وەلاتێن رۆژئاڤایی ژ بزاڤێن دووماهیێ یێن پۆتینی د دلگرانن
ئاژانسا رویترز یا نووچەیان د راپۆرتەکێ دا دیار کریە، پشتی ئالۆزیێن ڤێ دووماهیێ ل رۆسیا و ناکۆکیێن دەستهەلاتێ ل گەل گرۆپێ ڤاگنەر نها چەندین فەرماندارێن گرۆپێ ڤاگنەر ل وەلاتێ بیلارۆسیا بجه بووینە، ئەو یەک د دەمەکێ دایە کو رۆسیا هندەک ژ چەکێ ئەتۆمی ژی ڤەگۆهاستینە وەلاتێ بیلارۆسیا و ئەو یەک ژی بوویە جهێ دلگرانیا وەلاتێن رۆژئاڤایی.
بەرپرسەکێ ناتۆ ژی دیار کریە، بزاڤێن پۆتینی و بجهبوونا فەرماندارێ گرۆپێ ڤاگنەر ل گەل سەربازێن وێ گرۆپێ ل بیلارۆسیا جهێ گۆمانێ یە، چونکی نها رۆسیا هندەک چەکێ ئەتۆمی ژی ل بیلارۆسیا بجه کریە و براستی ژی دیار نینە کا ئارمانجا پۆتینی ژ بجهکرنا چەکێ ئەتۆمی ل بیلارۆسیا چیە، هەروەسا بۆچی فەرماندارێ گرۆپێ ڤاگنەر کو گرۆپەک تیرۆرستیە چوویە وەلاتێ بیلارۆسیا؟ ئایا پۆتینێ دڤێت ل سنۆرێ بیلارۆسیا ب رێیا وێ گرۆپێ دەست ب شەڕەکێ نوو ل گەل ئۆکرانیایێ بکەت یان ژی ئارمانجێن خوە یێن جودا هەنە؟ ئەو یەک ژی جهێ دلگرانیێ یە.
