ئارامی و گەشەبوونا كوردستانێ د بەرژەوەندیا هەمیان دایە
ئيحسان ئامێدی
وە كوردستان بومباران و كیمیاباران و ئەنفالكرن و وێرانكر!، وە مللەتێ وێ برسیكرن و ترساندن و كوشتن و دەربەدەركرن!، و ب وێ سیاسەتێ هوین ژی یێن هاتینە كوشتن و وێرانبووین!، ما بەس نینە؟.
ژ مەراكشێ هەتا كەنداڤی گەلەك مللەتێن دی هەبوون، وە ب سیاسەتێن داگیركەرنێ و خۆسەپاندنێ و بالا دەستیا خۆ ژناڤبرن و عەرەبكرن، سەر هندێ ڕا كورد و كوردستان مان و شیان هەبوونا خۆ وەكو نەتەوەك و كولتوورەك بپارێزن و گەشەیی پێ بكەن.
مە هزركر ل بن ناڤی ئاینی دی ئەڤ هەبوونە و پێكهاتێن نەتەوەیێن جودا مینن و رێز لێ هێتەگرتن، لێ مخابن چیێ دەستهەلات گرتی ئایین ژی د بەرژەوەندیا خۆ و نەتەوەیا خۆ بكارئینا و سیاسەتا خۆ سپاند و یێن دی ڤەدەركرن و پەراوێزكرن، و یێ رایەكا نە وەكی وان هەبا ژناڤدبر!، پشتی هاتنا سیستەمین دەولەتێن نەتەوەیی و نیشتیمانی، دەستهەلاتدارێن ڤان دەولەتێن نوی چێكری هەمان سیاسەت بكارئینا!، و ب هەمان عەقلیەت و رەفتار سەرەدەری دگەل یێن دیتر كر!، ئێدی هەر كوشتن و وێرانكرن و ژناڤبرن بوو، دێ بێژی جڤاكێ مرۆڤی بۆ كوشتنێ یێ ئافراندی.
نهۆ ژی و پشتی 34 سالێن سەربورا هەرێما كوردستانێ و هەرێم بوویە كیانەكێ فیدرالیێ دەستووریێ دانپێدای، هێشتا دەردۆرێن كوردستانێ هەرێ وێ سیاسەتێ دهاژۆن و هەمی گەف و گڤاشتن و دژومنكاریە ل دژی هەرێما كوردستانێ، بۆ نەچاركرنا هەرێمێ داكو سیاسەتێن وان قەبویلكەت و ژێردەست ببیتە ڤە!.
مخابن ل ڤی سەردەمێ زانینێ و پێشكەفتنێ و تەكنەلۆژیایێ و ژیرێ دەستكرد و بەهایێن مرۆڤی و پرانسیبێن مافێن مرۆڤی و پیكڤەژیانا ئاشتیانە بەلاڤبووین، هێشتا هێز و دەستهەلاتدار هەبن ب عەقلیەتەكا كەڤن و گەنی رەفتارێ بكەن و سیاسەتێ بهاژۆن!.
هەرێمەكا دەستووریا دانپێدای بكەنە ئارمانج و مافێن وێ یێن دەستووری پێشیل بكەن و شایستەیێن وێ یێن دارایی لێ ببرن، و دەستهەلاتێن وی یێن دەستووری لێ بستینن!. و یێن د هەولا هندێ دا هەرێما كوردستانێ د وەلاتێ خۆدا دەستهەلاتێن خۆ بكارنەئینیت و كاروبارێ خۆ برێڤە نەبەت!.
كورد كەڤنترین مللەتێ دەڤەرێ و مللەتەكێ ئاشتیخوازە چ جاران فراوانخوازی نەكریە و چ وەلات داگیر نەكرینە و دوژمنكاتیا كەسی نەكریە، تنێ ڤیایە وەلاتێ وی یێ رزگاركری بیت و مللەتێ وئ یێ ئازادبیت و ب ئارامی بژیت و خەبات و قوربانیدانان وێ ژبۆ وەلاتەكێ ئازاد و مللەتەكێ سەرفرازە.
