پارێزگارێ دهۆكێ: دخوازین رێكخراو پتر هاریكاریا ئاوارە و خۆجهێن پارێزگەهێ بكەن
د. عەلی تەتەر، پارێزگارێ دهۆكێ دوهی 28/4/2025 پێشوازی ل شاندەكێ هەڤپشك یێ رێكخراوێن كاریتاس یا ئەلمانی ب سەرۆكاتیا د. هندریك گرۆپ و خانم بریگێرت، سەرۆكا رێكخراوا گوندێ ئاشتیێ ل ئەلمانیا كر.
د هەڤدیتنەكێ دا بەحسێ رەوشا ئاوارە و پەنابەران ل ناڤ كەمپان و دەرڤەی كەمپان و بەرنامێن رێكخراوا كاریتاس و ئەو خزمەت و هاریكاریێن پێشكێشی كەمپێن ئاوارە و پەنابەران و خوجهێن پارێزگەهێ دكەن هاتە كرن.
هەروەسا بەحسێ بەرنامێن رێكخراوا گوندێ ئاشتیێ هاتە كرن، كو ب هەڤكاری ل گەل دەزگەهێ خێرخوازیێ بارزانی دێ نشتەرگەری و چارەسەریا هندەك زارۆكان ل ناڤ نەخۆشخانەیێن پارێزگەها دهۆكێ كەن، ب تایبەت ئەوێن بووینە قوربانیێن شەڕێ تیرۆرێ.
پارێزگارێ دهۆكێ سوپاسی و دەستخوشی ل بەرنامە و هاریكاریێن رێكخراوێن كاریتاس و گوندێ ئاشتیێ ل ئەلمانیا كر بۆ ئەو خزمەتكاریێن مرۆڤایەتی یێن پێشكێش دكەن و هیڤی خواستن هەردو رێكخراو پتر هاریكاریا ئاوارە و پەنابەر و خوجهێن پارێزگەهێ بكەن.
دیسا هەر دوهی 28/4/2025 د. عەلی تەتەر، پارێزگارێ دهۆكێ پێشوازی ل شاندەكێ دەزگەهێ سالار یێ وەلاتێ سوێدێ ب سەرۆكاتیا گونەر كر و د هەڤدیتنەكێ دا بەحسێ بەرنامە و ئەو هاریكاریێن دەزگەهێ سالار یێ سوێدی هەر ژ سالا 2011ێ وەرە پێشكێشی رێڤەبەریا گشتی یا چاڤدێریا جڤاكی و باژێرڤانیان ل پارێزگەها دهۆكێ و هندەك جهێن دی، ب تایبەتی د بیاڤێ چاڤدێریا زارۆكان دا هاتە كرن.
