نەهـ ترومبێلێن نوو بۆ بەرگریا شارستانیا پارێزگەها دهۆكێ هاتنە دابینكرن
ب پشتەڤانیا سەرۆكێ حكومەتا هەرێما كوردستانێ و ب رێكا وەزارەتا ناڤخۆ و پارێزگەها دهۆكێ نەه ترومبێلێن ئاگرڤەمراندنێ یێن نوو و پێشكەفتی بۆ رێڤەبەریا بەرگریا شارستانیا پارێزگەها دهۆكێ هاتنە دابینكرن.
عەمید حەسەن خورشید، رێڤەبەرێ بەرگریا شارستانی ل پارێزگەها دهۆكێ سوپاسیا مەسرور بارزانی، سەروكێ حكومەتا هەرێما كوردستانێ و رێبەر ئەحمەد، وەزیرێ ناڤخۆ و د. عەلی تەتەر، پارێزگارێ دهۆكێ كر، كو ئەڤ جۆرە ترومبێلێن نوو و پێشكەفتی بۆ رێڤەبەریا وان دابینكرین و گۆت: «ئەڤ ترومبێلە زۆر دپێشكەفتی نە و هەموو سالوخەتێن ئاگرڤەمراندنێ تێدا هەنە، تیمێن مە یێن ئاگرڤەمراندنێ دێ ب ساناهی و بلەزتر كارێن خۆ ئەنجامدەن».
عەمید حەسەن گۆتژی: «چار ترومبێل دمەزنن و چار ژی دبچووكن، د ناڤ جه و كۆلانێن تەنگ دا دێ هێنە ب كارئینان و بلەز دێ خزمەتێ كەن، هەروەسا ترومبێلەكا دی یا گەڕۆكە و بەلەمەك و پێدڤیێن نقوومڤانیێ تێدا هەنە و بلەز دێ د هەوارا هەر روودانەكا خەندقینی د رووبار و سكران دا چیت».
عەقید بێوار عەبدولعەزیز، پەیڤدارێ رێڤەبەریا بەرگریا شارستانی دیاركر، ل ڤان دو سێ سالێن بۆری نێزیكی 33 ترومبێلێن جوراوجور یێن مەزن و بچووك بۆ رێڤەبەریا بەرگریا شارستانی هاتینە دابینكرن، نێزیكی 14 بنگەهێن نوو ل گەلەك جهان هاتینە ڤەكرن.
