چارە یا كرێداریێ د دەستێن حوكمەتێ دایە؟
سندس سالح سلێڤانەیی:
پتریا كەسێن كرێدار گازندەیان ژ گرانیا كریا خوە دكەن و دبێژن خودانێن مۆلكان كەیسا خوە ل مە دبینن و بارێ مە یێ گرانكری و خودانێ نڤیسینگەهەكا كڕین و فرۆتنا ئەردو خانیان ژی دبێژیت: ژبەركو مۆچە گیرۆدبن و پارە د دەستێن خەلكی دا یێ كێمە، لەورا وێ گازندێ دكەن. ئابۆرناسەك ژی دبێژیت: ئەركێ حكومەتێ تە بهای دانیتە سەر جهێن ب كرێ دهێنە دان.
حسێن خالد، كرێدارەكە دبێژیت: د سێ سالێن بۆری دا من چوار جاران مالا خوە ڤەگوهاستیە و ئەگەرێ سەرەكی ژی ب تنێ ئەو بوویە ژبەر گیرۆبوونا مۆچەی هندەك جاران من كریا وی درەنگ د دایێ و نوكە ژی ئەم نە د ئارامین مۆچەیێ مە گیرۆ دبیت و خودانێ خانی بەردەوام دبێژیت (كریا من بینن ئەو ئاریشەیا هەوە یە). لەورا باشە حكومەت چارەیەكێ ل مە بكەت و یاسایەك بۆ كرێداران هەبیت، چونكو پتریا خودانێن مۆلكان دبێ وژدانن.
وەیسی عەلی، كرێدەراەكێ دی یە دبێژیت: كریێن شوقەیان گەلەك دگرانن و هندەك شوقە هەنە كریا هەیڤانە ژ (250) هەتا (500) دۆلارانە، ئەڤە ژی بۆ مە كرێداران بارەكێ گرانە و دەردەكێ بێ دەرمانە، پێدڤیە حكومەت هاریكاریا مە بكەت دا خودانێن مۆلكان ل سەر مە زال نەبن.
دەیكا ئدریسی، ژی دبێژیت: ئەڤە 20 سالن ئەم كرێدار و مۆچەیێ مە هەموو بۆ كرێ و حەقێ ئاڤ و كارەبێ دچیت، فەرە یاسایەك هەبیت بهایێ كریێن خانی و دوكان و شوقەیان رێكبێخیت، چونكو خودانێن مۆلكان كەیسا خوە ل مە دبینن.
عەلی سالح، خودانێ نڤیسینگەهەكا كڕین و فرۆتنا عەرد و خانیانە دبێژیت: ئەو ب خوە خانی نە دگرانن، لێ ژبەركو مۆچە گیرۆدبن و پارە یێ كێمە د دەستێن خەلكی دا خەلك دبێژن كرێ دگرانن.
ئابۆرناس كۆڤان تاها دبێژیت: ئەڤا نوكە هەی نە بازاڕێ ئازادە، بەلكو بازاڕێ بەرەللایە و نە دبن كونترۆلا حكومەتێ دا یە، لەورا خودانێن مۆلكان ب كەیفا خوە بهایێ كریێ دەستنیشان دكەن و ل دووڤ یاسایێ وان ئەو ماف نینە، بەلكو پێدڤیە حكومەتێ لژنەیەك هەبیت و سەرەدانا جهێن كرێ بكەت و ل دووڤ رۆبەرێ وی جهی هەروەسا باشی و خرابیا كوالێتیێ و تاخێ ئەو ئاڤاهیێ بكرێ دهێتە دان بهایەك بهێتە دەستنیشانكرن ل وی دەمی دێ بارێ كرێداری ژی سڤك بیت، هەروەسا ئەگەر خودانێ مۆلكی پێگیری ب وی بهای نەكر دشێت ل دووف یاسایێ پێرابوونان دگەل وەربگرن.
