شەڕێ گرۆپێ ڤاگنەر دێ هەڤسەنگیێن سیاسی ل رۆسیا گوهۆڕیت
هۆشەنگ تاجر:
چاڤدێرێن سیاسی دیار دکەن گرۆپێ ڤاگنەر شەڕ ل دژی پۆتینی راگەهاندیە و دڤێت پۆتین ل سەر دەستهەلاتێ نەمینیت، ئەو یەک دێ بیتە ئەگەرێ گوهۆڕینا هەڤسەنگیێن سیاسی ل رۆسیا، چونکی شەرێ نها د ناڤبەرا لەشکرێ رۆسیا و گرۆپێ ڤاگنەر دێ کاریگەریەکا مەزن ل شەرێ نها ل ئۆکرانیایێ کەت و ئەو یەک د بەرژەوەندیا وەلاتێن رۆژئاڤایی دایە.
ماردین رەحیم نەژاد چاڤدێرێ سیاسی راگەهاند، رۆسیا وەسا هزر دکر دێ شێت ب رێیا چەکدارێن ب پارە و هەروەسا لەشکرێ خوە د دەمەکێ نێزیک دا ئۆکرانیایێ ب تەمامی کۆنترۆل کەت، ژ بەر هندی ژی وان حسابا شەرەکێ دەمدرێژ نەکربوون، یێن ڤێ دووماهیێ ژی رۆلەکێ کاریگەر د شەڕێ ل ئۆکرانیایێ دا دگێران گرۆپێ ڤاگنەر بوون، لێ چونکی ئەو گرۆپە بۆ پارەیی شەڕی دکەن و وان ئارمانجەکا دی نینە، ژ بەر هندێ ژی پشتی شەڕێ ل ئۆکرانیایێ بۆ دەمەکێ درێژ ڤەکێشا هندەک گوهۆڕینێن دی روودان و رەوش ب تەمامی هاتە گوهۆڕین و گۆت: (وەلاتێن رۆژئاڤایی ب رەنگەکێ باش حسابا گەلەک تشتان کرن، ب رەنگەکێ نەراستەوخوە هاریکاریا ئۆکرانیایێ کرن، هەموو چەکێن گران و مودێرن دانە ئۆکرانیایێ دا شەڕ بۆ دەمەکێ درێژ یا بەردەوام بیت، چونکی وان هزرا هندێ کربوون هەکە شەڕ بۆ دەمەکێ درێژ یا بەردەوام بیت دێ کاریگەریا خوە یا جودا هەبیت و دێ ناکۆکیێن مەزن د ناڤ رۆسیا دا روو دەن، یا نها ئەم دبینین ژی وەسایە، گرۆپێ ڤاگنەر ئانکۆ چەکدارێن ب پارە ئێدی بەرهەڤ نینن گۆهداریا فەرمانێن پۆتینی بکەن و ل دژی پۆتینی و دەستهەلاتا وی دەست ب شەڕی کرینە، دیارە چەکێن باش ژی ل بەر دەستێ وان هەنە و هەکە شەڕ بۆ دەمەکێ ڤەکێشیت رەنگە ل رۆسیا گوهۆڕینێن مەزن روو دەن، هەر گوهۆڕینەک ژی ل رۆسیا روو بدەت د بەرژەوەندیا ئۆکرانیا و وەلاتێن رۆژئاڤایی دایە).
ل ئالیێ دی عەبدوللا حیجاب چاڤدێرێ سیاسی ل وەلاتێ نەرویج ژی راگەهاند، یا نها ل رۆسیا روو ددەت دێ کاریگەریا خوە ل هەموو جیهانێ کەت، کا چاوا شەرێ ئۆکرانیایێ کاریگەریا خوە ل هەموو جیهانێ کر و هەڤسەنگیێن سیاسی هاتنە گوهۆرین، یا نها ل رۆسیا روو ددەت ژی دێ وەسا بیت، چونکی گرۆپەکێ چەکدار یێ بهێز نها دڤێت پۆتین ل سەر دەستهەلاتێ نەمینیت و پۆتین ژی دبێژیت وێ گرۆپێ خیانەت ل وان کریە، دیارە ئەو یەک دێ کاریگەریەکا خوە یا گەلەک مەزن ل سەر رەوشا رۆسیا و شەرێ ل ئۆکرانیایێ کەت، بێگومان هەکە شەڕێ نها د ناڤبەرا گرۆپێ ڤاگنەر و لەشکرێ رۆسیایێ دا بۆ دەمەکێ درێژ بەردەوام بیت ئەو یەک دێ بیتە ئەگەرێ گوهۆڕینێن مەزن ل رۆسیا و گۆت: (نها هەر گوهۆڕینەک ل رۆسیا روو بدەت دێ کاریگەریا خوە ل هەموو دەڤەرێ کەت، گەلەک هەڤسەنگی دێ هێنە گوهۆرین، ژ بەر هندێ ژی نها ئەمریکا و وەلاتێن رۆژئاڤایی ژ نێزیکڤە چاڤدێریا روودانێن ل رۆسیایێ دکەن).
عرفان رەهنمون چاڤدێرێ سیاسی ژی دیار دکەت، سەرۆکێ گرۆپێ ڤاگنەر کەسەک تاوانبارە و بۆ پارەی و بەرژەوەندیێن خوە شەری دکەت، دەستێ وان د کوشتنا ب هزاران وەلاتیێن بێ تاوان ل ئۆکرانیایێ دا هەیە، لێ نها ئەو ل دژی پۆتینی شەڕی دکەن، بەردەوامیا شەرێ وێ گرۆپێ ل گەل لەشکرێ رۆسیا دشێت ببیتە ئەگەرێ دستپێکەکا نوو ل رۆسیا، بێگومان بەردەوامیا شەڕی دێ بیتە ئەگەرێ ژناڤچوونا پۆتینی، چونکی گەلەک ژ خەلکێ رۆسیا ل دژی شەرێ نها ل ئۆکرانیایێ نە.
