دو پاركێن گشتی ل دێرەلۆكێ دهێنە چێكرن
ئامێدیێ، مەحمود نهێلی:
ژ بۆ پتر خزمەتكرنا خەلكێ دەڤەرێ ژ لایێ گەشتوگوزارێ ڤە و راكێشانا گەشتیاران بۆ دەڤەرێ، كابینەیا نەهێ یا حكومەتا هەرێما كوردستانێ گرنگیەكا زۆر دایە چێكرنا پاركان و جهێن گەشتیاری ل دەڤەرا ئامێدیێ.
ئەندازیار عەبدولمەناف رەشید، سەرۆكێ باژێرڤانیا دێرەلۆكێ بۆ رۆژناما ئەڤرۆ دیار كر، رازیبوون ل سەر چێكرنا پاركەكا گشتی ل سەنتەرێ ناوچەداریا دێرەلۆكێ هاتیە كرن و پارێ پێدڤی بۆ هاتیە تەرخانكرن و گۆت: «ئەڤ پاركە ل سەر رووبەرێ 12 هزار مەتران د ناڤبەرا رووبارێ زێ و رووبارێ سپنەی دا ل تاخێ داستان دێ هێتە چكرن».
دیار ژی كر، ژ بۆ ئەنجامدانا ڤی پڕۆژەی ل گەل چێكرنا هەژمارەكا جاددەیێن ناڤخۆیی، ملیارەك و 150 ملیۆن دیناران ژ لایێ حكومەتا هەرێمێ ڤە هاتینە تەرخانكرن و د دەمەكێ نێزیك دا دێ دەست ب چێكرنا كارێ پڕۆژەی هێتە كرن و گۆت: «نوكە پاركەكا دی ل تاخێ شەهیدان دهێتە چێكرن و ل سەر بودجا تایبەت یا باژێرڤانیێ پارە بۆ هاتیە دابینكرن و گەهشتیە قۆناغێن داویێ و د دەمەكێ نێزیك دا دێ كەڤیتە د خزمەتا خەلكێ دەڤەرێ دا».
