رۆسیا ل بیلارۆسیا چه‌کێ ئه‌تۆمی بجهـ دکه‌ت
ب، سه‌رجان مەحمود:
ڤیلاده‌میر پۆتین سه‌رۆکێ رۆسیا پشتی کۆمبوونا ل گه‌ل لوکاشینکۆ سه‌رۆکێ بیلارۆسیا راگه‌هاند کو پلانا وان یا بجهکرنا چه‌کێ ئه‌تۆمی ل بیلارۆسیا دێ هێته بجهکرن و گۆت: (د کۆمبوونا ل سۆچی مه جاره‌کا دی ل گەل بەرێز لوکاشینکۆ بەحسێ پلانا بجهکرنا چەکێ ئەتۆمی ل بیلارۆسیا کر و ل قۆناغەکا ئێکێ دا هندەک چەک دێ هێنە بجهکرن و پاشی ژی ل گۆر پلانا مە دانایی دێ کار کەین، چو هێزەک ژی نەشێت ئاستەنگیان ل هەمبەر بەرنامێ مە دروست بکەت، چونکی نها مەترسیێن مەزن ل سەر رۆسیا هەنە و ئەم ژی نەچارین یا پێدڤی بۆ پاراستنا وەلاتێ خوە بکەین).
ل هه‌مبه‌ر داخۆیانیا ڤیلاده‌میر پۆتینێ سه‌رۆکێ رۆسیا، ئه‌مریکا و ئێکەتیا ئۆرۆپا ژی نه‌رازیبوونێن توند نیشا دان و راگه‌هاندن پلانێن پۆتینی نه ب تنێ بووینە مەترسی ل سه‌ر ئوکرانیایێ، بەلکو سەرۆکێ رۆسیا ب پلانێن خوە یێن مەترسیدار دێ زیانێ گەهینتە هەموو جیهانێ، پلانێن پۆتینی بووینە مەترسی ل سەر ئۆرۆپا و ئەمریکا و ئاشکرا کرن دێ سزایێن ئابووری و سیاسی یێن ل سه‌ر روسیا دژوارتر که‌ن، داخواز ژ سەرۆکێ رۆسیا ژی کرن بێی مه‌رج شه‌رێ ل هه‌مبه‌ر ئۆکرانیایێ راوه‌ستینیت و ده‌ست ژ پلانا بجهکرنا چه‌کێ ئه‌تۆمی ل بیلارۆسیا به‌رده‌ت.
