تێكگەهشتنەكا باش هەیە و د زووترین دەم دا حوكمەت دێ هێتە پێكئینان
ئەندامەكا كۆمیتەیا ناڤەندییا پارتی دیموكراتی كوردستان راگەهاند: تێكگەهشتنەكا باش یا هەی و د زووترین دەم دا حوكمەت دێ هێتە پێكئینان.
د. ئەشواق جاف، ئەنداما كۆمیتەیا ناڤەندییا پارتی دیموكراتی كوردستان د كۆنفرانسەكێ رۆژنامەڤانیدا گۆت» گرنگییا پشكدارییا كوردان ب ئێك لیست د هەلبژارتنێن جڤاتا نوونەرێن ئیراقێ د وێ چەندێ دایە كورد هەڤڕكیێ ل گەل ئالیێن نە كورد دكەن، لەوما ئێك دەنگ ژی بۆ كوردان گەلەكە، دانوستاندنێن ئالییان ل سەر ئێك لیستیێ بابەتەكێ گرنگە، هەر دەمێ داخوازییەك بۆمە وەكو سەركردایەتییا پارتی دیموكراتی كوردستان بهێت، دێ دانوستاندنێ ل سەر كەین و بڕیارا خوە ل دۆر دەین».
بڕیارە ل 11/11/2025، هەلبژارتنێن خولا شەشێ یا جڤاتا نوونەرێن ئیراقێ بهێنە ئەنجامدان.
د. ئەشواق جاف رۆهنكر» ل هەرێما كوردستانێ كورسی یێن هاتینە دیاركرن، ئالیێن كوردستانی د ناڤبەرا خوە دا ل كوردستانێ هەڤڕكیێ دكەن، هەر ئالییەكێ كوردی دەنگێن زۆر بینیت دێ كورسییان ب دەستڤەئینیت و دێ بیتە نوونەرێ كوردان ل بەغدا، لەوما هەكە ل كوردستانێ ژی ب ئێك لیست پشكداریێ نەكەن، كێشە نینە، چونكە ل دووماهیێ دێ هەر ئالیێن كوردی كورسییان ب دەستڤەئینن، بەلێ ل دەڤەرێن كوردستانی یێن ژدەرڤەی ئیدارەیا هەرێما كوردستانێ ئێك دەنگ ژی بۆ كوردان گەلەكە».
ل دۆر پێكئینانا كابینەیا دەهێ یا حوكمەتا هەرێما كوردستانێ، گۆت» ئەوا ل دەف پارتی و ئێكەتیێ
گرنگ ئەو رەشنڤیسەیە ل دۆر چاوانییا كاركرنێ بۆ قۆناغا داهاتی، كو خزمەتا خەلكێ كوردستانێ دكەت بێی جوداهی، لیژنەیا تەكنیكی ل قۆناغا ئێكێ زێدەتر ژ شەش كۆمبوونان ئەنجامداینە، دووماهی جار ژی مەسرور بارزانی وبافل تالەبانی پێكڤە كۆمبوون و دوپاتی ل سەر وێ چەندێ كر كو حوكمەتەك دێ هێتە پێكئینان، ئێك حوكمەت و ب هێز بیت، خزمەتگوزار بیت، ئێك هەلوەست هەبیت ل بەغدا بۆ وان هەموو پێشێلكاریێن ل بەرامبەر هەرێما كوردستانێ دهێتە كرن».
گۆت ژی» كۆمبوونێن داهاتی و قۆناغا دویێ دێ باس ل پۆستان هێتە كرن، بەلێ یا گرنگە رەشنڤیسە، دانوستاندن ل سەر پۆستان یێن هاتینە كرن و كێشە ل سەر هیچ پۆستەك نینە، چونكە ب گۆڕەی ئەنجامێن هەلبژارتنان كۆمبوون دهێنە كرن، بەلێ هەر ئالییەك كو هەر پۆستەكی وەردگریت پێدڤییە وان خالان بجهبینیت كو د ناڤ كارنامەیا حوكمەتا هەرێما كوردستانێدا هاتیە، ل كۆمبوونێن داهاتی دێ هێنە تمامكرن».
ل دووڤ گۆتنا وێ ئەنداما كۆمیتەیا ناڤەندییا پارتی» تێكگەهشتنەكا گەلەك باش د ناڤبەرا هەردو ئالییاندا یا هەی، ب زووترین دەم حوكمەت دێ هێتە پێكئینان، بەلێ نەشێین هیچ دەمەكی بۆ دیار بكەین».
د. ئەشواقێ باس ل ئێك لیستییا پارتی و ئێكەتیێ كر و گۆت» پارتی باوەری ب دیموكراسیێ یا هەی، هەلبژارتن ژی پرۆسەیەكا دیموكراسییە و هەر حزبەك یا ئازادە چاوان پشكداریێ تێدا بكەت، بەلێ دەڤەرێن ژ دەرڤەی ئیدارەیا هەرێما كوردستانێ گەلەك د گرنگن، چەند كورسی زێدە ببن دێ زێدەتر دەستهەلاتا كوردان د ناڤ جڤاتا نوونەرێن ئیراقێدا زێدە بیت، ب ڤێ چەندێ ژی دشێین وان بەندێن دستووری بجهبینین كو هەتا نوكە بجهنەهاتی ماینە».
