زاخۆ بۆ وەلاتیێن باكوورێ كوردستانێ بوویە ژێدەرێ ژیانێ
زاخۆ، دلۆڤان هالۆ:
باژێڕێ زاخۆ و ب تایبەت مەیدانا بەتوون ل كۆمەلگەها ئیبراهیم خەلیل بۆ پشكەك ژ خەلكێ باژێڕێن باكوورێ كوردستانێ بوویە ژێدەرێ ژیانێ، ب دەهان سالە ب سەدان كەس ل زاخۆ بووینە خودان كار و ژیانا خوە لێ دبورینن، هندەك ژ وان ژ ئەگەرێ فەرمانا دەستەسەركرنێ نەشێن ڤەگەڕن، لەوما ل زاخۆ ئاكنجی بووینە، و هندەك ژی ب تنێ ژ بۆ مەرەما بازرگانیێ هاتنوچوونێ دكەن.
مستەفا ئەسكەندەر ئێكە ژ خەلكێ پارێزگەها شەرنەخێ ل باكوورێ كوردستانێ بۆ ڕۆژناما ئەڤرۆ دیار كر، ئەڤە پتری 15 سالانە ئەز هاتیمە زاخۆ و ل مەیدانا بەتوون ل گۆمركا ئیبراهیم خەلیل خودانێ دوكانا فرۆتنا پاكیتە و تۆفچایی مە، ب داهاتێ ڤێ دوكانێ بوویمە خودان خێزان و خانی، ژ دانێ سپێدێ هەتا كو درەنگی شەڤ ئەز و كۆڕێن خوە ل دوكانێ كار دكەین و ژیانا خوە پێ د بورینین.
عۆمەر مەجید، خەلكێ باژێڕێ سلۆپی یە دبێژیت:»ئەز هاتنوچوونێ دناڤبەرا سلۆپی و زاخۆ دا دكەم ژ بۆ مەرەما كارێ كڕین و فرۆتنا پاكیتە و تۆفچایی و پێدڤیێن خوارن و ڤەخوارنێ، هەر چەندە كارەكێ ب زەحمەتە، لێ ئەڤە بۆ دەمێ یازدە سالانە ژیانا من و خێزانا من ل سەر ڤی كارییە و ل دەڤ مە چ جیاوازی دناڤبەرا سلۆپی و زاخۆ دا نینە، چونكی ئەم هەموو برایێن ئێكین».
ئازاد ئەكرەم، دۆكاندارەكێ خەلكێ زاخۆیە ل مەیدانا بەتوون، دبێژیت:»ئەو كەسێن باكوورێ كوردستانێ یێن كو ل ڤێرێ كار دكەن، هندەك ژ وان ژ مێژە ل زاخۆ نە، ل ڤێرێ ئازاد و ئارامن و خودان دوكانن و هەر تشتەكێ وان بڤێت دشێن بكڕن و بفرۆشن، نە حكۆمەت و نە ژی خەلكێ زاخۆ ئیزعاجا وان ناكەن».
ئەدیب جەعفەر، ڕێڤەبەرێ ناحیا ڕزگاری بۆ رۆژناما ئەڤرۆ گۆت:»ئەو وەلاتیێن خەلكێ باژێڕێن باكوورێ كوردستانێ یێن كو ل زاخۆ كار دكەن، چ كارێ تایبەت بیت یان ژی كارێ گشتی بیت، ب شێوەیێ بەڕەلا كار ناكەن، بەلكو هەمی ل دووڤ ڕێنما و یاسایێن حكومەتا هەرێما كوردستانێ كار دكەن».