هەرێما كوردستانێ شیا ببیتە كیانەكێ سیاسیێ ئارام كو مەترسیێ ل سەر دەردۆران چێنەكەت و ببیتە سەربۆڕەكا دیموكراتی ل دەڤەرێ كو مللەتێن دی چاڤ لێ بكەن و ببیتە وارەكێ مرۆڤ دۆستیێ و پێكڤەژیان كو خەلكین ژێكجودا هەبوونا خۆ یا ئازاد تێدا ببینن و ببیتە ناڤەندەكا جیهانی یا ل دژی تیر‌ورێ و هەڤپەیمانێن نێڤدەولەتیێن بۆ بهێنە پێكئینان و ببیتە ژێدەرەكێ دابینكرنا نەفتێ و ووزێ بۆ جیهانێ و بشێت پشكەكی ژ پێتڤیێن جیهانێ دابینكەت، و ب ڤان ئەركان هەرێم شیایایە ببیتە هەبوونەكا سیاسی و ئابۆریا باش بۆ ئیراقا فیدرال و سەقامگیریا هەرێمایەتیی و جیهانی، سەر ڤێ هەمیێ را پشتی هەمی سیاسەت و كریارێن دوژمنكارانە، كیلگەهێن وێ یێن نەفتێ یێن دكەڤینە بەر هێرشێن درۆنێنێن بومبرێژكری، كو ئارمانج ژێ لێدانا ژێرخانا ئابۆری و شادەمارێ ژیانا هەرێما كوردستانێ یە و سۆتنا نەفتێ و ترساندندنا كۆمپانیان دا ئەڤ كیلگەیە ژ كاربكەڤن و كریارێن نەفتێ لێ نەهێتەكرن!.
سەیرە ل ژێر سەروەریا دەولەتا ئیراقێ گرۆپێن چەكدارێن پشكدار د پرۆسەیا سیاسی دا ڤان كیلگەها ب درۆنەیان بكەنە ئارمانج و ئاگری بەردەنێ، خۆ داهاتیێ ڤان كیلگەهان هەر بۆ گەنجینا دەولەتا ئیراقێ یە و بەهرا هەمی خەلكی تێدایە و ئەو زیانێن ب ڤان كریارێن دوژمنكارانە ب هەرێمێ كەفتین هەمان زیان ب دەولەتا ئیراقێ ژی كەفتینە، هەروەكو چاوا قەدغەكرنا هنارتنا نەفتا هەرێما كوردستانی ل دویڤ بریارا دادگەها نێڤدەولەتیا ل پاریسێ زیان ب كوردستانێ ئێخستی هەر ئەو زیان ب ئیراقێ ژی كەفتیە، و ئەڤە سامان و داهاتیێ دەولەتێ یە ل هەر هەرێمەكا دەولەتێ بهێتە دەرئینان، ئەڤجا پێدڤیە ئەوێن دەست د ڤان كریارێن تیرۆرستی دا هەی بهێنە گرتن و سزادان، یا فەرە بریاربدەستێن ئیراقێ هەڤبگرن و بەرژەوەندیێن دەولەتێ ب هەرێمێ ڤە ل بەرچاڤبگرن، و لێكتێگەهشتنان ل سەر هەمی بابەتان بكەن و پێگیری ب دەستووری بكەن و یاسایێ سەروەركەن، و بهێلن هەرێما كوردستانێ ب ئارامی گەشە بكەت.
ئارامی و سەقامگیری و گەشەبوونا كوردستانێ د بەرژەوەندیا هەمیان دایە، د خێرا هەمی ئیراقێ و دەولەتێن هەرێمایەتی و جیهانێ دایە و دەم هاتیە هەمی لایەن ب تاك و هێز و مللەت و دەولەت و حوكمەت ڤە تێبگەهن و سەرەدەریەكا ئەرێنی دگەلدا بكەن، دا د بەرژەوەندیا هەمیان دا بیت.
