بەغدا ب نە هنارتنا مووچەیێ خەلكێ كوردستانێ قەرەبوویا كێمبوونا داهاتییێن خوە دكەت
سیاسەتمەدارەكێ كورد ئاماژە ب وێ چەندێ دكەت كو میلیشیێن حەشدا شەعبی بارێ سەر ملێ حوكمەتا فیدرالییا ئیراقی گران كریە و ژ ئەگەرێ وان میلیشیا كو هەژمارا چەكدارێن دروست و بندیوار سەدان هزار كەسن، مەهانە چەندین ترلیۆن دینار داهاتێ ئیراقێ دچیت، بەلێ بەغدا ب نە هنارتنا مووچەیێ خەلكێ كوردستانێ قەرەبوویا كێمبوونا داهاتێن خوە دكەت.
د دەمەكیدا ل رۆژا 22 مەها نیسانا 2025 وەزارەتا دارایی و ئابووری ل حوكمەتا هەرێما كوردستانێ لیستا مووچەیێ مەها نیسانێ یا فەرمانبەرێن هەرێما كوردستانێ هنارتییە بەغدایێ، بەلێ پشتی نێزیكی 15 رۆژان، هێشتا وەزارەتا داراییا ئیراقێ مووچەیێ فەرمانبەرێن هەرێما كوردستانێ نەهنارتییە. ب دیتنا چاڤدێران، ژ ئەگەرێ هاتناخوار یا بهایێ پەترۆلێ كو ژ ئەگەرێ وێ چەندێ پێشبینی دهێتە كرن بودجەیا ئیراقێ تووشی كورتئینانەكا مەزن ببیت، ئیراق ب دەستبرن بۆ پارەیێ فەرمانبەرێن هەرێما كوردستانێ وێ كورتئینانێ پڕ دكەت.
سەبارەت ڤێ چەندێ د. ناس غەقوور، سیاسەتمەدار گۆت» د سەر وێ چەندێ را كو بەغدا خوە ژ هنارتنا مووچەیێ فەرمانبەرێن هەرێما كوردستانێ ڤەدزیت، گەلەك بەلگە یێن هەین بۆچی پارەیێ مووچەیێ میلیشیا ددەت و پارەیێ فەرمانبەرێن خوە ژی ددەت، بەلێ دەمێ بابەت دگەهیتە هەرێما كوردستانێ، بەغدا دبێژیت من پارەیێ كاش نینە، یان بهانەیان دئینیت، هۆكار ژە ئەوە كو بەغدا ژ ئەگەرێ هاتناخوار یا بهایێ پەترۆلێ داهاتێ وێ یێ كێمبووی و مەزاختی ژی گەلەكن، ئەو مەزاختیێن مەزن ژی ژ ئەگەرێ میلیشیایە كو هەژمارا چەكدارێن دروست و بندیوارێن وان سەدان هزار كەسن و مەهان چەندین ملیار دۆلار مەزاختی یێن بۆ هەین كو سەرجەمێ مەزاختیێن مووچەی و چەكی و جۆرێن دی یێن مەزاختیێن میلیشیا گەلەك زێدەترە ژ مووچەیێ مەهانە یێ فەرمانبەرێن هەرێما كوردستانێ، بەلێ نوكە كو بهایێ پەترۆلێ هاتیە خوار، داهاتێ حوكمەتا ئیراقێ یێ كێمبووی و نەوێریت بێژیتە میلیشیا دێ مەزاختیێن هەوە راگرم، بەلێ دەستێ خوە دبەتە قووتێ خەلكێ كوردستانێ».
د. ناسح غەفوور رەخنە ل وان كەسان گرت كو بەهانەیان بۆ ئیراقێ دئێنن و گۆت» هەموو دزانن چەندین سالە ئەڤە سیاسەتا بەغدایێ یە، هەردەمێ كێشەیا ئابووری بۆ دروست ببیت پەنایێ بۆ بڕینا قووتێ خەلكێ كوردستانێ دبەت، بەلێ ل ڤێرێ كۆمەكا دهۆلقۆتا و كەسان بەردەوام بەهانەیان بۆ وێ خوە ڤەدزینا حوكمەتا ئیراقێ ژ پێگیریێن خوە یێن دارایی یێن سەر ملێ وێ دئینن !».ناڤبری دوپاتكر ژی» پێدڤییە خەلكێ كوردستانێ ب هەموو شێوەیەكی دژی ڤێ سیاسەتا ئیراقێ ب راوەستن و بەغدایێ نەچار بكەن یان وەكو هەڤوەلاتییەكێ ئاسایی رەفتارێ ل گەل خەلكێ هەرێما كوردستانێ بكەت و مافێ وی بدەت، یان ژی رێ بدەتە گەلێ كوردستانێ بڕیارێ ل دۆر چارەنڤیسێ خوە بدەت».
