ئیران: مە دەست ب قۆناغەکا نوو ل دەڤەرێ کریە
فەیسەل بن فەرحان وەزیرێ دەرڤە یێ سعوودیێ بەری دو رۆژان سەرەدانا ئیرانێ کر و ل گەل سەرۆک کۆمار و وەزیرێ دەرڤە یێ ئیرانێ کۆمبوو و پشتی کۆمبوونێ ژی وەزیرێ دەرڤە یێ سعوودیێ راگەهاند، نها پەیوەندیێن وەلاتێ وی ل گەل ئیرانێ د ئاستەکێ باش دانە و پشتی جەژنا قوربانێ دێ سعوودیێ بالیۆزخانا خوە ل تەهرانێ ڤەکەت و وان دڤێت پەیوەندیێن خوە یێن سیاسی و ئابووری ل گەل ئیرانێ بهێزتر بکەن.
ل ئالیێ دی ئیبراهیم رەئیسی سەرۆک کۆمارێ ئیرانێ ژی راگەهاند، وان دەست ب قۆناغەکا نوو کرینە و ژ بلی سعوودیێ وان دڤێت پەیوەندیێن خوە ل گەل هژمارەکا وەلاتێن دی یێن دەڤەرێ ژی باش بکەن، چونکی باشبوونا پەیوەندیێن ئیرانێ ل گەل سعوودیێ و وەلاتێن دی، دێ بیتە ئەگەرێ هندێ رەوشا رۆژهەلاتا ناڤین یا ئارام بیت و ئەو یەک د بەرژەوەندیا هەموو ئالیان دایە، ژ بەر هندێ ژی دڤێت سعوودیێ و وەلاتێن دی ل گۆر راستیا نوو سەرەدەریێ ل گەل ئیرانێ بکەن.
