خسرۆ گۆران: روودانێن دەڤەرێ كاریگەری ل سەر هەلبژارتنێن ئیراقێ نابیت
بەرپرسێ بەرێ یێ پشكا هەلبژارتنێن پارتی دیموكراتی كوردستان راگەهاند: روودانێن دەڤەرێ چو كاریگەری ل سەر پرۆسەیا هەلبژارتنێن جڤاتا نوونەرێن ئیراقێ نابیت و هەلبژارتن ل ژڤانێ خوە یێ دیاركری دێ هێنە ئەنجامدان. هەروەسا دبێژیت: هێشتا دیار نینە دێ هەلبژارتن ب قانوونا نوكە هێنە بڕێڤەبرن یان ژی جڤاتا نوونەرێن ئیراقێ دێ قانوونا هەلبژارتنان گوهۆڕیت.
خەسرۆ گۆران، بەرپرسێ بەرێ یێ پشكا هەلبژارتنێن پارتی دیموكراتی كوردستان
بۆ رۆژنامەیا (ئەڤرۆ) گۆت» ب دیتنا من روودانێن دەڤەرێ چو كاریگەری ل سەر پاشئێخستنا پرۆسەیا هەلبژارتنێن جڤاتا نوونەرێن ئیراقێ نابیت، هەكە چو شەڕ ل ئیراقێ روونەدەن و رەوش یا ب ڤی شێوەیێ نوكە بیت، دێ هەلبژارتنێن جڤاتا نوونەرێن ئیراقێ د دەمێ خوە یێ دیاركریدا هێنە ئەنجامدان، هەموو هەلبژارتنێن ئیراقێ ژی د دەمێ خوەدا یێن هاتینە ئەنجامدان، سەردەمەكی رێكخراوا تیرۆرستییا قاعیدە هەبوو كو فەلوجە د دەستێ تیرۆرستاندابوو بەلێ پرۆسەیا هەلبژارتنان هەر هاتە ئەنجامدان و ل سەردەمێ شەڕێ تیرۆرستێن داعشێ ژی هەلبژارتن هەر هاتنە ئەنجامدان، ئانكو رەوشا سیاسی و روودانێن نوكە ل ئیراقێ و دەڤەرێ هەین نابنە رێگر و ئاستەنگ هەمبەری ئەنجامدانا پرۆسەیا هەلبژارتنان ل ئیراقێ، چونكە هەكە بهێت و پرۆسەیا هەلبژارتنان د دەمێ خوە یی دیاركریدا نەهاتنە ئەنجامدان دێ ڤالاهییا قانوونی و دستووری ل ئیراقێ پەیدابیت».
خسرۆ گۆران رۆهنكر ژی» وەك دیار كۆمسیۆنا بلند یا سەربخوە یا هەلبژارتنان ل ئیراقێ ژی یا بەرهەڤییان دكەت بۆ ئەنجامدانا هەلبژارتنان ل پایزا ئەڤسالە، پێدڤییە ئەم ژی وەك پارتی دیموكراتی كوردستان خوە بەرهەڤ بكەین بۆ هەلبژارتنێن ئەڤسالە یێن جڤاتا نوونەرێن ئیراقێ».
ناڤبری ئەوژی گوت» هەتا نوكە تنێ موقتەدا سەدر یا راگەهاندی كو پشكداریێ د پرۆسەیا هەلبژارتنێن داهاتی یێن جڤاتا نوونەرێن ئیراقێدا ناكەت، هەرچەندە سەدری لیستەكا مەزنن و ل هەلبژارتنێن بۆری نێزیكی 75 كورسی بدەستڤەئینابوون و د دووڤدا خوە ژ پرۆسەیا سیاسی و جڤاتا نوونەرێن ئیراقێ ڤەكێشا، بەلێ جهێ وان پەرلەمانتارێن سەدر هەر هاتە پڕكرن و حوكمەتا ئیراقێ ژی هاتە پێكئینان، هەكە سەدری ئاریشەیان دروست نەكەن وەك ئەنجامدانا خوەنیشاندانان، ئەز باوەرم دێ لیستەیێن نوو پشكداریێ د هەلبژارتنێن ئەڤسالەدا كەن ژوان ژی محەمەد شیاع سودانی و مستەفا كازمی و نوری مالكی و حەیدەر عەبادی و عەمار حەكیم و گەلەك هێزێن د ناڤا چوارچۆڤەیا هەماهەنگییا شیعیدا و لیستەیێن سونی ژی دێ هەبن».
ل دۆر بەرهەڤیێن پارتی دیموكراتی كوردستان بۆ هەلبژارتنێن داهاتی یێن جڤاتا نوونەرێن ئیراقێ، خەسرۆ گۆران ئاماژەكر» هێشتا دەمێ تۆماركرنێ یێ مای هەتا پارتی خوە بەرهەڤ بكەت، هەردەمێ كۆمسیۆنا بلند یا سەربخوە یا هەلبژارتنان ل ئیراقێ خشتەیا خوە دیاركر و دەست ب پێرابوونێن قانوونی كر، وی دەمی پارتی دیموكراتی كوردستان ژی دێ خوە تۆماركەت بۆ هەلبژارتنان و بەربژارێن خوە بەرهەڤ كەت».
خویاكر ژی» ئاریشە ل سەر راستڤەكرنا قانوونا هەلبژارتنان یا هەی، ل بەرە قانوونا هەلبژارتنان بگوهۆڕن، هێشتا جڤاتا نوونەرێن ئیراقێ ل دۆر راستڤەكرنا قانوونا هەلبژارتنان چو كۆمبوون ئەنجامنەداینە، هەكە بهێت و زۆرینەیا جڤاتا نوونەرێن ئیراقێ ل گەل گوهۆڕینا قانوونا هەلبژارتنان بوو ئەڤە دێ گوهۆڕین تێدا هێنەكرن، بەرۆڤاژی هەكە دەنگ ل سەر نەهاتەدان دێ قانوونا هەلبژارتنان ل ئیراقێ وەك خوە مینیت».
