ئەنجامێ هەلبژارتنان دێ کاریگەریەکا خراب ل ژیانا مە کەت
عەلی باریش وەلاتیێ باژێرێ ئامەدێ یێ باکورێ کوردستانێ دیار دکەت، ل ئامەدێ خەلکی پشتەڤانیا کلچدار ئۆغلۆی کرن، لێ د ئەنجام دا نها ئەردۆغان سەرکەفت، ئەو یەک دێ بۆ هەموو کوردان ل تورکیا یا خراب بیت، چونکی پرانیا کوردان د هەلبژارتنان دا پشتەڤانی ل ئەردۆغانی نەکرن، دەستهەلاتا نوو ژی دێ ب رەنگەکێ خراب سەرەدەریێ ل گەل کوردان کەت، نها ژی رەوشا باژێرێن کوردی ل باکورێ کوردستانێ گەلەک خرابە، بێکاری گەلەک زێدە بوویە، گرنگیێ ب کوردان نادەن.
ناڤهاتی هەروەسا دیار دکەت، قۆناغا پشتی سەرکەفتنا ئەردۆغانی دێ بۆ کوردان گەلەک یا خراب بیت، ب تایبەتی ژی دێ د بیاڤێ ئابووری دا رەوش گەلەک خرابتر لێ هێت، نها وەلاتیێن کوردی بێ هێڤی نە، براستی ژی رەوشەک گەلەک خرابە، ئەو وەکو کورد باوەر ناکەن دەستهەلاتا ئاکپارتیێ چو تشتەکێ بۆ کوردان بکەت، دێ دەستهەلات هەلوەستێ خوە ل هەمبەر کوردان توندتر کەت، ئەو یەک ژی دێ بیتە ئەگەرێ هندێ ژیان بۆ کوردان ل تورکیا نەخوەشتر لێ بهێت.
مەریەم گونەش چالاکڤانا مافێن مرۆڤی ژی راگەهاند، د هەلبژارتنێن ڤێجارێ دا نێزیکی نیڤا جڤاکێ تورکیا پشتەڤانی ل ئەردۆغانی نەکرینە، ئەو یەک ژی پەیامەکا ئاشکرایە خەلک هەموو ژ ئەردۆغانی رازی نینن، ب تایبەتی ژی ل باکورێ کوردستانێ رێژەکا مەزن ژ وەلاتیێن کورد دەنگێن خوە نەداینە ئەردۆغانی، هەکە ئەردۆغانی بڤێت رەوشا تورکیا ب گشتی یا ئارام بیت دڤێت گرنگیێ بدەتە کوردان، دڤێت هزرا هندێ بکەن کا بۆچی کوردان ڤێجارێ وەکو پێدڤی پشتەڤانی ل ئەردۆغانی نەکرینە، بابەتێ هەری گرنگ ژی ئەوە کو دڤێت دەستهەلاتا تورکیا کار بۆ چارەسەرکرنا پرسا کوردی بکەت.
چاڤدێرێن سیاسی ل تورکیا و باکورێ کوردستانێ ژی وەسا دبینن، هەکە گوهۆڕین د دستوورێ تورکیا دا بهێتە کرن و دەلیڤە بۆ کوردان بهێتە پێش ئەو یەک دێ هێڤیەکا باش بۆ کوردان ل تورکیا دروست کەت، لێ رەوشا نها وەسا کریە کورد ژ دەستهەلاتێ بێ هێڤی بووینە، چونکی چو هێڤی بۆ چارەسەرکرنا پرسا کوردی نینن، ل ئالیێ دی رەوشا ئابووری یا دەڤەرێن کوردی ژی ل تورکیا گەلەک خرابە، رێژەکا مەزن ژ کوردان وەسا دبینن ژ بەر ئەنجامێن هەلبژارتنان دێ دەولەت سەرەدەریەکا خرابتر ژ سالێن بۆری ل گەل وان کەت، هەکە ئەردۆغانی بڤێت سەرەدەریەکا توند ل گەل کوردان بکەت ئەو یەک دێ بیتە ئەگەرێ هندێ رەوشا ناڤخوەیی یا تورکیا پتر ئالۆز بیت.
