموکراسی بهێنە تورکیا، دەمەکە خەلکێ تورکیا چاڤەرێی دیموکراسیێ نە، براستی ژی پێدڤیا تورکیا ب گوهۆڕینێن مەزن هەیە، ژ بەر هندێ ژی هەلبژارتنێن ڤێجارێ دێ گەلەک ژ هەلبژارتنێن چەندین سالێن بۆری جوداتر بن و گۆت: (بێگومان مە دڤێت ئەم پێکڤە تورکیا بکەینە وەلاتەکێ خوەش بۆ ژیانێ، ژ بەر هندێ ژی مە دڤێت دیموکراسی و پێکڤەژیان ل تورکیا ببیتە ژێدەرێ هەموو تشتەکێ، هێڤیدارین هەلبژارتنێن ڤێجارێ ببیتە ئەگەرێ دەستپێکرنا قۆناغەکا نوو بۆ هەموو گەلێ تورکیا).
پەروین بولدان هەڤسەرۆکا هەدەپێ ژی پشتی دەنگدانێ بۆ دەزگەهێن راگەهاندنێ دیار کر، مە دڤێت ڤێجارێ سیستەمێ تورکیا بهێتە گوهۆرین، مە دڤێت دەنگێ مە بۆ ئاشتیێ، بۆ دیموکراسیێ و ئازادیێ بیت، پێدڤیا تورکیا ب ئاشتیێ هەیە، مە دڤێت ڤێجارێ گوهۆڕینێن مەزن ل تورکیا روو بدەن، خەلکێ تورکیا ژ سیستەمێ نها بێزار بووینە، ژ بەر هندێ ژی ئەم چاڤەرێین ڤێجارێ تشتێن باش ل تورکیا روو بدەن.
هەژی ئاماژەپێدانێ یە د هەلبژارتنێن ڤێجارێ ل گەلەک باژێرێن کوردی یێن باکورێ کوردستانێ دا وەلاتی ب جلکێن کوردی چوونە سەر سندوقێن دەنگدانێ و پشتی دەنگدانێ ژی داخوازا گوهۆڕینا سیستەمێ نها یێ تورکیا کرن، وەلاتیێن کورد دیار کرن، ئێدی سەردەمێ دەستهەلاتا ئەردۆغانی ب دووماهی هاتیە، دڤێت ئەردۆغان ل سەر دەستهەلاتێ نەمینیت، چونکی د چەند سالێن دووماهیێ دا ئەردۆغانی گەلەک دوژمناتیا کوردان کریە و زیانێن مەزن گەهاندینە کوردان ل باکور، رۆژئاڤا و هەرێما کوردستانێ، ژ بەر هندێ ژی دڤێت ئەردۆغان ژ دەستهەلاتێ بهێتە دوورخستن.
هەتا دەمی ئامادەکرنا ڤێ راپۆرتێ رێژا پشکداریا وەلاتیان ل هەموو تورکیا گەلەک باش بوو، ب تایبەتی ژی ل دەڤەرێن کوردی رێژەکا مەزن وەلاتی پشکداری د هەلبژارتنان دا کرینە، هندەک دیمەن د تۆرێن جڤاکی دا بەلاڤ بوون، کو نیشا ددەن هندەک وەلاتی سەرەرای هندێ رەوشا وان یا ساخلەمیێ باش نینە لێ دیسان ژی پشکداری د هەلبژارتنان دا کرینە.
چاڤدێرێن سیاسی ل تورکیا و باکورێ کوردستانێ ژی دیار دکەن، هەلبژارتنێن ڤێجارێ گەلەک جودانە، چونکی رێژەکا مەزن یا وەلاتیێن تورکیا داخوازا گوهۆڕینان دکەن، هەروەسا ڤێجارێ هەڤڕکیەکا گەلەک مەزن د ناڤبەرا ئەردۆغانی و کلچدار ئۆغلۆیی دا هەیە، ژ بەر هندێ ژی رێژا پشکداریا وەلاتیان د هەلبژارتنان دا ڤێجارێ یا باش بوو.
