وەزارەتا كۆچ و كۆچبەران سكالا دژی داخوازیێن مە بۆ مافێن ئاوارەیان تۆمار كریە
دهۆك، لەزگین جوقی
ئەندامەكا جڤاتا نووونەرێن ئیراقێ ژ فراكسیۆنا پارتی دیموكراتی كوردستان راگەهاند: وەزارەتا كۆچ وكۆچبەرێن ئیراقێ چەندێن سكالا دژی من تۆماركرینە ژ بەر كو من گوتیە ئاهێن خوارنێ وپاقژكرنێ نە د ئاستێ پێدڤی دانە بۆ ئاوارەیان وهاریكاریا ئاوارەیان ناهێتە كرن.
ڤیان دەخیل ، ئەنداما جڤاتا نووونەرێن ئیراقێ ژ فراكسیۆنا پارتی دیموكراتی كوردستان راگەهاند، ئەم ب ئەركێ خوە دزانین دووڤچوونا رەوشا ئاوارەیان بكەین پشتی مە گوتێ ئاهێن خوارنێ وپاقژكرنێ د ئاستێ پێدڤیدا نینن بۆ ئاوارەیان وگەندەلی د كەیسا ئاوارەیاندا یا هەی و خەلكێ دزڤرنە شنگالێ ناهێنە قەرەبووكرن كو گەلەك خێزان ڤەگەریاینە وهێشتا چار ملیۆن دینارێن قەرەبووكرنێ وەرنەگرتینە، لێ وەزارەتا كۆچ وكۆچبەرێن ئیراقێ چەندێن سكالا ل سەر مە تۆمار كرینە تاكو ئەم بێدەنگ بین، بەلێ ئەم بێدەنگ نابین ودێ بەردەوام بەرگریێ ژ خەلكێ خوە كەین».
ژ ئالیێ خوەڤە شەریف سلیمان، ئەندامێ جڤاتا نووونەرێن ئیراقێ ژفراكسیۆنا پارتی دیموكراتی كوردستان گۆت» ژ سالا 2014ێ هەتا نوكە چەندێن حوكمەت ل ئیراقێ یێن هاتینە پێكئینان وهەتا نوكە هێشتا كەیسا ئاوارەیێن شنگالێ چارەسەرنەكرییە».
شەریف سلیمان، گۆت ژی» ئەم رۆژانە ل بەغدا كار دكەین بۆ پشتەڤانیێ وخزمەتكرنا ئاوارە و هەموو بزاڤان ژی دكەین بۆ چارەسەركرنا كەیسا ئاوارەیێن شنگالێ وقەرەبوو كرنا خەلكێ ڤەگەریاینە شنگالێ لێ بەغدا یا رژد نینە وهەتا نوكە پتر ژ 20 هزار خێزانێن ئاوارە د ناڤ كەمپاندا ماینە وپتر ژ 35 هزار خێزانێن ئاوارە ژ دەرڤەێ كەمپان دئاكنجینە كو ئەڤ رێژا مەزن یا ئاوارەیان ماینە ونەشیاینە ڤەگەرن».
پیر دەیان جەعفەر، رێڤەبەرێ كۆچ و كۆچبەران ل پارێزگەها دهۆكێ ژی ڕاگەهاند»هەر خێزانەكا ئاوارە دەمێ ڤەگەریت دێ گۆژمێ 200 دۆلاران وەرگریت وەكو هاریكاری ژئالیێ رێكخراوا نەتەوەیێن ئێكگرتیڤە، ئەڤە وەكو پشتەڤانی و هاریكارییە بۆ ئاوارەیان دەمێ ڤەدگەرن سەر مالێن خوە».
