ئه‌مریکا: دێ پشته‌ڤانیا مه بۆ هێزێن سووریا دیموکرات یا به‌رده‌وام بیت
فەرماندارێ هێزێن ناڤەندی یێن ئەمریکا د سەرەدانا خوە یا بۆ رۆژئاڤایێ کوردستانێ دا دیار کر، هێزێن سووریا دیموکرات هەڤپەیمانێ ئەمریکا نە و دڤێت ئێرشێن تورکیا و گرۆپێن چەکدار یێن ل سەر دەڤەرێن کوردی بهێنە راگرتن، چونکی ئەو یەک دێ کاریگەریا خوە ل سەر شەڕێ ل دژی داعشێ هەبیت.
جه‌نه‌رال میشه‌ل ئه‌ریک کوریڵا فه‌رماندارێ هێزێن ناڤه‌ندی یێن ئه‌مریکا سه‌ره‌دانا رۆژئاڤایێ کوردستانێ کر و ل گه‌ل مه‌زلوم عه‌بدی فه‌رماندارێ گشتی یێ هێزێن سووریا دیموکرات کۆمبوو و د کۆمبوونێ دا بەحسێ ئێرشێن ده‌وله‌تا تورکیا بۆ سه‌ر رۆژئاڤایێ کوردستانێ، شەڕێ ل دژی داعشێ و رەوشا نوو یا سووریێ هاتە کرن.
فەرماندارێ ئەمریکی د هه‌ڤدیتنێ دا جارەکا پشته‌ڤانیا ئەمریکا بۆ هێزێن سووریا دیموکرات دوپات کر و راگه‌هاند کو دڤێت ئێرشێن بۆ سه‌ر باکور و رۆژهه‌لاتێ سووریێ بهێنه راگرتن و گۆت: (ئۆپه‌راسیۆنێن ل هه‌مبه‌ر داعشێ ب رەنگەکێ سه‌رکه‌فتی به‌رده‌وام دکه‌ن و هه‌تا نها ژی داعش ب ته‌مامی نه‌هاتیه ژناڤبرن و دێ ل گەل هه‌ڤپه‌یمانێن خوه به‌رده‌وامیێ ده‌نە ئۆپه‌راسیۆنێن ل دژی تیرۆرستێن داعشێ، چونکی نها رەوشەکا نوو ل سووریێ هاتیە پێش و رێکخستنا تیرۆرستی یا داعشێ دڤێت جارەکا دی خوە ب رێکخستن بکەت و دەست ب کریارێن تیرۆرستی بکەت، ژ بەر ڤێ یەکێ ژی گرنگە شەڕێ ل دژی داعشێ ب هەموو رەنگەکێ بەردەوام بیت و دڤێت رێ نەدەین جارەکا دی داعش بهێز کەڤیت).
ل ئالیێ دی سەبارەت ب سەرەدانا فەرماندارێ هێزێن ناڤەندی یێن ئەمریکا بۆ رۆژئاڤایێ کوردستانێ مەزلوم عەبدی فەرماندارێ گشتی یێ هێزێن سووریا دیموکرات ژی راگەهاند، د کۆمبونێ دا بەحسێ رەوشا نوو ل سووریێ هاتە کرن، هەروەسا بەحسێ گرتیێن داعشێ ژی هاتە کرن و دڤێت د ئاستێ نێڤدەولەتی دا چارەسەریەکا گونجای بۆ وان بهێتە دیتن و هەروەسا بەحسێ رەوشا نها یا ل رۆژئاڤایێ کوردستانێ ژی هاتە کرن.
فەرماندارێ گشتی یێ هێزێن سووریا دیموکرات ئەو یەک ژی دیار کر، رۆلێ ئەمریکا ل رۆژئاڤایێ کوردستانێ گەلەک گرنگە، وەکو هێزێن سووریا دیموکرات وان دڤێت ئیدارا بهێت یا ئەمریکا ژی هەمان سیاسەت ل هەمبەر رۆژئاڤایێ کوردستانێ هەبیت، چونکی مەترسیێن مەزن ل سەر سووریێ و رۆژئاڤایێ کوردستانێ هەنە، لێ ب هاریکاریا ئەمریکا و وەلاتێن دی یێن هەڤپەیمان ئەو دشێن د ئاڤاکرنا سووریایەک نوو و دیموکراتی دا خوەدان رۆل بن و گۆت: (بێگومان هەر ئالۆزیەکا نوو ل سووریێ روو بدەت دێ کاریگەریا خوە یا خراب بۆ هەموو رۆژهەلاتا ناڤین هەبیت، ژ بەر ڤێ یەکێ ژی د کۆمبوونا ل گەل فەرماندارێ ئەمریکی وان بەحسێ گرنگیا مانا هێزێن ئەمریکا ل سووریێ و رۆژئاڤایێ کوردستانێ کرینە و پشتەڤانیا ئەمریکا ژ بۆ هێزێن سووریا دیموکرات ژی جهێ دلخوەشیێ یە).