ل گۆر باوەریا چاڤدێرێن سیاسی ل تورکیا و باکورێ کوردستانێ، هەلبژارتنێن ڤێجارێ دێ کاریگەریەکا خوە یا مەزن ل سەر پاشەرۆژا تورکیا و پرسا کوردی هەبیت، هەکە کلچدار ئۆغلۆ ببیتە سەرۆک کۆمارێ تورکیا دێ نەچار بیت دەست ب هندەک گوهۆڕینان بکەت و هەکە ئەردۆغان ژی ببیتە سەرۆک کۆمار ڤێجارێ دێ نەچار بیت گوهۆڕینان بکەت، چونکی ڤێجارێ سەرکەفتنا ئەردۆغانی وەکو هەلبژارتنێن بۆری یا ب ساناهی نابیت.
دەزگەهێن راگەهاندنا جیهانی ژی ب گرنگی بەحسێ هەلبژارتنێن ڤێجارێ یێن تورکیا دکەن، ئاژانسا رویترز د راپۆرتەکێ دا دیار کریە، رێژەکا بەرچاڤ ژ خەلکێ تورکیا دخوازن دووماهیێ ب دەستهەلاتا ئەردۆغانی بینن، لێ ئەو یەک ب ساناهی نابیت، چونکی ئەردۆغانی د دەمێ بیست سالێن بۆری دا دەستکاری د گەلەک سازیێن دەولەتێ دا کریە، نها ل سازیێن لەشکری هەتا دادگەهان ل ژێر دەستێ ئەردۆغانی دانە، ژ بەر هندێ ژی ئەردۆغان ب ساناهی دەست ژ دەستهەلاتێ بەرنادەت.
هەمان ئاژانسێ ئەو یەک ژی دیار کریە، هەکە ئەردۆغان ڤێجارێ ببیتە سەرۆک کۆمار ژی دێ پێگەهێ وی یێ لاواز بیت، چونکی گەلەک زەحمەتە ئەردۆغان بشێت وەکو جارێن بۆری رێژەکا باش یا دەنگان بدەستڤە بینیت، ژ بەر هندێ ژی ئەنجامێ هەلبژارتنێن ڤێجارێ یێن تورکیا هەر چ بیت ژی دێ گوهۆڕینێن بەرچاڤ ل تورکیا روو دەن.
رۆژناما تایمز یا بریتانی ژی د راپۆرتەکێ دا دیار کریە، هەلبژارتنێن ڤێجارێ د دەمەکێ دا دهێنە کرن کو رەوشا ئابووری یا تورکیا گەلەک خرابە، هەروەسا تورکیا د سیاسەتا دەرڤە دا تووشی قەیرانەکا مەزن یا هاتی و د رەوشا نها دا پەیوەندیێن تورکیا ل گەل پڕانیا وەلاتێن ئێکەتیا ئۆرۆپا د باش نینن، ژ بەر هندێ ژی ڤێجارێ سەرکەفتنا ئەردۆغانی یا ب ساناهی نابیت، چونکی ڤێجارێ بەربژارێ ئۆپۆزسیۆنێ گەلەک بهێزە و هەروەسا ژ بەر رەوشا خراب یا ناڤخوەیی وەلاتیێن تورکیا وەکو جارێن بۆری پشتەڤانیا ئەردۆغانی ناکەن.
رۆژناما واشنتۆن پۆست ژی د راپۆرتەکێ دا بەحسێ هندێ کریە، هەلبژارتنێن ڤێجارێ بۆ ئەردۆغانی و حزبا وی ب ساناهی نابن، چونکی ژ بەر گەندەلیێ و رەوشا خراب یا ئابووری ڤێجارێ خەلک وەکو هەلبژارتنێن بۆری پشتەڤانیێ ل ئەردۆغانی و پارتیا وی ناکەن، هەروەسا ژ بەر نێزیکبوونا ئەردۆغانی یا بۆ رۆسیا ژی ڤێجارێ پڕانیا وەلاتێن ئێکەتیا ئۆرۆپا دخوازن ئەردۆغان ل سەر دەستهەلاتێ نەمینیت، وەلاتیێن تورکیا یێن ل ئەمریکا و ئۆرۆپا ڤێجارێ وەکو جارێن بۆری پشتەڤانی ل ئەردۆغانی نەکرن، ژ بەر هندێ ژی هەلبژارتنێن ڤێجارێ ل تورکیا دێ گەلەک جودا بن، ئەنجامێ هەلبژارتنان دێ کاریگەریەکا خوە یا مەزن ل سەر سیاسەتا دەرڤە و ناڤخوەیی یا تورکیا هەبیت.
