روودانێن 12 رۆژێن شەڕی د ناڤبەرا هەردو زلهێزێن دەڤەرێ (ئیسرائیل – ئیران)ێ دا
رامـان فـاخـر عەبدوللا
دوازدە رۆژێن لێكدانا راستەوخۆ دووماهی هاتن د ناڤبەرا ئسرائیل- ئیرانێ ب پێكهاتنەكا لاواز، دیمەنەكێ هەرێمی یێ ئالۆز ل پشت خۆ هێلا، ئەڤ شەڕێ ل25 حوزەیرانا 2025 ز بدووماهیك هاتی، خالەكا گوهۆرینێ یە كو چێدبیت هەڤسەنگیا هێزێ ل رۆژهەلاتا ناڤەراست بو چەند سالێن داهاتی بگوهۆریت!
ئیسرائیل سەركەفتنێ رادگەهینیتن و لێدانێن سەخت دهاڤێت
ئسرائیل سەركەفتنا خۆ پشتراست دكەت و پشتبەستێ دكەت ب هندەك ئارمانجان ئەوێن بدەست خۆڤە ئیناین وەك كێمكرنا گەفا ئەتۆمی یا ئیرانی، تێكدانا شیانێن سەربازی یێن سەرەكی، ل گۆرەی سەرچاوەیێن سەربازی ئسرائیلی (عملیە الزفاف اڵاحمر) كو تەل ئەڤیڤ ئەنجامدا بوویە؛ هۆیا كوشتنا نێزیكی 30 سەرۆكێن سەربازیێن مەزن ل ئیرانێ د ناڤ وان دا كو جەنەرالێن پلە بەرز، هەر ژبەر ئەڤێ؛ نە رێكخستنەك ل پێكهاتەیا فەرماندەیی چێكر و كونترۆلا ئیرانێ دروستكر، هەروەسا هاتیە پشت راستكرن كو ژمارەیەك ژ زانایێن سەرەكی یێن ئەتۆمی ل ئیرانێ هاتینە كوشتن.
هەروەسا ئارمانجێن لێدانێن ئسرائیلێ هەر ئێك ژ: سازگەهێن ناڤكیێ، كۆگەهێن مووشەكان، فرۆكەیێن بێ فرۆكەڤان، سیستەمێ بەرگیریا ئەسمانی، ئسرائیلێ لێدوانەك دا كو «پرۆژەیێ ناڤكی یا ئیرانی بۆ چەند سالان پاش ڤەگەراند» و هێزێن ئەسمانی یێن ئسرائیلی سەردەستیەكا ئاشكرا نیشادا و زێدەتر ژ1500 فڕین ل سەر ئەسمانێ ئیرانێ ئەنجامدا و شیا پشكێن فرە ل ئەسمانێ وەلاتی كونترۆل بكەن، ئەڤ سەردەستیا ئەسمانی پاداشتێ سالێن كاركرنا ئسرائیلێ یە ل سەر لاوازكرنا نوونەرێن ئیرانێ ل هەرێمێ (حزبوللا ل لوبنانێ و حەماس ل غەزە و پشكداریكرن ل كەفتنا سیستەمێ ئەسەد ل سووریا كو ئەڤە هەمی ببوون رێگر و ترس ل سەر ئسرائیلێ پشتی ئەڤە دووماهیك ئیناین دەرگەهەك ڤەكر دا لێدانەكا راستەوخۆ ل ئیرانێ بدەت).
زیانێن ئیرانێ: لێدانەك بۆ پلە و پایەیا ئیرانێ تەحەدیاتێن ناڤخۆیی
ل ئالیێ ئیرانێ ڤە زیانەكا زۆر مەزن هەبوو، گەلەك دەزگەهێن میدیایی دیار كر كو هەتا 610 كوشتیان هەنە و د ناڤ وان دا سڤیل و خەلكەكێ بێگونەه و هزارەها برینداران سەرەرای وان زیانێن مەزن ئەوێن ل ژێرخانا وەلاتی كەفتی، هەروەسا نەشیانا ئیرانێ بۆ بەرگیریكرنا خۆ ب باشی ل دژی هێرشێن ئەسمانی یێن ئسرائیلی و پاراستنا سەركردەیێن سەربازی لێدانەكا سەخت بوو بۆ پلەیا وێ وەك هێزەكا هەرێمی و پارێزەرا ئاسایشا نشتیمانی.
