نوونەرا ئێكانە یا پارێزگەهێ هیڤیێن دەربازبوونێ ژ دەستدان
قەیس وەیس:
تیما فوتبۆلا یانەیا بەردەڕەش هیڤیێن دەربازبوونێ بۆ خولا پلا ئێكا كوردستانێ ژ دەستدان پشتی دگەل یانەیا سەنگەسەر ب لێدانێن پەنەلتیان 5-4 تووشی خوسارەتیێ بوویی پشتی یاری بێ گۆل ب دووماهی هاتی، د یارییا واندا ئەوا ژ هەڤڕكیێن قۆناغا چارگۆشەیا زێرین ل هەولێرا پایتەخت هاتیەكرن.
د ماوەیێ هەڤڕكیێن قۆناغا ئێكێ و دویێ دا كو سەرجەمێ 16 یاریان دا تیما بەردەڕەش گەلەك ب هێز پشكداری د خولا پلە دو دا كربوو و تووشی چ خوسارەتیان نەبوو، لێ بارێ خراب یێ دارایی كارتیكرنا خوە ل سەر بەرهەڤیێن وێ بۆ قۆناغا چاركۆشەیا زێرین كربوو، هەروەكو د داخویانیەكێ دا سەرۆكێ یانەیێ سەمیر عەبدولقادر بۆ رۆژنامەیا ئەڤرۆ گۆت بوو: ب شێوەكێ ب لەز ئەم پێدڤی ب پشتەڤانیا دارایینە بۆ ئەنجامدانا یاریێن مایی ژ بەركو یاریێن مایی گەلەك گرنگ و چارەنڤیسن بۆ تیما مە ئەگەر پشتەڤانیا یانەیێ بهێتە كرن پێكهاتەیا تیما یانەیێ گەلەك یا ب هێزە و چەند رۆژە خوە بەرهەڤ دكەن بۆ ئەنجامدانا یاریا بەریا دووماهیا خولا پلە دوا كوردستانێ و بگەهینە خولا پلە ئێكا كوردستانێ .
ناڤهاتی گۆت ژی: ئاستێ تیما یانەیا بەردەڕەش گەلەك یێ باشە و ب هێزە یانەیەكا بهێزا خولا پلە دوا كوردستانێ بوو ئەڤسالە لێ ئاریشا سەرەكیا یانەیێ نەبوونا پشتەڤانیا ئابووریە ئەڤێ چەندێ ئەركێ یانەیێ گرانكری.
بۆ زانین د خولا پلا دو یا كوردستانێ دا پێنج یانەیێن پارێزگەها دهۆكێ پشكداربوون ئەو ژی، باتیفا، بەردەڕەش، شێلادز و شێخان لێ یانەیا گارە خوە ژ خولێ ڤەكێشابوو ئەوا 19 یانە پشكداربوون و هاتبوونە بەلاڤكرن ل سەر دو كۆما و هەردو یانەیێن سەنگەسەر و زانكۆیا جیهان دەربازبوونە پلا ئێكا كوردستانێ.