کار بۆ دەستپێکرنا قۆناغەکا نوو ل تورکیا دهێتە کرن
پەرلەمانتارەکێ کورد یێ سەر ب ئاکپارتیێ ڤە راگەهاند، نها کار بۆ هندەک گوهۆڕینان دهێتە کرن، بێگومان دێ گەلەک گرتیێن سیاسی ژی هێنە ئازادکرن، ئەو یەک دێ رێ بۆ دەستپێکرنا قۆناغەکا نوو ل تورکیا خوەش کەت و سەبارەت ب پەکەکێ ژی راگەهاند، د رەوشەکا وەسا دا تنێ بۆ راگرتنا شەڕی دێ ل گەل پەکەکێ دانوستاندن هێنە کرن.
غالیب ئەنساری ئۆغلۆ ئەندامێ پەرلەمانێ تورکیا یێ سەر ب ئاکپارتیێ ڤە راگەهاند، نها کار بۆ لێبۆرینەکێ ل تورکیا دهێتە کرن، ئەو لێبۆرین یا گشتی نابیت لێ دێ گەلەک کەس هێنە ئازادکرن، بێگومان گەلەک کەسێن کو ژ بەر چالاکیێن سیاسی هاتینە دەستەسەرکرن ژی دێ هێنە ئازادکرن و ئەو یەک دێ بیتە ئەگەرێ دەستپێکرنا قۆناغەکا نوو ل تورکیا، چونکی نها پێدڤیا تورکیا ب دەستپێکرنا قۆناغەکا نوو یا هەی و گۆت: (دەمێ ئەم بەحسێ قۆناغەکا نوو ل تورکیا دکەین بابەت تنێ پرسا کوردی نینە، بەلکو پرسا کوردی ژی پشکەکە ژ قۆناغا نوو، مە دڤێت پرسێن نها ل تورکیا بهێنە چارەسەرکرن، ژ بۆ هندێ ژی کار بۆ قۆناغەکا نوو دهێتە کرن، ئازادکرنا گەلەک گرتیان دێ پێنگاڤا ئێکێ بیت و ل ئالیێ دی نها ب رەنگەکێ بەرفرەه کار بۆ ئامادەکرنا دستوورەکێ نوو ل تورکیا دهێتە کرن، ئەو یەک ژی بێگومان گەلەک گرنگە).
سەبارەت ب دستوورێ نوو و مافێن کوردان ژی ناڤهاتی راگەهاند، دستوورێ نها یێ تورکیا بەرهەمێ کۆدەتایا ١٢ ئیلۆنێ یا سالا ١٩٨٠ یە و دستوورێ نها بوویە ئاستەنگ ل هەمبەر چارەسەرکرنا گەلەک پرسێن تورکیا، ژ بەر هندێ ژی دەمەکە سەرۆک کۆمار ئەردۆغان دبێژیت پێدڤیا تورکیا ب دستوورەکێ نوو و دیموکرات هەیە و گۆت: (دستوورێ نوو دێ دستوورەکێ مۆدێرن و دیموکرات بیت، د دستوورێ نوو دا هەر کەس دێ گەهیتە مافێن خوە، هەموو وەلاتیێن تورکیا دێ ل هەمبەر قانوونێ وەکو ئێک بن، نابیت چو وەلاتیەک ل تورکیا ژ بەر زمان، کەلتور، بیروباوەرێن خوە یێن جودا تووشی ئاریشان ببیت، مە دڤێت دستوورێ نوو یێ تورکیا دەستوورەک سەردەمیانە بیت، وەکو گەلەک ژ وەلاتێن ئۆرۆپا، ئانکۆ هەموو وەلاتی دێ خوەدان هەمان ماف بن، بێگومان ئەو یەک دێ بیتە ژێدەرێ چارەسەریا هەموو پرسێن نها یێن تورکیا و ب تایبەتی ژی پرسا کوردی).
غالیب ئەنساری ئۆغلۆ ئەو یەک ژی دیار کر، بەری نها ئاکپارتیێ دەست ب قۆناغا ئاشتیێ کر و بێگومان سەبارەت ب پرسا کوردی ل تورکیا کارێن باش ژی هاتینە کرن، نها د کابینا حوکمەتێ دا چەند وەزیرێن کورد هەنە و هەروەسا د ناڤ پەرلەمانێ تورکیا دا هژمارەک زێدە ئەندامێن پەرلەمانی کوردن و چو ئاستەنگی ژی ل هەمبەر زمانێ کوردی نینن، لێ پەکەکێ ئاریشە دروست کرن و نەهێلا قۆناغا ئاشتیێ وەکو پێدڤی بەر ب پێشڤە بچیت و ژ بەر هندێ ژی ئالۆزی دروست بوون و قۆناغا ئاشتیێ هاتە راگرتن، لێ ڤێجارێ دێ ب رەنگەکێ دی کار هێتە کرن و گۆت: (رەنگە تنێ ژ بۆ راگرتنا شەری و توندوتیژیێ دانوستاندن ل گەل پەکەکێ بهێنە کرن، وەکو دی دەولەتێ پرۆژێ خوە هەیە و دێ ب رێیا دستوورەکێ نوو بزاڤا هندێ کەت هەموو پرسێن هەی ل تورکیا بهێنە چارەسەرکرن).
ئەو یەک د دەمەکێ دایە حەفتیا بۆری موسلیم دۆغان وەزیرێ بەرێ یێ حوکمەتا تورکیا دیار کربوو، نها کار بۆ لێبۆرینا گشتی ل تورکیا دهێتە کرن و گەلەک گرتیێن سیاسی د ناڤ وان دا سەلاحەدین دەمیرتاش ژی دێ هێنە ئازادکرن و هەروەسا ئاکپارتی ب هەموو رەنگەکێ کار بۆ دستوورەکێ نوو و دیموکراتی دکەت، ب رێیا دستوورێ نوو ژی گەلەک پرسێن نها ل تورکیا ب تایبەتی ژی پرسا کوردی دێ هێنە چارەسەرکرن، ئەو یەک ژی گەلەک گرنگە، پارتیێن ئۆپۆزسیۆنێ ژی پشتەڤانیێ ل بابەتێ لێبۆرینا گشتی و هەروەسا دستوورەکێ نوو دکەن، چونکی ئەو یەک دێ بیتە ئەگەرێ هندێ تورکیا بەر ب پێشڤە بچیت، ب رێیا دستوورەکێ نوو و دیموکرات دێ تورکیا پتر نێزیکی ئۆرۆپا بیت، دڤێت دستوورێ نوو ببیتە ژێدەرێ چارەسەریا هەموو پرسێن نها ل تورکیا، هەکە ئاکپارتی بشێت کارەکێ وەسا بکەت دێ تورکیا بیتە ئێک ژ وەلاتێن هەری پێشکەفتی و خوەدانا دستوورەکێ مۆدێرن و دیموکرات ل دەڤەرێ.
هندەک ژ سەرکردێن ئۆپۆزسیۆنا تورکیا ژی دیار دکەن، دڤێت بەری هەر تشتەکێ ئاکپارتی ئارمانجا خوە ژ دستوورێ نوو بۆ رایا گشتی یا تورکیا ئاشکرا بکەت، چونکی ئۆپۆزسیۆنێ نەڤێت پشتەڤانیێ ل دستوورەکێ بکەت کو ئارمانجا وێ خزمەتکرنا ئاکپارتیێ و ئەردۆغانی بیت.
