عەلی حسێن: مەسرور بارزانی بۆ پێكئینانا كابینەیا نوو یا حوكمەتا هەرێمێ دێ هێتە راسپارتن
هەلەبجە، عەزیز هەورامی:
ل چەند رۆژێن داهاتی شاندەكێ بلند یێ پارتی دیموكراتی كوردستان دێ سەرەدانا ئالیێن سیاسی كەت، هەر ئالییەكی بەرنامەیێ پارتی و مەسرور بارزانی كو دێ هێتە راسپاردن بۆ پێكئینانا كابینەیا نوو یا حوكمەتا هەرێمێ قببوول بیت كو ئێك حوكمەت وئیرادەیا سیاسییە، دێ دانوستاندنان ل گەل كەین و د بەرهەڤین كابینەیا نوو یا حوكمەتێ ل گەل پێكبینین.
عەلی حسێن، ئەندامێ مەكتەبا سیاسی و بەرپرسێ مەكتەبا رێكخستنا سلێمانیێ – هەلەبجە یا پارتی دیموكراتی كوردستان بۆ رۆژنامەیا (ئەڤرۆ) گۆت» ئەم یێن هاتینە هەلەبجە بۆ دەستخوەشیێ و پیرۆزباهیێ ل كادر و ئەندام و دەنگدەرێن پارتییا مە بۆ وێ سەركەفتنا ب دەستڤەئینای، هەڤوەلاتیێن هەلەبجە و هەورامان و شارەزوور و سەید سادق و پێنجوێن سەلماند دلسۆزێن رێبازا بارزانی نە، سەركەفتنا مە ل هەلەبجە سەركەفتن بوو بۆ كوردان».
عەلی حسێن گۆت ژی» ئەوا ل بازنەیا هەلەبجە و سلێمانیێ ب دەستڤەهاتی، سەركەفتنەكا مەزن بوو بەلێ هێشتا یا مای و گەلەك خەلكێ دلسۆزێ پارتی ل ڤێ دەڤەرێ یێ هەی، هەڤوەلاتیێن ئاسایی یێن ژ دەرڤەی رێكخستنێن پارتییا مە، سیاسەتا پارتی و سەرۆك بارزانی پەسەند دكەن و دەنگێ خوە ژی یێ دایە پارتی».
رۆهنكر ژی» ئەم كاری ل سەر وێ چەندێ دكەین حوكمەتا سەرانسەری بهێتە پێكئینان، تاكو ب سەلمینین پارتی د خزمەتا خەلكی دایە، وی دەمی خەلك دێ زێدەتر نێزیكی پارتی بیت و پشتەڤانیێ ل پەیاما سەرۆك بارزانی كەت، حوكمەتا داهاتی دێ كارێن مەزنتر ئەنجامدەت، ل دەمێ بۆری داهاتیێ ڤی سنووری بۆ خزمەتگوزارییان و خوەشكرنا ژیارا هەڤوەلاتییان نەهاتییە مەزاختن».
خویاكر ژی» مە ڤیتۆ ل سەر هیچ ئالییەكێ سیاسی نینە، پارتی دێ مەسرور بارزانی بۆ پێكئینانا كابینەیا دەهێ یا حوكمەتا هەرێما كوردستانێ راسپێریت، دێ وی بەرنامەیێ خوە هەبیت كو بەرنامەیێ پارتییە، ئەوژی ئەوە ئێك حوكمەتا سەرانسەری بیت، كو دەربڕینێ ژ هەرێما كوردستانێ بكەت، ئێك هێزا پێشمەرگەی و ئیرادەیا سیاسی هەبیت».
وی ئەندامێ مەكتەبا سیاسییا پارتی پتر گۆت» ل چەند رۆژێن داهاتی شاندەكێ پارتی دێ سەرەدانا ئالیێن سیاسی ل هەرێما كوردستانێ كەت، ئەو ئالیێ بەرهەڤ بیت بەرنامەیێ پارتی و سەرۆكێ راسپاردیێ حوكمەتا هەرێمێ پەسەند بكەت، د بەرهەڤین دانوستاندنێ و حوكمەتێ ل گەل پێكبینین».
هەروەسا ئاماژەكر» پشكدارییا پارتی د حوكمەتا خوەجهییا پارێزگەهێن سلێمانیێ و هەلەبجە دا یا گرنگە، ئەم د بەرهەڤین هەر حزبەكا سیاسی ل هەولێرێ و دهۆكێ و سلێمانیێ و هەلەبجە، ب گۆڕەی پێگەهێ خوە پشكدار بیت و رۆل ل حوكمەتا خوەجهی پێ بهێتە دان، بەرنامەیە پارتییە ژی ل حوكمەتا ئێكگرتی هەموو داهاتیێ ناڤخوە و یێ بەغدا ژی ب گۆڕەی هەژمارا ئاكنجییان بهێتە بەلاڤكرن و حوكمەتێ بۆ خزمەتا خەلكی دروست بكەین».