ڤی شەڕی خالێن لاوازیا ناڤخۆیی ێێن گرنگ ئاشكراكرن ب تایبەت د وارێ ئاسایش و سیخۆریێ دا، كو راپۆرتان دیاركر كو نووژینا ئیسرائیلێ د ناڤا ئەردێ ئیرانێ چەندە، ئەڤ تەحەدایێن ناڤخۆیی دشێن پەستانەكا مەزن ل سەر چینا حوكمرانان بسەپینیت، دێ بیتە ئەگەرێ پێداچوونێن بنەرەتی ل سیاسەتێن ناڤخۆی و دەرڤە.
بەرسڤا ئیرانێ: مووشەك و فرۆكەیێن بێ فرۆكەڤان ل دژی قولایا ئسرائیلێ
ل گەل دەستپێكرنا هێرشێن ئسرائیلێ و كوشتنا چەندین كەسێن گرنگ ل ئیرانێ كو بەرپرسێن بالا دەست بوون و سەركردەیێن سەربازی یێن خۆدان رۆل بوون و ل دەستپێكا جەنگی هاتنە كوشتن، ئیسرائیلێ باوەرنەدكر كو ئیران هند زوی و ب ڤی شێوەیێ توند بەرسڤ دەت كو وەكو یا دیار دەستهەلاتا ئیرانێ ب شێوەكێ هەرەمەكی یا هاتیە دابەشكرن دا ئیران لاواز نەبیت! و د راستی دا ئیران گیرۆ نەبوو د بەرسڤدانێ دا و تەهرانێ هێرشێن خۆ بـ (سۆزا راستەقینە 3) ب ناڤكر و زێدەتر ژ 100 فرۆكەیێن بێ فرۆكەڤان و 200 مووشەكێن بالیستی ل گەل دەهان مووشەكێن كرۆزی ژی د وەختەكێ كێم دا هاڤێتن! و ئارمانجا ڤان هێرشان برینداركرنا دەستهەلاتا ئاسمانی یا ئسرائیلی بوو و نیشاندانا شیانێن ئیرانێ بوو، و بەرسڤەكا راستەوخۆ پشتی چەند سالێن جەنگێ ب نوونەر (ب وەكالەت)، و ئیرانێ چەندین شەپۆلێن مووشەكان بەرەف ئسرائیلێ ئاراستەكرن؛ ئارمانجێن هاتینە راگەهاندن بنگەهێن سەربازی و دامەزراوەیێن هەستیار و هەتا ناڤچەیێن هەستیار، ل ڤێرێ بۆ مە دیار دبیت كو ئیرانێ هێزا خۆ و شیانێن خۆ ب چەند كەسانڤە گرێنەدابوو، بەلكو بۆ هەر كاودانەكێ یا ئامادەیە.
زیانێن مرۆڤی و ماددی ل ئسرائیلێ كێمتر بوون سەرەرای هندێ كو ئیرانێ پترین مووشەك و فرۆكە بكارئینان!
