ئـەمــریکــا هێزێن نوو رەوانەی رۆژئاڤایێ کوردستانێ دکەت
فەرماندارەکێ ئەمریکی راگەهاند، ئیرانێ دڤێت ل باکورێ سووریێ و هندەک دەڤەرێن دی ئالۆزیان دروست بکەت و ئێرشی هێزێن وان بکەت، ل هەمبەر وێ یەکێ ژی ئەمریکا هێزێن نوو ل باکورێ سووریێ و دێرازۆرێ بجهـ دکەت و هەکە هێزێن سەر ب ئیرانێ ئێرشی هێزێن ئەمریکا بکەن دێ ب توندی بەرسڤا وان دەن.
فەرماندارەکێ ئەمریکی بۆ رۆژناما واشنتۆن پۆست یا وی وەلاتی دیار کریە، بەری نها ئیرانێ کۆمبوونەک ل گەل هێزێن چەکدارێن شیعە ل سووریێ کریە و داخواز ژ وان کریە خوە بۆ ئێرشێن بەرفرەهـ ل دژی هێزێن ئەمریکا ل سووریێ بەرهەڤ بکەن، چونکی دڤێت هێزێن ئەمریکا ل سووریێ نەمینن، پشتی وێ کۆمبوونێ ژی ئیرانێ چەکێن گران گەهاندینە گرۆپێن چەکدار و وان گرۆپان دڤێت ئێرشی هێزێن ئەمریکا بکەن.
هەمان فەرمانداری ئەو یەک ژی دیار کریە، ئەمریکا ل هەمبەر گەفێن ئیرانێ و گرۆپێن چەکدارێن سەر ب ئیرانێ ڤە دێ یا پێدڤی کەت و وەکو پێنگاڤا ئێکێ ژی ئەمریکا هێزێن نوو رەوانەی باکورێ سووریێ و هندەک دەڤەرێن نێزیکی دێرازۆرێ کرینە و هەر گەفەک ل سەر هێزێن ئەمریکا ل سووریێ دروست بیت ئەمریکا دێ ب توندی بەرسڤا هێزێن سەر ب ئیرانێ ڤە دەت.
ئەو یەک د دەمەکێ دایە کو حەفتیا بۆری هندەک ژێدەرێن میدیایی ل سووریێ و رۆژئاڤایێ کوردستانێ دیار کرن، ئیران، رۆسیا و رژێما بەشاری بەرهەڤیان بۆ هندێ دکەن دا ب رێیا گرۆپێن چەکدار ل سووریێ ئێرشی هێزێن ئەمریکا بکەن، چونکی رۆسیا دڤێت ئەمریکا یا نەچار بیت هەموو هێزێن خوە ل سووریێ ڤەکێشیت، چونکی رۆسیا دڤێت ل سووریێ دەست ب قۆناغەکا نوو بکەت، د پێنگاڤا ئێکێ دا رۆسیا دڤێت چو هێزێن ئەمریکا ل سووریێ نەمینن و د پێنگاڤا دویێ دا ژی رۆسیا دڤێت تورکیا و شام ب رێیا دانوستاندنان دەست ب قۆناغەکا نوو بکەن، ئەو یەک ژی بێگومان ل دژی بەرژەوەندیێن ئەمریکا یە و ئەمریکا دڤێت دەست ب هندەک گوهۆرینان بکەت و رێ نەدەت مەترسی ل سەر هێزێن وێ ل سووریێ و ب تایبەتی ژی ل رۆژئاڤایێ کوردستانێ دروست بن.
چاڤدێرێن سیاسی ژی دیار دکەن، رۆسیا دڤێت ل سووریێ هەموو گوهۆرین د بەرژەوەندیا وێ دا بن، ژ بەر هندێ ژی ل ئالیەکێ رۆسیا داخواز ژ بەشاری دکەت ل گەل تورکیا دەست ب قۆناغەکا نوو بکەت و ل ئالیێ دی ژی رۆسیا و رژێما سووریێ ل گەل ئیرانێ دخوازن ب رێیا گرۆپێن چەکدار ئالۆزیان بۆ ئەمریکا دروست بکەن دا ئەمریکا نەچار بیت هەموو هێزێن خوە ژ ئاخا سووریێ ڤەکێشیت، ئەو یەک ژی بوویە ئەگەرێ هندێ ئەمریکا هێزێن نوو ل دەڤەرێن ستراتیژی ل باکورێ سووریێ و دێرازۆرێ بجه بکەت دا رێگریێ ل پلانێن رۆسیا و ئیرانێ بکەت.
