ئەو چ پلەیە ژ هەمیان گرنگتر؟
زهێر كۆرەماركی
ئەم هەمی هۆسا هزر دكەین كو ئەم مرۆڤێن باشین و ئەم حەز ژ ئێكودو دكەین و مە خێرا ئێكودو دڤێت و دگەل ئێك دراستگۆیین، راستە ئەم هەمی مرۆڤین وەك رۆخسار لێ وەك ناڤەرۆك هەر ئێكی ژمە كەڤرەكێ مەزن یێ د دلێ وی دا و هۆسا خۆ قەپەدكەت دێ بێژی هەما بەس ئەوێ د ڤێ دونیایێ دا و كەسێ دی نە. ئەگەر مە بڤێت خێزان و جڤاكەكا پاقژ و لێكدای و ئێكگرتی مە هەبت دڤێت هەر ئێك ژ مە ژ خۆ دەست پێ بكەت و حەزژێكرن و ڤیانێ د گەل ئێك ئالۆگۆڕ بكەین و بۆ برین و زامێن ئێك ببینە دەرمان و نۆشدار و كەسانێن ئاڤاكەر بین و تێكدان و نەڤیان وكەربێ د ناخێ هزر و كریارێن خۆ دا بكۆژین و كار بۆ بۆ جڤاكەكێ ساخلەم پڕ ئەڤین و راستگۆیی بكەین تێدا بگەهینە پلا مرۆڤبوونێ كو مەزنترین و زەنگیترین پلە و پۆستە مرۆڤ بگەهیتێ. هندەك هۆسا هزر دكەین هەكە بۆ بەرپرسەك یان رێڤەبەرەك یان دەڤەردارەك…هتد. ئەڤە بۆ مرۆڤ و گەهشتە پلا مرۆڤبوونێ و پلا وەزیفێ خۆ ژپلا مرۆڤبوونێ مەزنتر و ب بهاتر دبینت، نزانیت پلا وەزیفی چ جاران وی ناگەهینیتە پلا مرۆڤبوونێ.
داكو بزانین مرۆڤبوون چییە و چاوایە و بها و نرخێ وێ چەندە و چەندا مەزن و كاریگەرە مرۆڤی مەزن و نەمر دكەت و مرۆڤی دكەتە كەسایەتیەكێ ب هێز و كاریزمایی و رەوشت و هێز و ڤیانێ دبەخشیتە مرۆڤی وەرە گوهێ خۆ بدەنە ڤێ سەرهاتیێ؟
دبێژن زەلامەكێ جامێر و ژ خۆ شەرم، كوڕەكێ نەتەبتی و پیچ و شیم و نەزان هەبوو، هەمی گاڤان شەڕێ وی و بابێ وی بۆ چ رێز و بها نەددا بابێ خۆ تشتەك ژی ژ ئەتەكێن رێزگرتنێ نەدزانی، بابێ وی رۆژەكێ گۆتێ چ جاران نابیە مرۆڤ و دێ هەر ئەڤ داروقەبی؟ ئەو ژی سلبوو چوو ب دونیایێ كەفت چوو وەلاتەك و باژێرەكێ دی، هۆسا هلكەفت بۆ باخچەڤانێ حاكمێ وی باژێری باخچێن جوان و رێكوپێك بۆ حاكمی چێكرن و گەلەك چاڤێ خۆ د دا باخچەی، رۆژەكێ حاكمی پرسیار كرئەڤە كییە ئەڤ باخچە و گولێن هندە جوان چێكرین و چێدكەت، بەردەستكێن وی گۆتێ ئەز بەنی ئەڤە ئەو گەنجە ئەوێ هاتی بوویە باخچەڤانێ تە ب راستی گەنجەكێ ژێهاتی بەركەفتییە ئەوە ڤان باخچەیان چێدكەت؟ حاكمی گەلەك هزرێن خۆ كرن بۆ خۆ دگۆت ئەز یێ سەرەبیم و من بەس كچەك یا هەی ما چاوایە هەكە ئەز ئەڤی گەنجی بكەمە زاڤایێ خۆ؟ وەخت هاتن وەخت چوون ئەو گەنج بوو زاڤایێ حاكمی، پشتی چەند سالەكا حاكمی ئەمرێ خۆدێ كر، ئەو جحێل شوینا وی بوو حاكمێ وەلاتێ وی باژێری، چەند سالەك ب سەر حاكمیا وی ڤە چوون، حاكمێ نوو گۆت دێ رابم چم سەرا بابێ خۆ دەم دا بابێ من، من ببینیت كا ئەز بوویمە مرۆڤ یان نە و مەبەستا وی ئەو دا بۆ بابێ بسەلمینیت كو یێ بوویە مرۆڤ چونكی یێ بوویە حاكم؟ رابوو كارێ خۆ كر و زەلام و ئێلچییێن خۆ دانە دووڤ خۆ و قەستا گوندێ بابێ خۆكر، بێی سلاڤ و بچینە سەرێ بابێ خۆ و خۆ بۆ بشكێنیت و پسیارا حالێ وی بكەت؟ بابێ وی گۆتێ تۆ ب خێر هاتی باب سەرچاڤا كەرەمكە بچینە ژۆر،گۆتە بابێ خۆ هات پا تە دگۆت تۆ چ جاران نابیە مرۆڤ؟ نوكە ئەز حاكمێ وەلاتەكیمە و هەیی و نەیی ئەزم، بابێ وی گۆتێ من نەگۆتیە تە تو نابییە حاكم، من یاگۆتیە تە تۆ چ جاران نابیە مرۆڤ، نوكە ژی تو نە مرۆڤی، راستە تو حاكمی لێ هێشتا تو نەبوویە مرۆڤ، مرۆڤ و مرۆڤبوون یا ب زەحمەتە هەمی نەشێن بگەهنێ.
ڤێجا وەرن دا ئەم هەمی بزاڤا بكەین ببینە مرۆڤێن راست و دورست و بگەهینە پلا مرۆڤبوونێ داكو هەست ب خۆشیا ژیانێ بكەین و ببینە خودان دەروونەكێ ئارام و وژدانەكا پاقژ و پڕی دلۆڤانی.