هێرشێن ئیرانێ بوونە ئەگەرێ كوشتنا 28 ئسرائیلیان و برینداربوونا زێدەتر ژ 3000 كەسان (ل گۆرەی وان سەرچاوەیێن هاتینە بەلاڤكرن)، هندەك ل هێرشێن ئیرانێ زۆر گرانی ل سەر ئسرائیلێ راوەستیان و ژێرخانەییا وێ تێكدا و بوو ئەگەرێ هندێ كو پتریا دەمی هەڤوەلاتیێن ئیسرائیلی ل شێلتەران بمینینن و ژیانا رۆژانە تێكبدەت و ترسەكا زۆر بەلاڤ بكەت، چونكی وەكو یا دیار ئیسرائیلێ باوەر نەدكر كو ئیرانێ ئەڤ شیانە یێن هەین و ئەڤ هێرشە ببوونە ئەزموونەكا كەتواری بۆ بەرگریا ئەسمانی یا ئسرائیلێ.
ل رۆژێن دەستپێكێ پتریا هێرشان دشكاندن، بەلێ هەر نە دشیا 100% ژ هێرشان راوەستینیت، بەلێ ئەگەر رۆژ بۆ رۆژ سەحكەینێ، هێرشێن ئیرانێ بهێزتر لێ دهاتن و بەرگریا ئسرائیلێ لاوازتر دبوو هەتا وی رادەی ل رۆژێن دووماهیێ ئیران دشیا زۆرینەیا ئارمانجان بهینیت.
هێرشێن ئەمریكا ل سەر ئیرانێ ئاراستەیا شەڕی گوهۆری
ل ٢٢ێ حوزەیرانا ٢٠٢٥ز، ل دەوروبەرێن دەمژمێر ٢:٣٠ سپێدێ، ویلایەتێن ئێكگرتی یێن ئەمریكا، سێ بنگەهێن ئەتۆمی یێن سەرەكی تۆپبارانكرن (بنگەهێ فوردۆ-نگنز یا ئەتۆمی-سەنتەرێ ئەسفەهان یێ تەكنەلوجیایێ و لێگەریانێن ئەتۆمی).
ل دویڤ هندەك گرتنێن بەرپرسێن ئەمریكی، 14 بومبێن GBU-57 ل سەر فوردو و نگنز هاتنە نیشانكرن و 30 مووشەك هاتنە نیشانكرن بۆ كرۆز و ئەمریكا ئەڤە ب هێرشەكا مێژووی یا سەركەفتی بناڤكر و گۆت مە گەلەك زیان گەهاندە وان جهێن نیشانكری و گەهشتینە هەمی ئارمانجێن خۆ.
و ئیران ل بەرانبەر دا بنگەهێ ئەمریكی ل وەلاتێ قەتەرێ بوردومان دكەت بەلێ چ زیانێن بەرچاڤ نەبوون.
لدویفدا دشێین بێژین دووماهیكا جەنگی بو دناڤبەرا ئیسرائیل و ئیرانێ و ل24ێ حوزەیرانا 2025ز راوەستاندنا جەنگی هاتە راگەهاندن.
ب دیتنا من، ئەگەر بنگەهێن ئەتۆمی یێ ئیرانێ ژ راستا هاتبنە تۆپبارانكرن و یۆرانیۆمێ پویتاندی هاتبیتە ژناڤبرن، دڤێت تیشكێن ژەهراوی و ئەردهەژین و پەقینەكا ب هێز و رۆناهیەكا زۆرا مەزن ل دەڤەرێ رویدابا، بەلێ وەكی یا دیار ئیرانێ بەری فرۆكەیێن ئەمریكی بگەهن ب 48 دەمژمێران بنگەهێن خۆ ڤالاكرینە ژ یۆرانیۆمێ پیتاندی و تێدانە هێلایە و چەند رۆژنامەیێن ئەمریكی ب خۆ ئەڤ چەندە بەلاڤ كربوو و كۆچكا سپی دبێژیت مە هەمی ژناڤبرن.
ل ڤێرە بۆ مە دیاردبیت كو راستی ئێكە ژ ڤان هەردوكان: رۆژنامەیێن ئەمریكی بهێزترن ژ ئیستیخباراتا ئەمریكی، یان ئەمریكا دڤێت خۆ ب پالەوان دابنێت و شەڕی بڤەمرینیت و خۆ ب سەركەفتی دابنیت.
