نێزیكی 50 هزار تیرۆرست و كەسوكارێن وان مووچەیێ شەهیدان ژ حوكمەتا ئیراقێ وەردگرن
پەرلەمانتارەكێ ئیراقێ گەندەلییەكا مەزن یا دەزگەهێ شەهیدان ل ئیراقێ ئاشكرا دكەت كو نێزیكی 50 هزار تیرۆرست و كەسوكارێن وان وەكو شەهید و خانەنشین، مەهانە مووچەی ژ حوكمەتا ئیراقێ وەردگرن.
ئەو پەرلەمانتارێ ئیراقی دبێژیت: ژ بلی پێدانا مووچەی، كەسوكارێن وان تیرۆرستان ماف و ئیمتیازاتان ژی ژ حوكمەتا ئیراقێ وەردگرن. پشكەك ژ وان تیرۆرستان تۆمەتبارن ب كریارێن تیرۆرستی و مینڕێژكرن و پەقاندنا ترۆمبێلان و رەڤاندنا هەڤوەلاتییان، پشكەكا دی ژی هەتا نوكە یێن دناڤ رێزێن گرۆپێن چەكداریدا ل سووریێ شەڕی دكەن، ئێك ژ وان كەسێن ب خانەنشێن هاتیە تۆماركرن دەست هەبوو د كوشتنا 500 هەڤوەلاتیێن ئیراقیدا.
ئەمیر ئەلمەعمووری، ئەندامێ سەربخوە ل جڤاتا نوونەرێن ئیراقێ د داخۆیانییەكا رۆژنامەڤانیدا بۆ كوردستان 24 گۆت» دەمەكێ زۆرە ئەڤ پرۆسەیە هاتیە ئەنجامدان، ب هزاران كەس وەكو شەهید یێن هاتینە تۆماركرن، 25 هزار تیرۆرست ل پارێزگەهەكێ وەكو شەهید یێن هاتینە تۆماركرن».
گۆت ژی» ل پارێزگەهێن دی ژی، دو هزار و سێ هزار كەس وەكو شەهید یێن هاتینە تۆماركرن، سەرجەمێ گشتیێ وان پارەیێن بۆ تیرۆرستان هاتیە مەزاختن زێدەترە ژ ئێك ترلیۆن و 80 ملیار دیناران».
پشتی سالا 2017 ئەو كەسێن ب رێكا سەختەكرنا ناڤ و ناسنامەیێن خوە ل هەردو دەزگەهێن شەهیدان و دەستەیا خانەنشینیێ هاتینە تۆماركرن، كەسوكارێن وان مەهانە نەك تنێ مووچەی وەردگرن، بەلكو مفادار بووینە ژهەموو وان ماف و ئیمتیازاتێن كو كەسوكارێن شەهیدان و خانەنشینان هەی و پشكەك ژ وان خانی و پارچەیێن ئەردی ژی یێن وەرگرتین».
شوان كەلاری، ئەندامێ جڤاتا نوونەرێن ئیراقێ ژ فراكسیۆنا پارتی دیموكراتی كوردستان و ئەندامێ لژنەیا شەهیدان ل جڤاتا نوونەران، گۆت» ئەو بابەت ل پارێزگەها ئەنبارێ و پارێزگەها بابل ژی هەبوو، هەروەسا خەلك هەبوو هەر شەهید نەبوویە ئانكو هەر وی كەسی هەبوون نینە و یێ كریە شەهید، هەیە ژی كاغەزێن وی یێن سەختەكرین، هەیە ژی تیرۆرست بوو و یێ كریە شەهید».
كەلاری باس ل وێ چەندێ ژی كر» ب شێوەیەكێ گشتی ل دەزگەهێن حوكمەتا ئیراقێ، گەندەلی و سەختەكرن یا زۆر بووی، ب كاغەزا سەختە دو ملیار و 500 ملیۆن دۆلار ژ بەنكێ یێن هاتینە راكێشان، ئەڤجا مامەلا شەهیدەكی چاوان سەختە ناكەن؟».
