ب گوژمێ پتری سێ ملیار دیناران پڕۆژەیێن خزمەتگوزاری ل باتیفا دێ هێنە بجهئینان
زاخۆ، دلۆڤان و عەلی:
ل دەڤەرداریا باتیفا یا سەر ب ئیدارەیا سەربخوە یا زاخۆ ڤە، دوهی 11/9/2023 ب گوژمێ پتری سێ ملیار دیناران بەرێ بنیاتی بۆ چەندین پڕۆژەیێن خزمەتگوزاری هاتە دانان.
شڤان عەبدی، بەرپڕسێ ڕاگەهاندنا ئیدارەیا سەربخوە یا زاخۆ بۆ ڕۆژناما ئەڤرۆ دیار كر كو ل ژێر چاڤدێریا گۆهدار شێخۆ، سەرپەرشتێ ئیدارەیا سەربەخوە یا زاخۆ، بەرێ بنیاتێ بۆ پڕۆژەیێن جۆتسایدێ دەڤەرداریا باتیفا ب درێژاهیا هزار و 100 مەتران و ب گوژمێ نێزیكی سێ ملیار دیناران و پڕۆژەیێ چێكرنا ڕێكا گوندێن دێمكا، صوریا، شلینێ و شیلانێ ژی ب گوژمێ پتری 600 ملیۆن دیناران هاتە دانان، ل گەل چێكرنا ڕێكا گوندێ ڕێوانێ قووناغا سیێ ل ناوچەداریا بێگۆڤا.
بەرپڕسێ ڕاگەهاندنا ئیدارەیا سەربخوە یا زاخۆ، ئاماژە ب وێ چەندێ ژی كر كو هەر د سەرەدانا خوە دا شێخۆی ژ نێزیك ئاگەهداری جاددەیێن ناڤخوە و سەرەكی یێن دەڤەرداریا باتیفا بوو، كو نوكە د قووناغێن دووماهیێ دانە و دهێنە چێكرن، پاشی جادەیەك ژی هاتە ڤەكرن و كەفتە د خزمەتا خەلكێ دەڤەرداریا باتیفا و شۆفێران دا.
